Sony推出對上一部防水Cyber-shot相機U60已經係2003年嘅事，事隔咁耐，技術當然有改良。新機TX5最厲害係機身設計竟然同冇防水功能嘅TX系列機種差不多，連厚度都造到只得17.7mm，屬同級最薄，睇怕小記都係時候跟部肥大肉厚嘅防水相機講Bye Bye！
向來喜歡玩多種顏色嘅TX系列，嚟到防水新機TX5當然亦唔例外，合共推出黑、綠、粉紅、紅同銀色五款，同期仲有五色防水橡膠套可供選擇，等大家根據自己嘅喜好玩Mix and Match，用四防機都用得潮過人。 各位打開TX5嘅入電位，便會發覺條防滲膠邊甚纖幼，小記起初都唔多放心，但將部TX5放入大魚缸內試玩一輪後都唔覺有問題。原來官方資料列明TX5可以在水深達三米嘅範圍內玩足一小時，即係話攞去玩浮潛都得，而且當轉用水底拍攝場景模式時更會發出「溫馨提示」，叫大家檢查有冇物件楔在防滲膠邊，安全過人。 由於TX5用上輕觸式操控，在芒上篤幾吓就可以影到靚相，水中拍攝時就最啱用。另外，TX5亦繼承埋Cyber-shot近期最好玩嘅智能一掃全景功能，打橫一掃就能夠影齊成班出海玩嘅朋友仔，其他數碼相機望塵莫及。除咗三米防水功能外，TX5具有防塵功能，亦可抵禦從1.5米高下墜至地面嘅撞擊力，加上喺零下10℃嘅低溫環境都用到，趁依家季尾帶去日本、韓國滑雪，都唔怕凍壞部機。 除上述嘅四防賣點外，TX5今次更用上高感光度嘅Exmor R CMOS感光元件，配合BIONZ影像處理器，在低光環境下仍能拍攝到鮮明嘅影像。鏡頭方面，TX5用上一支25mm廣角嘅4倍變焦蔡司鏡頭，拍攝效果相當唔錯，而且加入咗「高動態範圍背光修正模式」，在反差極大或者背光環境下拍攝，背景夠光之餘，仲可以影到靚女主角燦爛嘅笑容，唔再黑口黑面。 感光元件：1/2.4吋1,020萬像素Exmor R CMOS 鏡頭：4倍變焦蔡司Vario-Tessar鏡頭（25-100mm） 顯示屏：3吋16:9輕觸式屏幕 儲存媒體：MS Duo、MS PRO Duo、SD、SDHC 體積：94.0×56.9×17.7mm 重量：128g 查詢：2345 2966
TX5提供黑、綠、粉紅、紅及銀色五款選擇。
防水膠套跟機身一樣，亦有五種顏色，各$100。
放大圖片
水底拍攝安全提示
機身只得17.7mm，係目前最薄嘅防水數碼相機。
電池蓋設有防滲膠邊，防止由電池及記憶卡位入水。
設有神奇畫筆功能，可以為數碼影像加入特別圖案及寫字。
防塵防撞兼防低溫
一掃全景
一掃全景拍攝模式相當好玩，一張相就能影晒成個水池嘅場景。
水底拍攝
在魚缸內開啟水底拍攝模式影相，白平衡都做得幾準，抵讚。
背光修正
開動高動態範圍背光修正模式，在大背光環境下，模特兒都冇黑面。
背光修正唔怕黑面
機檔案
唯一弊病係推蓋式設計，容易在機蓋及機身之間嘅罅隙留有水漬。990
留言列表
