群星講波
講波經晒波衫 廖碧兒貪卡卡靚仔
2010年06月18日
世界盃周五（ 11日）開鑼，有機會越洋到南非親身體驗球賽的高海寧，亦帶定唔少波衫搵球星攞簽名。
咪以為睇波係男人專利，其實唔少女波迷為咗睇波不惜捱更抵夜變熊貓眼，標準球迷廖碧兒、許志安、梁漢文同陳山聰，同你講波經之餘亦不忘攞埋啲靚衫、紀念物品同大家分享！
波友勁信邪，踢波冇贏梗，好似 13號凌晨超班馬英格蘭對美國，因龍門格連甩手，搞到 1比 1和波收場，被球迷插爆，唔怪得娘炳話南韓分分鐘爆冷捧盃。
熱捧球隊巴西
熱捧球員卡卡（巴西）、 C朗（葡萄牙）
巴西擁躉廖碧兒，本來今次有機會入場睇世盃，但因工作在身白白放棄機會，「本來同成班朋友 9號就飛去南非睇波，不過因為要去上海做電影節，張飛惟有讓俾其他朋友睇啦！」
碧兒唔算波癡，人睇波，佢就睇靚仔，「我哋做呢行好多時都會見到 sport嘅球星，好似碧咸、奧雲。我自己就鍾意卡卡同 C朗，仲有朗拿甸奴，不過今次細哨（巴西隊朗拿甸奴）冇份踢，真係有啲失望。」
碧兒愛珍藏波衫，尤其佢至愛嘅巴西隊，不論主場、作客嘅波衫、風褸，甚至入場嗰件黑色球衣佢都有齊，「今年 Nike sponsor咗 9隊球隊，巴西係其中一隊。 Nike今年推出嘅波衫質料係聚脂纖維，每件衫都由 8個回收膠樽，製成 Nike Dri-FIT面料，夠晒環保。」
除咗波衫多外，碧兒仲儲埋唔少 mini足球，「啲波好靚、好得意，我有幾個仲鑲咗入牆，好特別 o架！」
四年前，廖碧兒做 Unicef大使時，撞正世界盃舉行， Nike同大會仲特登將佢英文名「 Bernice」印喺件葡萄牙波衫背脊，碧兒話：「呢件係無價寶嚟！」
卡卡
巴西作客球衣以藍色為主色，件衫經改良後，不但比以前更透氣，面料比原先仲輕 13%，每件$479。
巴西主場波衫都係選用 sharp醒嘅黃色。
這條褲嘅褲腳印有南非民族嘅圖案，甚具特色。
巴西隊入場時嘅進場服是黑色 polo shirt。碧兒話：「呢件衫係限量版，好少有得買。」
許志安 大衛韋拿神射手
熱捧球隊西班牙
熱捧球員大衞韋拿（西班牙）
82年，安仔第一次睇世盃，「嗰時因為五哥同三家姐都好鍾意踢波，我俾佢哋感染。」
02年，安仔自掏腰包，請五哥同老友張衛健到日本睇世界盃決賽，親身感受現場的熱熾氣氛，「入場睇只係感受氣氛，根本就睇唔真，如果真真正正要睇一場球賽，係睇電視大銀幕，可以仔細睇到每幕入球嘅過程同動作，仲有慢鏡重播㖭。」
安仔今屆睇好西班牙，不論正選和後備球員都勁過人，「我個人最鍾意狀態大勇同靚仔嘅大衞韋拿，我睇好佢成為神射手，至於巴西對南韓一役係必睇賽事。」
安仔同五哥（左）、 Dicky 02年飛去日本睇世界盃之餘，亦不忘買紀念品，「我買咗條巴西隊嘅毛巾， Dicky就買咗個波。」
大衛韋拿
梁漢文 南韓望爆冷入四強
熱捧球隊西班牙、南韓
熱捧球員大衛韋拿（西班牙）
梁漢文自小受舅父尹志強感染，熱愛足球， 82年開始睇波。他今屆熱捧西班牙，冷捧南韓。據他分折︰「除非滑鐵盧，臨場失準，只要西班牙能打出兩年前在歐洲國家盃嘅水準，捧盃唔成問題。至於擁有軍人性格嘅南韓，在球場上絕對有優勢，即使未能捧盃，亦大有機會『片』入四強，只要在 B組分組賽出到線，面對 A組的法國和墨西哥，勢均力敵。
「而我最喜愛西班牙球員係大衛韋拿，不獨身形線條好，夠弗，且屬靚仔一族。」
梁漢文一生人從未試過主動搵偶像合照，惟 98年於法國影唱片封套，晚飯時巧遇巴西朗拿度，他即上前邀對方合照。
陳山聰 美斯全球最勁
熱捧球隊英格蘭、阿根廷
熱捧球員美斯（阿根廷）、朗尼（英格蘭）
