羅嘉良陪阿仔行街，但全程心不在焉，表現得不耐煩。
娛頭
3000呎別墅送新老婆　賤爸爸羅嘉良冷待親兒
2010年02月04日
羅嘉良去年十二月與國產花旦蘇岩拉埋天窗，婚後生活過得奢華，先大手筆一炮過以七百多萬港幣，購入北京一幢三千呎別墅送給新老婆，又帶她到歐洲多個地方遊埠，上月再去海南島度假，十分識歎。
至於被羅嘉良一刀切，不再有任何經濟支援的前妻方敏宜及十歲大親生仔羅裕，最近由四百九十呎細屋，搬到只得四百三十呎單位。上週四（一月廿八日）途經香港的羅嘉良，與兒子見面，但在短短一個多小時飯局，羅嘉良多次行開同現任老婆（蘇岩）傾電話，冷落兒子，羅裕要求老豆買遊戲機時，他竟然拒絕，對前妻同親生仔，都無情無義。
半年無見
四十七歲羅嘉良自從與三十五歲國內女星蘇岩結婚後，對前妻及親生兒的生活狀況更加不聞不問，十歲大的羅裕經常希望見到爸爸，但羅嘉良每次都自稱好忙，要四圍去開工拍劇，兩父子接近半年未見過面。經兒子多次在電話哀求，羅嘉良終於肯趁上星期路經香港，與他見面食飯。
上週四（一月廿八日），羅嘉良約同兒子到銅鑼灣一間日本火鍋餐廳食飯，由於太耐無見爸爸，當日羅裕專登悉心打扮，著了一件新淨白色外套，戴上一頂黑色紳士帽，在一名女親友陪同下，七點半已到達餐廳。
等到八時正，羅嘉良才施施然去到餐廳，但坐低唔夠十五分鐘，羅嘉良的電話突然響起，之後他就向兒子表示要出外吸煙轉頭返，離開餐廳後，羅嘉良即時打電話，然後一邊傾一邊煲煙，而記者聽到他當時是以普通話與對方傾偈，而且全程面露笑容，相信是與新老婆談情。兩人傾極唔願收線，最終傾了足足十五分鐘，羅嘉良才收線返入餐廳陪仔。
未知兩父子是否太耐冇見，羅嘉良表現拘謹，未有太多笑容，反而兒子就表現得開心，整餐飯只食了唔夠一個鐘，羅嘉良便趕住要埋單離開，三個人食了四百多元。


在公眾地方羅嘉良公然撩鼻，極不衞生教壞細路。
 
阿仔睇中二千多元 Xbox主機，羅嘉良都有攞上手研究，但未知是否嫌貴唔買。


其間羅嘉良電話響起，他顧住傾電話，無理會個仔。
 
行完 HMV冇收穫，阿仔再叫阿爸去玩具反斗城，可惜最後都空手而回，唔肯買遊戲機俾個仔。

闊佬懶理 


08年，羅嘉良與前妻方敏宜離婚。前妻獨力照顧 10歲兒子，入不敷支，更要大屋搬細屋。另一方面，密做的羅嘉良，單是 09年收入已接近 1,000萬，但對前妻及親生仔的艱苦生活，卻闊佬懶理。
晒恩愛
上個月他們去到海南島度假造人，事後羅嘉良更上載相片上 blog，擺放兩人手腳合照。


羅嘉良與蘇岩豪花幾十萬去到荷蘭影婚紗相，之後再到德國等地方旅遊。 


狠心唔買
之後兒子要求到 HMV睇遊戲機，去到 HMV，羅裕一支箭颷到專賣遊戲機櫃位，攞起 Wii遊戲興奮向爸爸介紹，但羅嘉良毫無反應，更不顧儀態在公眾地方撩鼻。其間羅裕睇中價值二千四百六十九元 Xbox360主機，今次羅嘉良雖然有反應攞上手研究，但最後都狠心唔買，令兒子即場無晒心機。跟住一行人再去到玩具反斗城，不過，同樣係齋睇唔買。
據了解，蘇岩不想羅嘉良與前妻及兒子有太多聯絡，所以羅嘉良亦從未試過帶兒子見蘇岩，而蘇岩為了要令老公全心全意對自己，已決定盡快生仔，從而有更好的理由，減少他與前妻兒子見面。
事實上，○八年與前妻方敏宜離婚後，羅嘉良僅將當時仍欠五百多萬供款，市值約千一萬的愉景灣住所，及百多萬現金贍養費留給對方，除此，再無任何經濟支援，就算明知前妻供唔掂層樓，要將千呎大屋放租，搬住只有四百九十呎蚊型單位，他依然無動於衷，為了要養家，方敏宜只好一邊湊仔，一邊做兼職賺錢。


