明星靚相大分享☆

八方收到位市民投訴，話最近迪迪尼喺港鐵金鐘站宣傳萬聖節活動賣「全包圍」廣告，搞到成個月台鬼影幢幢，嚇到佢兩個分別兩歲同七歲嘅囝囝喊起上嚟，形容當時「冇任何方法避免，直至返到屋企仍一直受困擾，極度不安」，仲話以後唔再去金鐘站。

放大圖片

迪迪尼推廣萬聖節活動，喺港鐵金鐘站大包圍賣廣告。

放大圖片

乘客林太擔心讀幼兒班嘅囡囡睇到驚嚇海報會嚇親。

影視處接一宗投訴

八方去金鐘站了解過，個廣告位於一號同二號月台之間，每條柱都貼咗「迪士尼黑色世界」、「魔咒焚城新驚驗」宣傳海報，佈滿喪屍嘩鬼。帶住個讀幼兒班嘅囡囡喺度等車嘅乘客林太覺得，啲海報都幾恐怖，佢個女見到啲鬼會攞本書打佢哋，可見囡囡唔鍾意，話口未完，林太囡囡仲即時踢咗海報上啲喪屍幾腳。不過，有外籍小朋友非但唔驚，反而覺得好得意，圍住條柱不停轉圈。法律角度嚟睇，個廣告冇乜問題，影視及娛樂事務管理處話至今收到一宗投訴，但廣告內容冇違反《淫褻及不雅物品管制條例》。至於係咪恐怖，唔同人有唔同觀感，可能有人覺得咁樣賣廣告先有創意，管制太多反而妨礙創作自由。不過，有一樣嘢確係事實，就係港鐵搵錢招數越來越盡，不但用盡車廂、月台每寸空間嚟做廣告位，早前又將部份車廂嘅座位拆咗，改為裝塊板喺度畀乘客挨吓，增加企位，結果畀人話算死草諗縮數。立法會議員甘乃威就認為，唔應該成個月台都滿佈呢類廣告，應該考慮留番五分一或四分一嘅位，畀嗰啲唔想睇嘅人可以喺嗰度等車，他又建議閘前貼出告示，提醒廣告內容或令人不安之類，畀市民選擇，咁會公平啲。迪士尼樂園回應話，廣告推出前已通過港鐵相關部門審查程序。港鐵發言人話廣告由一間廣告代理公司負責，會將意見交畀間代理公司跟進。mailto:pf_lee@appledaily.com