尋澄味 林澄光熱到溶的中午，減肥心切的一行8人，騎着單車在大尾督與鹿頸之間游走，在大家正要脫水之際，Sunny劉翁建議full team去醫肚。把單車放回車上，3 架7人車直奔粉嶺公路，記得以前在上水視察工程，村長曾推薦過一間好餐廳。
開業超過30年的九里香，與上水街坊一同成長。 當年由朝爆到晚，又小菜又打冷，到當今的朝6午4，而且逢星期二休息，原因只是對出品極有要求的王老闆，為了保持品質，以最精選的人手為街坊服務。接近中暑的8個肥仔，秉承了一貫的暴食作風，未坐低就已經亂叫一通。開胃的鮮茄豬扒飯，一叫就是3碟，大量番茄和洋葱經過快手爆炒，酸酸甜甜勁好送飯；肥厚的豬扒鬆軟程度，可以放心給無帶假牙的老人家享用，加上邊位肥膏煎得焦香，真的是「豬扒都可以變女神」。斑腩飯的咖喱汁，香濃惹味不涸喉，令任何一個人都義無反顧搏命扒飯；炸斑腩的脆皮外層一咬即爆，嫩滑魚肉相對肉騰騰的豬牛，少了一分罪疚感。椒鹽骨飯「全走」之後，就是椒蒜香濃的炒椰菜，成為了這班食肉獸減肥期間的恩物，大大碟10秒內被殲滅。
門口的蒸櫃是九里香的標誌，5款熱賣的盅頭飯都是招牌菜，香濃的甜豉油任落唔嬲，更配備了大量自家醃製酸菜，而且又會因應供求而配合出爐，所以九里香的盅頭飯勝在任何時候去吃，都能夠保證熱辣辣，九里遠都聞到飯香。招牌的盅頭飯一定要全方位測試！排骨飯的排骨仔肥瘦相間，啖啖鬆軟入味，膠質重的泰國翡翠絲苗又嗦盡了肉汁和豉油，再加上開胃酸菜，兩盅落肚之後充滿力量，即時參加3項鐵人賽都無問題。臘味飯有齊膶腸、臘腸和臘肉，雙腸肉汁澎湃，今日竟在炎夏遇上，懶理是冬天的名物。還有山竹牛肉feel 的肉餅飯，經過甜豉油的洗禮，與飯撈勻，再加燶邊的爆漿荷包蛋，好味程度想即刻搬入上水。
九里香茶餐廳地址：上水新成路89號地下電話：2671 3741
少年食神林澄光（Michael）旅遊飲食達人，醉心研究各國飲食文化，深信飲食無分貴賤，致力用有限金錢換無限快樂。近作有《少年食神曼煮泰菜》、《秘．台灣隱世美食遊》 ####
煎蛋牛肉飯$28
鮮茄豬扒飯$33
咖喱斑腩飯$33
排骨飯$28
留言列表
