10年於兆萬開業的Green Cube，首創貼紙相形式自拍短片服務，曾引起過一段熱潮，但只維持了半年，生意大倒退，由賺變蝕，兩位老闆Hugo及Patrick索性在上年9月關鋪思過尋出路，直至上年年尾出關，2人想到推出印tee服務，賣點是客人來相，他們把趣怪圖案加工到相片再印到tee上，成功招徠寵物主人和家長客，來個谷底大翻身，現時每月賺近2萬元。
「我哋上網搵咗好多得意嘅圖片做參考，再設計一啲特定嘅圖案，可以將啲相key上去，客人嚟圖片，我哋key完相再印落件tee度，不過啲客好心急，食完飯就要有，我哋要喺1個鐘內起貨，如果要啲客等得太耐，令到佢哋熱情退減，就唔會幫襯。」採訪當日所見，鋪內掛滿剛印起的tee，大多是小朋友和狗仔相片，印tee服務主攻寵物主人和家長客。
兩老死Hugo及Patrick是於浸大修讀電視電影副學士時認識，畢業後一起加入電視台做PA（節目助理），但不甘一世打工，希望創業做老闆，在10年投資17萬開鋪搞自拍短片服務，以為全港獨一無二，市場一定受落，結果因為缺乏宣傳，以及市場對於付錢拍片玩意，興趣不太大，開業半年，生意下滑，蝕錢收場。「情人節反應真係好好，但發現回流客好少，我哋有諗過做婚宴客，平價即場拍攝賓客對新人嘅祝賀，結果都係冇門路、冇口碑、冇經驗，得個諗字。」他們拍片最初是錄製DVD給客人，後來改用QR Code發放短片，客人覺得好新奇，由於短片拍攝再無發展前景，他們希望發展QR Code生意。「我哋諗咗好耐，決定將QR Code放到tee上面玩，因為覺得人人都會買tee，而且唔只一件，好似最初推QR Code星座tee，客人利用智能手機嘟個碼，就知每日運程；其後再推出訂製服務，好似情侶tee個code可顯示一段示愛message，市面都算新嘢。」
吸取教訓重新出發
但QR Code涉及新技術，每每要解釋很久，客人才明白，「所以好多客未聽完就走，而且只局限年輕貪新鮮嘅一輩，始終盤生意都冇乜起色。吸取咗呢次教訓，我哋要做一啲大眾都受落嘅產品，回頭客好重要。」因為QR Code tee尚算受歡迎，故他們以tee作為目標，開闢來相設計tee服務。「其實上年9月決定轉型，但租約未滿，仲捱緊間1萬蚊租，反正冇客，我哋決定關門唔做生意去研究印tee技術，當時一部現成名廠印tee機起碼10萬一部，我哋已經喺谷底，邊有咁多本吖，加上都係試吓嘅心態，所以連部機都係D.I.Y.，咁會平好多。」他們上網搜集印tee資料時，見到外國有人自己砌機，之後就跟住學，「前後買咗3部印A4 size 打印機返嚟砌，又加木頭喺機下面承托，成本都係2千，最後成功咗，但發現A4size太細好多局限，之後再買部A3 Size 打印機嚟改裝。」Patrick話回想用3萬元再創業，真是奇蹟。
轉租鋪位吸引人流
直至上年12月租約期滿，他們改租同場近電梯位置的鋪位，雖然面積細一半，只得百多呎，但人流比較多及租金平一半，大大降低成本，為了節省開支，今次裝修全由2人負責，新店開業不到一個月就錄得盈利，「生客多咗，啲客見到個效果得意，就會試吓攞相嚟畀我哋key，所以我哋會不停推出新設計圖案，可以吸引啲客返轉頭，家有成50款選擇。」
到了情人節銷情更佳，月賺過2萬，「終於捉到市場方向，客人鍾意特別，市面其實有好多印tee公司，但都係印現成嘅圖或相，冇加工設計服務，我哋最初都估唔到會有咁多寵物主人同爸爸媽媽buy呢個concept，如果來相唔使加工每件賣$148，加工嘅tee賣$198，好多人都買得起。」為了提供更好質素，他們花了2萬元去買一部新印tee 機，採用最優質的墨水，提高質素留客。Hugo主要負責設計執圖，而Patrick則負責印刷，「見生意好先至揼本買新器材，部新機都係喺大陸買，係人哋砌好，又可以配番專業印tee墨水，我哋始終未買得起名廠十幾萬嘅機，不過山寨機質素都唔差，而且自己修理都得，零件都係用番之前嘅打印機。」
