呢排娛樂圈喜事特別多，小春、千嬅輪住補擺喜酒外，上個禮拜六（十二月十八日），谷祖琳亦同佢個大學同學劉穎恒拉埋天窗，响洲際酒店筵開五十二席招呼親朋戚友。


小谷出嫁，唔少圈中人都俾面到賀，包括曾志偉、吳君如、古天樂、何超儀、陳子聰等，但最觸目都係周慧敏同老公倪震，拍住拖嚟飲。
上個禮拜香港天氣急降，市區氣溫跌穿十度，但周慧敏當冇事，著住露膊tube dress，再束多條谷胸粗腰帶登場，令胸前肉球呼之欲出。
老婆晒肉唔怕凍，反而倪震做足禦寒措施，乾濕褸護體，一旦老婆嗌凍，除落嚟俾倪太著又得，絕對符合周慧敏環保又慳家嘅要求。


Tube dress加谷胸粗腰帶，周慧敏每行一步，心口都有3D震動效果，路過嘅睇到眼都唔眨，全身密封嘅倪震完全唔介意。


何超儀、陳子聰由頭黑到落腳嚟飲，兩公婆貌合神離，反而假情侶古天樂、吳君如，望落「恩愛」得多。



周麗淇同黃伊汶都有份做姊妹，仲因為怕「肉酸」唔肯搶花球，但黃伊汶就有本事將花球據為己有，攬住唔放手。


身為阿叔，谷德昭當然要嚟賀小谷，仲搵咗周星馳、張學友、舒淇、張栢芝等人錄製恭賀片段，送俾小谷做新婚紀念。


拍拖一年唔夠，劉穎恒就買咗隻一卡戒指向小谷求婚（右圖）。鑽戒卡數幾多唔緊要，最緊要小谷啱睇啱戴。


arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