整餐飯只食了短短一個鐘，羅嘉良便催住走，一步出餐廳就當住個仔面前煲煙。
 
食飯中途，羅嘉良離開餐廳與老婆傾電話兼煲煙，其間笑容滿面，傾足十五分鐘。
 
羅嘉良將價值千多萬愉景灣獨立屋轉給前妻名下，但原來尚欠五百多萬供款。
 
原本住千呎獨立屋，但現在住只有四百呎細小單位。
 
羅嘉良前妻方敏宜獨力湊大兒子，每日都一早送仔返學。
 
每日方敏宜都趁往返愉景灣船程空檔，幫阿仔對功課。

使費大
羅嘉良風流快活，前妻方敏宜與兒子相依為命，每個月供樓、供書教學，生活費開支龐大，對近乎零收入的方敏宜來說，簡直坐食山崩。
供樓：$31,612
租屋：$6,000
菲傭：$3,580
兒子學費：$3,400
補習費：$1,000
課外活動費：$2,000
每月支出：$47,592
再搬細屋
早前方敏宜為了陪住兒子讀書應付考試，焗住辭去兼職，在零收入的情況下，最近兩母子搬往朋友貝沙灣屋企暫住，稍後會又再搬到租金平一千元，但只有四百三十呎愉景灣極細單位居住。
「佢兩母子真係好慘，已經被人拋棄，但個男人都唔盡做老豆責任，明知佢哋無收入都唔幫手，又成日同個新老婆出嚟晒恩愛，身為前妻睇到點都會唔開心，個仔都好唔開心成日匿埋喊。所以早排（羅嘉良再婚期間）佢（方敏宜）情緒真係好低落，但係佢又唔想喺個仔面前講咁多，驚個仔會憎個老豆。」方敏宜身邊人說。
奢華生活
對前妻及親生仔金錢封鎖，相反對新老婆蘇岩就出手闊綽，有指他與蘇岩現時居住的北京三千呎愛巢萊蒙湖別墅是蘇岩名下，但實則是羅嘉良以七百多萬港元，一炮過付款，送給蘇岩的結婚禮物。
除了送別墅，羅嘉良更經常帶住新老婆周遊列國，擺酒前先去歐洲玩浪漫，上個月又去了海南島度假，更將相片上載到個人網誌，公開晒恩愛。


上月羅嘉良奪得內地網站男主角獎，興奮得與新老婆蘇岩啜爆。
 
去年十二月羅嘉良豪花百萬在北京舉行婚禮。
 
羅嘉良以七百萬港幣買了北京萊蒙湖別墅送給蘇岩。
 
本週二，羅嘉良兒子由親戚接放學後，返到暫住朋友的貝沙灣屋企。

經典衰爸爸


拋妻棄子悲慘故事，小朋友永遠最無辜最受害，除了羅嘉良，圈中經典例子必數秋官鄭少秋。

鄭少秋
秋官自從同官晶華另組家庭，對肥姐、欣宜兩母女便愛理不理，後來肥姐病重，但秋官只到過醫院一次探望前妻，甚至在肥姐離世前，亦只肯透過電話話別，堅拒見最後一面。據知秋官在肥姐臨終前答應，每年會陪欣宜食飯慶祝生日，但通通得個講字未有兌現！


竇唯
事業如日方中的王菲，與竇唯 96年未婚懷孕，翌年誕下女兒竇靖童。 99年竇唯公開承認與北京攝影師高原有染，更無厘頭指王菲大肚逼婚全屬「陰謀」，大條道理拋妻棄女。


林國雄
陳秀雯丈夫、前演員林國雄被貼大字報追債，「姨仔」陳加玲連日在報章炮轟姐夫「假出家，真呃錢」，指他耗盡家姐三千萬積蓄，完全冇理過老婆同兩個仔。








arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