苦命金毛狗醫生－明星靚相大分享☆

做義工係好有意義嘅事，可以幫助有需要嘅人，狗主Florence鍾意做義工不特止，仲帶埋愛犬金毛尋回犬Milk Milk去做狗醫生，一齊去幫助人。現實中，幸福唔係必然，Milk Milk雖然鍾意接近人，但自細就有泌尿系統問題，上年佢嘅後腳仲斷埋十字韌帶，需要鑲ソ金屬板穩定病情。家Milk Milk暫時要休養，唔能夠再去探訪，不過Florence知道施比受更有福嘅道理，等Milk Milk好番之後，再繼續去幫助人。

本身鍾意做義工嘅Florence，連佢養嘅金毛尋回犬Milk Milk都成為狗醫生，一齊做義工幫人，「Milk Milk見到啲長者時，會特別靜，唔會郁嚟郁去，會坐定定咁俾長者摸佢，好似仔女咁陪伴喺佢哋身邊。好多長者見到Milk Milk嚟老人院會好開心，會將自己嘅故事或者生活瑣事講畀佢聽，而Milk Milk會好專注咁聽，狗醫生嘅作用就係令被探訪者減少孤獨感，多一啲心靈上嘅交流。」 06年，Florence朋友養嘅金毛尋回犬生咗幾隻BB，問Florence有冇興趣養番隻，「當時我想養狗，於是就接咗Milk Milk返屋企，自從養咗Milk Milk之後，我生活都健康咗，除咗返工同做義工外，我多數會留喺屋企上網，家要帶佢出去行山、游水，亦會參加狗會，好似香港金毛會，識多咗好多愛狗嘅人士，生活圈子都擴闊咗。」

Florence話Milk Milk自細已經好鍾意接近人，「我帶佢落街散步，佢都唔怕陌生人，會走埋其他人身邊。但有次行過樓下便利店，咁啱有個女人行出嚟，Milk Milk就撲向個女人想同佢玩，點知佢話俾Milk Milk嚇親，驚Milk Milk有病，之後報警話要入院檢查。」雖然最後都冇搞出事，但令Florence意識Milk Milk太活潑，要帶佢畀犬隻訓練師訓練。

鍾意人做狗醫生
接受訓練後，Milk Milk嘅表現非常之好，「連犬隻訓練師都話Milk Milk喺受訓後，表現得好乖好定，我見佢咁鍾意接觸陌生人，自己又係義工，就帶佢去參加狗醫生計劃，通過考試成為狗醫生。我會帶佢去探訪老人院，可以幫到有需要嘅人。」採訪時，記者見到Milk Milk精神奕奕，行得走得，點知Milk Milk原來周身病痛，「最初接Milk Milk返嚟都唔覺有咩問題，但喺佢7個月大時，發現佢尿頻，又唔飲水，有時仲會屙血尿，我立即帶佢睇醫生，先知佢泌尿系統有問題，膀胱好易發炎，但唔知係咩原因引起，於是我不斷帶佢檢查，又拎啲狗糧去驗，最後發覺原來食物嘅蛋白質太高或者有化學成分就會令佢發病，佢要食冇加工嘅食物，或者白肉先冇問題。」

自製冇添加食物
為咗補償Milk Milk冇得吃零食及狗糧嘅遺憾，Florence專程去學整健康狗食物，「我驚出面嘅食物加咗唔少添加劑，就上網參考外國餐單，搵唔同嘅材料，整啲食物畀Milk Milk食，好似風乾魚乾、鴨肉，由揀魚到風乾都係我親手包辦。食我整嘅食物就唔怕令佢膀胱發炎，兼且唔會食得咁單調。」 Milk Milk天性愛親近人，但病痛令佢冇法再做狗醫生，「喺上年，我發覺Milk Milk 行路慢咗好多，個坐姿唔正，之後去檢查，原來先知道佢兩隻後腳嘅十字韌帶斷咗，要各鑲一塊ソ金屬嘅板，幫助固定，之後兩個月都唔可以走動。」

就咁睇落去，Milk Milk行動自如，完全唔覺兩隻後腳鑲咗ソ金屬板，「自從手術後，Milk Milk要暫停參加狗醫生計劃，要好好休養，我擔心佢做探訪時，人哋唔為意下壓到佢對後腳，再次整傷佢。家要控制佢嘅體重，唔好令佢嘅後腳承受太多力，所以食嘢比以前節制，唔可以食太多，等佢情況穩定咗之後先再去做狗醫生。」

做狗醫生過3關
如果主人有興趣帶狗狗參加狗醫生計劃，可去亞洲動物基金接受測試。狗醫生嘅甄選要經3個部分，整個考試需時約10分鐘，首先考官會觀察狗隻與主人、陌生人及其他狗隻嘅接觸行為；考官亦會刻意拉扯狗隻耳仔、表皮或尾巴，同佢玩耍，睇吓狗隻會唔會有激烈反應；之後狗隻必須佩帶狗帶，與主人步行時需表現得平和友善，而狗隻需能迅速回應如「坐下」、「站定」或「來」等基本指令。查詢：http://www.animalsasia.org/?hk

騷goods　無添加狗糉
端午節就到，主人可以買啲無添加食材做嘅糉畀狗狗食，應吓節。查詢︰http://fourcloudspet.shopping.dollygirl.hk ####

Milk Milk 金毛尋回犬女仔　6歲 Florence與Milk Milk 擁有深厚感情，平時玩到癲，瞓晒地。