明星靚相大分享☆

Michael Wong
白色背心$1,790 Gucci
啡併軍綠色紮染針織外套$18,950
啡紅色束腳長褲$6,880
啡色貓眼石吊墜穿珠皮頸繩$2,980
純銀珠串黑皮手繩$4,480
All Bottega Veneta
粉藍色絲質頸巾$4,995 Alfred Dunhill
萬國錶飛行員環球時計腕錶，玫瑰金限量版手錶配啡色水牛皮錶帶$133,000（限量 500隻） IWC

Profile

Michael Fitzgerald Wong
出生日期︰ 1965年 4月 16日（白羊座）
出生地︰美國紐約
身高︰ 5呎 11吋
體重︰ 170磅
語言︰英語及廣東話
簡歷︰ 1983年來港度假，隨兄羅素（原名王慎德）拍攝新藝城電影，繼而入行，因外形健碩，經常飾演警察，以《飛虎雄心》中的飛虎隊教官 Stone Wong一角最令人印象深刻，樹立威猛特警形象，並被選為「香港十大理想銀幕警察」之一。 2000年，曾成立電影製作公司，自資拍戲，自導自演文藝動作片《里情》。除了電影， 1998年在加拿大取得飛行牌照，接着在香港考取專業飛機師牌照，現為香港航空青年團的榮譽長官，官階為上尉。
主要作品︰（電影）《飛虎雄心》（ 94）、《野獸刑警》（ 98）、《里情》（ 00）、《七劍》（ 05）、《竊聽風雲》（ 09）；（電視劇）《創世紀》（ 99）、《歲月風雲》（ 07）；（唱片）《 Cool Rhythm》（ 07）；（演唱會）《 Big Band A Legend Reborn》（ 10）。

“唔揸飛機，去邊度搵錢？”

男人，最忌被標籤不事生產得個樣。尤其是，當事人「暗啞底」勤力又上進，惜時不我與，王敏德是箇中例子。 83年來港拍戲， 28年了，如他所言，稱得上代表作的《飛虎雄心》也是 16年前的事。 00年，更做過老闆，最終敗興兼損手而回。屢敗屢戰，近年投入新事業——唱歌，每周並兼職直升機機師，積極開源。
除了為頭家，也想證明給大家看，心中團火，依然燒得熾熱。
「我份人，好天真，年紀唔細，依然醉心追逐夢想。
「 18歲入行，冇諗過大紅大紫，有得做咪做囉，一眨眼，廿幾年。呢三年，淨係拍得一齣《竊聽風雲》。老實講，香港來來去去得四個男主角之嘛——劉青雲、吳彥祖、任達華、劉德華；若等人搵，即係唔使旨意有主角做。自己做老闆？呢種經驗，一次就夠。

「我知道，留在香港，事業已經唔多發展空間，市場太細，兜兜轉轉，都係想返美國發展。依家傾緊一部電影，哈，四十幾歲人至進軍荷里活，唔算遲，想當年，周潤發都係 43歲至拍《血仍未冷》。
「有鬥心，皆因家庭開支愈來愈大。兩個女打算去美國留學，學費連寄宿費，一年成百萬呀！娛樂圈，講多過做，如果我唔兼職做直升機師，邊度搵咁多錢呀？！
「依家我送客人過海，十分鐘機程，好快搞掂，但我花咗 10年時間、 80萬學費去考呢個駕駛執照。行行都一樣喇，要搵錢，預咗睇人面色，其他資深機師，揸開軍機，喺佢哋面前，我只係一個細蚊仔，搞到我次次開工都好鬼緊張，步步為營。
「最怕撞啱載 fans，佢哋一見我就興奮，仲叫我『王 sir』，別人看在眼裡，總覺得『呢個明星唔係撈』。所以，唔該當我普通人，我仲要搵食。」

早前於澳門金沙舉行演唱會，反應不俗：「我最想同張學友 crossover，唱中文 jazz！」

 

早到兩小時，於訪問前做多次「 Instruction flight」：「儲多啲飛行時間，經驗愈多愈易搵工作機會。」