究竟當《北斗之拳》Crossover《無雙》會擦出甚麼火花？呢隻《北斗無雙》新作會為大家提供答案。《北斗之拳》漫畫原著本身已經多Fans，今次Koei為咗省靚招牌，仲改進咗個遊戲系統，出得晒原著中嘅奧義外，仲可以將嘍囉打到爆頭、噴血、爆肚兼斷肢，係史上最暴力嘅《無雙》！
事實上《無雙》系列，尤其係三國同戰國都已經打到有啲悶，跟其他漫畫、動畫Crossover都係遲早嘅事，咁啱《北斗之拳》之前在網上被選為最想「無雙化」嘅遊戲，結果一拍即合，難怪遊戲未出，玩家已熱切期待。 從1983年開始連載嘅《北斗之拳》，早在紅白機年代已經出過遊戲版，不過到咗今次《北斗無雙》時，就更能表現出原著故事同角色設計嘅精髓，亦唔會出現如《三國無雙》般畀過百名卒仔圍住嘅場面，打大佬時更要玩隻揪，唔使再受到無謂嘅騷擾。當打到大佬剩番少量體力時，只要睇住畫面上的指示準確輸入指令，就可以使出如同原作一樣嘅華麗連續攻擊招式，似足睇動畫電影。遊戲本身仲設有「傳說篇」同「幻鬥篇」，前者跟足原著故事，玩家操控拳四郎打生打死，最後同雷奧對決；至於「幻鬥篇」就可以任用其他主角四圍撩交打，想點玩都得。 《北斗無雙》動作設計上都算係《無雙》系列嘅一大突破，之前幾代都係狂按狂劈，今次就多咗「花臣」，可以捉起嘍囉狂毆，亦可以將對手掟出去，打人時更會打到噴血、爆頭、腸穿肚爛甚至斷肢，雖然呢種血腥暴力玩法早在同類動作遊戲中出現，但係以《無雙》系列嚟講就係第一次，由此可見Koei終於肯同世界接軌。《北斗之拳》漫畫內每位角色都有大量「傳承奧義」絕招，要學齊嘅話就要在戰場上打嘍囉儲經驗值，然後跟自己喜好嚟修煉，相信各位Fans為咗學晒所有奧義，就算要打多幾次都冇所謂。 由於日圓匯價一直高企，搞到《北斗無雙》今次來貨都好貴，好似有行貨返嘅Xbox 360版都要定到$549，比起一般三百多元嘅遊戲定價貴一截；而且送金屬卡片盒及漫畫造型嘅「初回特典」版仲炒過$700，係近期聲勢最大嘅遊戲作品。 類型：動作 開發：Koei 平台：Xbox 360、PS3 日期：3月25日 售價：$519（Xbox 360）、待定（PS3） 查詢：2725 3338
雷奧
拳四郎
華麗招式 跟足原著
拳四郎等角色造型都好忠於原著，Fans應該收貨。
一樣可以在遊戲內使出原著中嘅招式。
傳說篇中將重現多場經典對決場面，畫面都幾震撼。
噴血爆頭 掟人狂毆
北斗道場等場景設計都好有氣勢。
遊戲都表達到「一騎當千」嘅場面，係角色行得冇以前咁快，嘍囉亦冇以往咁多。
可以抽起敵人再狂毆，係今集嘅新設計。
遊戲炒味
拳四郎使出「無雙鬥舞」時會爆衫，型到震！
《北斗無雙》仲有出「寶箱特典」，送配樂CD、插畫同收錄咗拳四郎「呀打打打打」叫聲嘅鬧鐘，不過唔知香港會入到幾多貨。
機檔案
留言列表