本身係晨曦隊嘅陳山聰，除咗鍾意買衫外，亦熱衷足球，今屆世盃佢熱捧美斯為最勁球員，「阿根廷嘅美斯超勁，我覺得佢依家係全球最勁嘅球員，佢可以自己扭扭吓波，突然殺你一個措手不及。」
讀書時嘅山聰亦係一個波牛，「我以前已經係牛屎飛，踩住對白飯魚就去球場踢波，踢爛咗唔知幾多對白飯魚！我 90年開始睇世界盃，嗰時撞啱放緊暑假，我走去同舅父住幾日，晚晚一齊睇波。上屆我開始同一大班朋友一齊睇，我加入晨曦隊後，仲約埋晨曦隊球員一路打住邊爐一路睇波，陳發枝同山度士（兩位足球先生）仲一路講解。佢哋比其他評述員仲精，有錢都買唔到呢啲 course。」
山聰儲埋唔少世界盃紀念品，「全部都係朋友買俾我嘅手信。 02年嗰屆世界盃，明星足球隊去咗韓國睇波，雷米金盃好有紀念價值，仲有啲金牌同鎖匙扣。呢啲依家都買唔到，我得閒就摷出嚟睇吓、抹吓！下屆世界盃喺英國主辦，我希望可以去英國捧英格蘭，順便買衫！」
山聰大讚美斯球技精湛，但初賽阿根廷以 1比 0贏尼日利亞，唔少網友指美斯同其他隊友留力，未能發揮最佳表現。
除了美斯外，山聰亦係英格蘭 fans，朗尼亦係佢最愛球星之一。
山聰今年買咗一件巴西隊卡卡嘅 10號波衫趁熱鬧。
呢件波衫亦係 02年世界盃嘅紀念品，山聰平日亦會着住呢件衫去踢波、跑步。
雷米金盃鎖匙扣，山聰到依家都唔捨得用。
02年嘅世界盃，山聰嘅朋友仲買咗一個金牌同銀牌紀念品俾佢。
山聰身上件奧地利波衫係多年前買嘅，依家已經係古董，而佢手上嘅獅子 GOLEOV，係上屆世界盃
嘅吉祥物。
呢個雷米金盃最有紀念價值，山聰愛不釋手。
高海寧 西班牙頭號 fans
熱捧球隊西班牙
熱捧球員費蘭度托利斯（西班牙）
睇咗兩、三屆世界盃嘅高海寧，今次會拍住 Keyman（馬啟仁）直踩南非，「上一屆孖住 Daddy、細佬，喺屋企一齊嗌，鬼咁過癮。但今屆我會同 Keyman一齊過去做主持，成 crew人得我一個女仔，係好難得機會，可以由開幕睇到閉幕。我負責做場外訪問，早前已經猛煲球隊同球員資料。
我今屆睇好西班牙，每位球員都好得，前鋒費蘭度托利斯，韋拿射波好準，中場嘅費比卡斯同龍門嘅卡斯拿斯都好勁。如果見到費托，我一定搵佢影相、簽名，佢不但技術好，又後生兼高大靚仔，好有前途……」
高海寧自掏腰包買波衫，包括巴西及阿根廷，身上穿着嗰件英格蘭波衫係工作時大會送贈，由於係度身訂造，所以又貼身又露腰。
高海寧手上拿着的是西班牙波衫︰「呢件要成 480蚊，係買俾細佬，所以揀大碼，我會帶埋過去搵球員簽名。」
今屆世界盃，西班牙係身價最高嘅球隊，總值 6億 5千萬歐元（約港幣 65億），而前鋒費蘭度托利斯及韋拿，總值超過 1億歐元（約港幣 10億）。
張靚穎 美斯係足球天才
熱捧球隊阿根廷
熱捧球員美斯（阿根廷）
「海豚音小天后」張靚穎，原來是國內有名嘅「女波癡」，係阿根廷頭號 fans。難怪佢同張學友合唱國語版 2010世界盃可口可樂主題歌《旗開得勝》時，份外投入。
她娓娓道來︰「我最愛阿根廷踢波嘅風格，尤其『小跳蚤』美斯，他係球場上天才，天生球感好好，不論係射球或傳球，好難揣摩佢條路，最出色係攝位射球，令人拍案叫絕。」
不過，張靚穎話踢波邪，最怕「烏鴉口」，中「大熱必死」的魔咒︰「我唔敢講阿根廷奪冠，但阿根廷、英格蘭同西班牙係必看賽事。雖然捧阿根廷，但亦好鍾意巴西中場卡卡，佢近年狀態無復當年勇，但對佢有份支持咗多年嘅情義結。」
她推介咗幾場必睇賽事，包括︰ B組尼日利亞對南韓、 C組英格蘭對阿爾及利亞，仲有 G組葡萄牙對巴西。
美斯擁躉多，希望佢下一場可以發揮佢嘅爆炸力，入多幾粒！
留言列表
