伊能靜離婚袋 1,650萬要錢唔要仔週刊雜誌精彩回顧 ★－明星靚相大分享☆

要錢唔要仔　伊能靜離婚袋 1,650 萬

偷食唔抹嘴伊能靜，近日盛傳同哈林傾掂數離婚，仔仔、贍養費咩都唔要，淨係要番名下四層物業。現時伊能靜大陸拍劇每集收 28 萬港元，日後自己供樓一樣搞得掂。

今個新春，哈林庾澄慶、伊能靜帶埋仔仔哈利，飛去日本北海道家庭樂，以為伊能靜紅杏出牆獲終極原諒，但，原來通通都係假象。
平日對老婆處處忍讓哈林，面對「綠帽事件」擊中男人最痛，有傳哈林終於開口，要求伊能靜退出娛樂圈坐屋企做湊仔婆，否則，離婚。
得兩條路揀，但伊能靜寧願賠上婚姻換取自由，更無條件將仔仔哈利撫養權交番俾庾家，就連贍養費都唔要，伊能靜只保留名下由哈林俾首期俾埋錢供，位於北京、台北、上海，四間合共港幣 1,650 萬物業，真係識揀。

左至右
北京：華貿公寓兩個單位，市值合共約 640 萬元。
上海：永新花園，市值約 550 萬元。
台北：台北巿復興南路辦公室，市值約 460 萬元。

既往不咎

完成六天北海道家庭樂，伊能靜同老公哈林、仔仔哈利一齊返台北。自從發生拖手事件，一直縮北京伊能靜，第一次現身台灣，不過佢並唔係為見多仔仔幾面，而係處理同哈林離婚問題。
自從發現戴綠帽，哈林諗過度過，最終選擇原諒伊能靜，不過就要求對方放棄演藝事業，留屋企乖乖湊仔做少奶奶。
外傳至少有三億台幣（約 6,800 萬港元）身家哈林，又唔似張學友做雷曼苦主，要養起伊能靜易如反掌，只要佢肯留低，哈林願意既往不咎，否則，大家各行各路，簽字離婚。

07 年，剛剛傳出伊能靜同黃維德拍劇撻，當時女方為箍煲，趁放假陪哈林哈利同遊香港；今個新春假期，一家三口轉戰北海道度歲，全因一早答應哈利去日本玩，兩公婆唯有交足戲扮家庭樂。（《忽然 1 周》圖片）

撤離庾宅

唔使做又有老公養，大把女人恨都恨唔到，偏偏，伊能靜經過深思熟慮，最後都係決定離婚，更趁住今次返台灣，返愛巢執拾私人物件，徹底搬離庾宅。
留台短短五日，伊能靜二月八日早上十一點半現身桃園機場，準備坐直航機飛返北京，不過就唔見哈林同哈利送機。
一直住手機打 sms 伊能靜，隨身行李數量極多，全部疊起分分鐘成個人咁高，似搬屋多過似出門。伊能靜乘坐航班十一點五十分要起飛，為爭取時間，辦好登機手續後，伊能靜刻意將頭上頂帽有咁低拉咁低，繼而摩打腳急步入閘，唔想俾人見到。

8/2 　 11:35am

將頂帽有咁低拉咁低伊能靜，推住一大車行李，離開台灣出發去北京，見到記者乜都唔願答，更攤大手板叫記者讓路俾佢入閘登機。據知，伊能靜今次返北京主要係傾新劇同廣告合約，證明拖手事件曝光後，財路依然滾滾來。

左閃右避

記者趁機上前影相，追問「跟哈林在北海道就婚姻問題談好結論嗎？」、「回台有跟婆婆（哈林媽媽）見面嗎？」、「會不會離婚？」、「小孩怎麼辦？」
一輪嘴係咁問，伊能靜全部唔答，更唔耐煩伸手擋住記者鏡頭話：「你們的閃光燈閃到我都看不到路了啦！」記者提佢可以拉高頂帽，就唔怕仆親，佢即時發晦氣：「不要！」
至於仲有冇同黃維德聯絡？伊能靜繼續扮聽唔到；反而提到偷食事件爆發至今，覺得自己有冇錯？需唔需要負責任時？伊能靜表現「遲疑」，呆兩秒後，再將帽拉低飛奔入閘。

8/2 　 3:12pm

媽咪又唔黐家，同日下午哈林帶仔仔去公園玩單槓，趁住未出發香港錄影《耳分高下》，兩仔爺爭取時間天倫。

傾掂分家

伊能靜何止選擇離婚，有指佢就連仔仔哈利撫養權都唔要，只要求日後兩母子可以間中見見面。
唔想個仔留身邊另覓第二春，偷食事件爆發後，工作有增無減伊能靜，初步提出離婚之後，無須哈林俾贍養費，寧願自己養自己。
聽落好似無條件「引咎離婚」，其實伊能靜仲有大把數手，事關佢已經向哈林提出，繼續持有北京、台北、上海，四間合共約值 7,200 萬台幣物業。

哈林人在香港，多年好兄弟張學友難得到台灣做宣傳，兩人未能見面，對於近日哈林鬧離婚，問學友會唔會戥兄弟心痛，佢話：「至少我沒看到他真的很不開心，說不定他可以自己面對就好。」

老公俾錢

據知，伊能靜手頭上四個物業，全部由佢老公俾錢投資。永無 say no 哈林，無論首期同供款，都一力承擔，更義無反顧將所有物業業權，歸伊能靜個人名下，豪宅贈佳人。
決定日後長住大陸發展伊能靜，趁今次返台灣，順道安排出售位於台北市復興南路，面積約 670 呎辦公室，現時市值大約 2,000 萬台幣（約 460 萬港元）。
唔使俾錢有樓手，其實伊能靜投資眼光都唔差。 02 年轉戰大陸發展，哈林上海買入面積接近二千呎「永新花園」。當年入貨價 280 萬港元有找，由於低位買入，就算早排國內樓價大跌，伊能靜單位市值依然賺成倍，約值 550 萬港元。

經常寫 blog 伊能靜，除上載北海道雪地照營造幸福家庭假象，更留言話從來無同任何人提及過家事，希望各界唔好再信坊間流言。

離婚新聞再度成為熱話，更有傳哈林會二月十日，錄影台灣節目《百萬大歌星》時宣布有關消息，不過當日哈林繼續沉默是金，隔多兩日到香港錄影《耳分高下》，被記者包圍逼供，最後要節目監製錢國偉（右圖右一）企出幫手擋駕。

台灣 10/2

香港 12/2 （曾志恆攝）

偷情公寓

買樓大有斬獲，伊能靜於是再度出擊， 06 年睇中被譽為北京六十項重要建設之一「華貿公寓」，一口氣叫哈林買入兩個單位，一個自住、一個收租，合共投資約 640 萬港元，現時賬面同樣有斬獲。聽晒老婆話哈林，估唔到水買返「華貿公寓」，日後成為伊能靜用私會黃維德偷情公寓，事關大廈保安曾經爆料話，見到伊、黃經常手拖手屋苑樓下水池散步，一早就知佢關係唔簡單。
至於究竟幾時先離婚，真係要等大家得閒先可以開波，事關根據台灣離婚手續，當事人要先上網下載離婚協議書，填好之後，要搵兩個年滿廿歲見證人簽字，之後當事人必須一齊到戶籍所在地有關部門辦理離婚；同日，要更換新身分證，戶口名簿亦要註明最新婚姻狀況。離婚仲要對足成日篤眼篤鼻辦手續，香港離婚簡單得多，各自上律師樓畫隻就搞掂。