商場邀請示範印tee
兩人優點在於研發技術，但宣傳方法始終較單調，目前只靠facebook及派傳單，幸好今年5月，他們獲油塘一個商場邀請去分享創業故事，及即場示範不同印tee方法，變相多了一個宣傳途徑。他們笑言：「都唔知佢哋點搵到我哋，但有成5千蚊車馬費，亦可宣傳公司，去得過！」
他們更打算推出，客人upload穿上身的Green Cude tee到公司的facebook，便可獲$20折扣，希望藉此有更多人瀏覽facebook及有更多印製效果圖片讓人參考。「因為基於私隱問題，我哋唔能夠留有客人嘅圖片畀其他人參考，希望可以攞多啲sample，而且發現好多寵物主人，喺放狗時着埋件狗仔圖案tee，其他狗友見到好得意，就會嚟幫襯，慢慢咁傳開去，希望儲多啲作品相。」現時他們月賣250件tee，月賺近2萬，未來他們計劃接更多團體客，例如學校、公司、狗會等，「試過有中學嘅啦啦隊嚟幫襯，所以我哋會推出團體優惠，因為每單生意金額會多啲，相對賺得更多。」
印tee逐格睇
質地好重要
除了印tee機和墨水，Hugo 說tee的質地也很重要，「我哋先後喺香港荃灣工廠區及內地淘寶入貨試印效果，淨係試驗已經用咗成100件tee。有啲係質地差，印上去啲墨水會化開、有啲印上去個形會變咗，所以最好買全棉，針織夠密嘅tee印出嚟嘅圖會較仔細。」目前他們只提供白色及黑色tee選擇，原因印圖效果較好，而且不想砸太多貨，始終黑、白是最受歡迎。
新鋪再開業成本
租金：$23,200（3上1按）器材：$2,000 入貨：$5,000 雜費：$800 投資：$31,000
每月收支
租金：$5,800 人工：$16,000（2老闆）入貨：$5,000 雜費：$400 營業額：約45,000 盈利：約＄17,800
Green Cube
地址：旺角兆萬中心5樓512鋪電話：9570 9573 網址：http://www.greencubehk.com ####
原本Green Cube位於轉角位，並不起眼，Hugo（左）及Patrick明白到印tee生意，生客好重要，故他們於上年年尾租約期滿時，轉戰近電梯位置的鋪位，人流比以前多了2、3倍。
通緝狗圖案tee，每件$198。
最新款美國隊長狗，好多寵物主人都把自己隻狗整上去，好得意。$198
用狗狗相片加工印製tote bag，售$70。「狗出沒注意」圖案是3大最受歡迎圖案之一。
這部是之前用的D.I.Y.印tee機，「買部打印機返嚟砌，家已經退役。」
他們的市場推廣策略比較弱，目前只靠facebook、派傳單，之前試過團購QR code Tee，反應一般。
今年5月，他們獲油塘一個商場邀請去分享創業故事，及即場示範不同印tee方法。
店內亦售賣QR Code tee，情侶tee每件$198。
用智能手機的App拍攝QR code，會link到去另一個畫面，可以預先設定不字句或是短片。
Step 1：客人阿寶把囡囡的相片交到Green Code
Step 2：可以現成直接印或是選圖加工。Hugo負責執相，將圖key上去，給客人看看效果。
Step 3：Patrick負責印製，他笑言最好客人不要在現場看，因有時也會有閃失要重印，客人在場壓力很大。
Final：大功告成，tee還可以加上小朋友的名。
客人阿寶因為屋企有好多阿囡得意嘅相，而且百幾蚊件tee唔算貴，阿女見到件衫有佢個樣，覺得好開心。
留言列表
