估唔到 BMW X3行貨咁快到港，先行部隊有 28i，內櫳依舊豪華舒服、柔情似水； 8速波箱順暢易揸，畀到你女王嘅駕馭感，最重要係引擎有力得嚟夠溫馴。三大優點加埋，仲唔係你朝思暮想嘅大隻男朋友？記者：徐影龍攝影：譚盈傑 Model： Hazel@GME Models
其他副刊影片 溫柔 線性加速耗油低 放大圖片 
■尾廂空間可由 550公升，躍升至 1,600公升，實用性頗高。
剛喺美國狠試完新 X3，其中 35i Man到不得了，男人對佢愛錫程度可媲美家中嬌妻。另一款 28i火速到港，雖外表長相跟大哥 35i一樣，不過引擎配置換上 3.0L直六，車格可算跟 38i有着明顯分野。男人一味要多，引擎容量、 Turbo最好乜都夠勁，反而行 NA嘅 28i，會吸引到一班非追求性能、偏向實際嘅用家。事關自然吸氣引擎，耗油較低，加速時亦更為線性，不會出現 Turbo Lag頓挫感， 310Nm扭力峯值係 2,600轉出現，儘管馬力達到 258匹，加速力仍順勢拾級而上，唔會喺爆發時嚇你一跳，相當之溫柔體貼。
放大圖片 
■頭尾燈均加上銀色眼眉，頗有新鮮感。
放大圖片 
■車尾稍稍拉高之餘，造型亦更為立體。
體貼 豪華設備服侍周到 放大圖片 
■屏幕、錶板顯示清晰。
X3大改款，最重點係體積增大、軸距增長，比舊款更具氣勢，加上頭尾燈齊齊畫上一道「銀眉」，望落勁有台型。坐上車，不論乘客或司機位，均明顯感受到空間嘅闊落感，五個座椅亦軟熟舒服得無與倫比，女士會更 Buy佢嘅一堆豪華體貼設備，如全電動天幕式天窗，增加開揚感幫你減壓提神；前後獨立恒溫空調，為你噓寒送暖；後泊鏡頭實後方，讓你舞住咁大架車都依然泊得四四正正； 550公升特大尾廂，畀你盡情 Shopping安放戰利品；加埋電動尾門，開閂時亦可保持淑女形象，咁體貼，隨時好過男朋友。
放大圖片 
■車廂已夠闊落，加埋特大天窗，感覺零舍開揚。
放大圖片 
■軸距增長至 2,810mm，令後座一樣咁闊落舒適。
信賴 電子波棍夠溫柔
有外形又識人，一定引嚟不少狂蜂浪蝶，不過你放心， X3就如發哥對發嫂一樣咁值得信賴，原因係儘管馬力達到 258匹，但憑藉 8速 Steptronic波箱之助，升降波段反應相當迅速，面對繁密燈位、上落山路及急彎，檔位判斷均十分準確，齋以 D波走天涯，亦唔會有慢半拍之感。四驅系統依舊出色， TCS、防滑差速等調校得好細緻，整段西貢之旅遇到大大小小彎位， X3仍然好靈活，當然一時興起，亦可玩玩+/-波，享受一下高轉加速或拖波收車嘅駕駛樂趣，就好似騎住一隻忠心耿耿嘅獅子一樣，要快要慢悉隨尊便。
放大圖片 
■配上最新 8速+/-波箱，慳油之餘亦令行車更順暢。
放大圖片 
■操控好兼視野佳，大大架 SUV一樣舞得掂。
BMW X3 xDrive 28i 放大圖片 
■新 X3鬼面罩及頭燈體積加大，甚具台型。
引擎： 2,996cc直六馬力： 258hp/6,600rpm扭力： 310Nm@2,600-3,000rpm傳動： 8速 Steptronic+/-波箱售價：$519,000查詢： BMW HK
同場加映BMW地道 Apps方便港人 放大圖片 
寶馬總廠一向有搞開 E-Magazine，香港廠方亦好積極，搞咗個品牌 iPhone Apps，有齊香港 BMW賣緊嘅熱門車款，除咗必有嘅即時換色、換軨、 360度旋轉車身同 Wallpaper下載外，仲有 BMW本地發佈會或活動嘅介紹同短片。最體貼係直駁 Google Maps，將最近你嘅 Showroom或維修中心，以最快捷路徑顯示出嚟。我貪心啲，希望各大廠商唔好掛住 iPhone，出多啲高解像度嘅 iPad版就好喇！Apps搜尋字： BMW HK 
留言列表
