十二月十一日晚，吳浩康打了一場泰拳比賽，對手是年紀和腳瓜都比他大，打拳年資比他淺的消防員，結果，輸了。

「我從來都唔係一個唔服輸嘅人，我敢輸敢贏，事實上佢喺第一個回合踢到我下陰，嗰一腳將我活動能力減到好低，我跳、我攻擊佢、我身體有震，我都有痛，同埋佢唔止一次擊到我下陰。」

輸給撩陰腿，也輸給經驗淺的拳證，比賽打日本K-1例，禁止用手踭攻擊，也不可雙手捉住對方攻擊。

「佢都重複咗兩次。拳證經驗有限，佢好green，我諗佢只做過幾次拳證，我敢講我打拳嗰陣時，佢都未學！咁嘅因素下會有一啲唔成熟嘅判決。」

由知道他要參加比賽，到比賽後，吳浩康爸爸說過的只有四個字：「白癡！多餘！」

口雖然硬，但吳爸爸還是到場支持。

「佢個人比較嚴肅，喺嗰一刻見到佢咪覺得佢擔心啦，佢一唔出聲，可以有好多空間，未必一定擔心嘅。

「既然決定咗，佢嘅心態都係到場支持，因為爸爸身體唔係咁好，開唔到太大聲講嘢，所以佢有時想講又講唔到。

「好多謝爸爸畀我明白到呢份心意，好多人要到自己做咗爸爸，甚至爸爸唔喺度先會明白，我都幾好彩，可以喺佢仲喺度嘅時候明白。」

我替他說：「輸咗場拳，贏咗個爸，值得的！」

人人錫晒我

我爸爸扮演反對角色，佢覺得一個artiste冇需要去打拳，你做一樣冇需要嘅嘢，係白癡、係多餘！

佢唔沉默，佢多嘢講但態度嚴肅，佢會好啜核地趷你！我爸爸由細到大覺得我做乜都好易放棄。我鍾意彈結他，佢又覺得我玩玩吓，練完結他，全家人一大竇喺度食飯（吳浩康有三個姊姊、爸爸有九兄弟姊妹），佢同親戚講：「我個仔依家彈結他好叻o架！第日一定喺大會堂表演呀……門口！揸個兜一定夠佢接o架！」 點解你咁樣奚落我？點解你喺咁多人面前話我？佢話：「與其你驚人笑你、驚醜，點解你唔做好啲？」佢想令我深感受啲，佢話：「你啲咁嘅人，係時候為自己行為受應得嘅侮辱，如果咁嘅言語侮辱對你好大傷害，第日面對嘅嘢其實更加多！」結論係啱吖，我好多謝佢。

第一個回合還未被踢中下陰時，吳浩康還可以跳跳紮攻擊，但其後陷於接近捱打。

我係孻仔，阿媽、家姐都好錫我，爸爸都好錫，佢覺得我係麻煩人，如果唔好好教，會帶畀社會好多麻煩，幾錫都要忍住。我父母同我啲家姐，從來冇苛求啲乜，冇要我特別做啲咩，想我做一個正正經經嘅人，唔好害人就得。

我家姐出嚟做嘢時候，我中一，冇錢，嗰陣時環境好啲，爸爸又畀到，媽咪又縱，啲家姐又縱到我好似仔咁樣。佢哋一唔畀錢，我食食吓飯拋低一句粗口，拍枱就返入房！然後喺門罅會有啲錢攝入嚟，當然係家姐，阿媽睬你都傻。全家人都好偏心，好多謝家姐、爹哋，好多嘢佢哋未必認同，但都會支持。

我就算大隻騾騾都好，搬屋我唔使執嘢唔使搬嘢，我啲家姐嘅態度就係：「細佬我畀五十蚊你自己踩架單車，離開我視線範圍就好乖o架喇，你就叻仔喇，出去啦！」

家姐會同啲仔女講：「你哋唔好整壞舅父啲玩具呀，舅父會唔開心o架！」搞我部琴就話：「唔好咁大力噤啦，整爛舅父啲嘢好大件事o架！」我部遊戲機擺喺屋企叫佢哋自己上嚟玩啦，我啲家姐唔敢o架！我返屋企如果小朋友打緊機，家姐會趕佢哋出房o架，「唔好同舅父爭嘢玩，出番去啦！你舅父細路仔嚟o架咋！」

我不衝動

當年被控普通毆打罪，我講一萬次冇做過係冇用嘅，法庭最後裁判係證據不足，當庭無罪釋放。呢一件事令我幾困擾，因為冇做過。你覺得我衝動，我覺得唔成立，衝動未必係唔好，衝動如果用得正面、方向啱，都可以係優點。

