如果 FF13係次世代 RPG里程碑，咁 God of War III就一定係動作 Game神級作。遊戲畫面全部即時運算，人物肌肉疤痕爆頭挖眼高清演繹，真係播片咁靚，今集仲話殺盡希臘眾神，絕對打甩髀！文：阿洛
打埋今集無仇報
故事主角 Kratos係斯巴達肌肉戰士，但面對野蠻族之王時戰敗，垂死嘅佢用靈魂換嚟戰神力量，但就搞到家破人亡，仲俾眾神排斥唔侵佢玩。嬲嬲哋復仇復足三部曲，嚟到第三集， Kratos繼續向住古希臘奧林匹斯之巔進發，會挑戰海王波士頓、冥王哈迪斯同眾神之首宙斯，敵人仲有超巨大嘅泰坦十二巨神之首，簡單講，差唔多炒起背叛佢嘅整個希臘眾神！
放大圖片 
1.背景巨人都識郁，畫面好有迫力。
放大圖片 
2.打暈敵人，仲可以用指令必殺技。
放大圖片 
3.殺得興起，更可搶敵人武器嚟用。
放大圖片 
4.擰甩頭！呢類爆血場面濕濕碎啦。
放大圖片 
5.遊戲中有極巨型嘅波士同埋機關。
放大圖片 
6.獅子頭拳套出招時仲有光源變化。
特殊技上天下海 放大圖片 
■遊戲中有裸女出現，兒童不宜。
打戰神就係要暢快，今集繼續有大量血腥特殊技，俾玩家用殘暴手段了結班「神唔似神」，而透過今集畫面，更發覺有大量壯觀場景，例如喺郁動緊嘅巨人身上大打出手，又例如面對成個海咁大嘅首領。另外，今集亦有大量新武器新道具加入，好似拳拳到肉嘅獅子頭拳套、着咗可以喺地面衝刺嘅靴同飛天嘅翼等等，可以上天下海大顯身手。比較敏感係前作露骨嘅同裸女玩小遊戲部份依然存在，而且仲有裸露鏡頭，小朋友玩到嗰 Part記得叫老竇幫手。
神級版本獨佔下載
「跟機級」大作，特別版梗係唔少得，呢隻《 GOW III》除有「主機同捆版」同「三集合版」外，更會有超豪華包裝嘅「潘朵拉之盒」版本！包裝盒就係遊戲中登場嘅傳說神器女——「潘朵拉之盒」雕塑品，內含《 GOW III》遊戲外，仲有限量版畫冊及新場景、新關卡、新造型及原聲配樂、隱藏片段等內容嘅下載兌換碼，可以上網下載身份象徵嘅獨佔元素。另外一提，呢隻 Game會係中英文合版，即係有中文字幕，神呀！打救我吧！
PROFILE 放大圖片 
主機： PS3類型：動作人數： 1人製作廠商： SCE Studios Santa Monica 
留言列表