如果我仲衝動，我諗唔止打一次人啦。我試過出完事喺頒獎禮完騷行緊入後台，有一個觀眾大嗌：「喂，吳浩康！唔好再食白粉喇！食死你呀！」我又試過行行吓超級市場，有幾個師奶話：「呢個咪係隊嘢嗰個死道友歌手呀！」係會有一刻hard feeling，我冇咁高智慧識得當場睇化件事。其實師奶咋嘛，我驚你咩呀？如果衝動啲我可以去同佢理論。

受盡溺愛的童年，拍攝這張切蛋糕照時，攝影機背後應該有無數個女性的笑臉。

衝唔衝動唔係我講，我從來都唔會畀形容詞同評分自己，係好白癡，唔客觀。做藝人唔可以我行我素，呢行係睇人面口食飯，我唔可以講介意，係在意人哋點睇。如果我在意人哋點睇嘅心都冇埋，咁就好難做喇！其實只要未瓜柴，你願意放過自己，到最後都係冇事，唔好將所謂問題放大。今日你放到一樣嘢好大，有一樣感覺好難受，半年之後已經唔係一回事。

我唔賣碟已經唔賣咗好多隻，已經唔係第一二隻碟唔賣得，我唔係屬於會嘥時間學跳火圈嗰啲gimmick嘢嘅人，做歌手要用音樂，我又夾band，我以前比較受歡迎嘅都係一啲powerful、rock少少嘅歌，所以出年會以樂隊形式出唱片，自己做主音同彈結他，暫定走funk rock路線。

吳浩康爸爸（左）算是他家中最口硬的人，但說到尾，也是愛錫兒子的。至於鄺美雲，也是吳浩康好朋友，平安夜已相約開party。

曾因被控毆打和藏毒而上法庭，吳浩康至今已沒再行差踏錯。

下陰功能正常

我打拳，Jacquelin（莊思敏）唔擔心我傷，擔心輸贏。佢覺得贏咗冇乜着數，輸咗又唔好睇，我打咁多年比賽，贏人哋都應該，輸咗人哋就會笑。我就冇乜所謂畀唔畀人笑，輸咗要接受，因為我唔認為咁好笑。好多人問我，唔係傾好咗贏梗、搵個渣啲容易贏嘅，打嚟做乜？我會問，如果贏梗，打嚟做乜？

還好，吳浩康都仲有人報道吓，好感激，成兩年好少出嚟，都有人報道，作為一個藝人都安慰。

與莊思敏感情穩定，吳浩康的聖誕有甚麼節目要看她，連他下半生怎過，差不多也要看她了。

驗下陰work唔work呢……呢個係人與生俱來嘅本能，係可以驗得到嘅。我比較安心嘅係小便冇痛，陰莖創傷唔係好犀利，至於個陰囊比較差啲，有瘀，佢踢得比較應。呢幾日都開心，吳雨大哥都打電話問候我，其實我又冇乜嘢，我喺屋企嘻嘻哈哈，又去行街、休息咗幾日，除咗落雨驚淋濕腳上傷口、生咗粒痱滋好鬼痛之外，冇撻地方痛，冇嘢需要擔心！

希望盡快結婚啦，唔係佢恨嫁，係我恨娶啫，我覺得我搵到對象。佢又冇逼婚，反而想講，人哋都未應承、未表態！喺結婚上佢從來冇畀壓力，反而工作上有。佢話點解雷頌德、伍樂城可以咁多產，點解我唔得。同佢一齊都幾舒服，又學到好多嘢，因為佢管晒佢屋企，大至公司出咩數，如果佢屋企人唔喺香港又係佢簽，細至星期日畀唔畀工人放假又係佢決定，第時我屋企應該會幾井井有條，有工人畀佢使就係囉！

苦練多年結他，預備明年以樂隊姿態出唱片。

聖誕頭痕

聖誕節，普世歡騰，面對這個節日，吳浩康由細到大都很頭痕。

「入咗行我先覺得聖誕係精采！以前我好憎o架，好無聊！人又多，有女朋友仲憎！周街都係人，唔知做乜好！去卡拉OK又講明幾點要走，又貴！食飯，都貴！做呢樣又唔係，做嗰樣又唔係，唔出街又唔係，出街仲衰！出街之後漫無目的死行o架咋嘛！

「我側邊嗰個聖誕都冇嘢做，我會好慘，佢連續兩日冇嘢做會抑鬱，佢係一個嚴重工作狂嚟o架你唔知o架？好恐怖o架呢樣嘢！會十問九唔應，情緒低落，問佢做乜嘢，佢話：『放假放咗好耐囉！』我話：『好耐？知唔知咩叫耐呀？』唉，25號睇吓Jacquelin點啦！我就點都搵到嘢做，我可以喺屋企寫歌，希望佢有嘢做啦！」

老實說，我只是勉強記得上年和前年的聖誕怎過，年代再久遠一點的，記憶已在九霄雲外。我和Jacquelin相反，聖誕最好甚麼都不必做，最好天氣回暖，撻在沙發看電視，禮物也不用了，聖誕老人會實現我願望嗎？