陳奕迅（ Eason）瘋魔全城的 18場紅館騷上周六開鑼，但他首場已感冒聲沙，前日帶病舉行第三場個唱，卻不幸撞正沙塵暴襲港，空氣污染指數爆標，令其狀態更趨惡劣，甩嘴、咳嗽且頻頻走音，雖然他硬撐開騷，但觀眾及網民俱擔心他不能在緊接舉行的餘下 14場個唱中回復水準。 Eason的經理人陳家瑛昨承認他因病及受空氣污染影響失準，需注射類固醇針，但他仍會瞓身演出。

其他娛樂名人影片

陳奕迅上周開騷前已出現感冒病徵，周六晚（ 20日）他帶病為一連 18場的紅館演唱會掀開序幕，未能以最佳狀態上陣的他聲沙及多次甩嘴。前晚他硬撐舉行第三場個唱，雖則獻唱賣力，但依然頻頻失準，聲沙、走音兼甩歌詞，令 fans大為心痛。昨晚他繼續頂硬上演出第四場，但餘下 14場能否狀態回勇，令已買飛捧場的 17萬觀眾甚為關注。

放大圖片

肥陳帶病開騷依然 natural high，自爆體重 177磅，企硬唔減。

放大圖片

安哥環節 Eason只唱了兩首歌，苦笑謂要趕返家爭取休息。

靠打類固醇開聲 放大圖片

Eason靠打類固醇針硬撐開騷，但卻出現輕微口腫面腫的副作用。

連日 Eason狀態有跌冇上，除了感冒底外，也因本港受沙塵暴影響，全港各區空氣污染指數爆晒燈，結果令他的氣管更不適，其經理人陳家瑛昨日接受記者訪問時在電話中說：「 Eason有感冒同少少哮喘，加上呢幾日空氣指數咁差，佢氣管唔舒服，每日要打類固醇針。其實佢已經好搏命做好個騷，但有病都冇辦法，佢都會繼續努力做落去。」陳家瑛提到的類固醇針，有「開聲針」之稱，不少歌星因喉嚨聲沙問題，開騷前都會要求注射，不過因注射類固醇有副作用，例如有些人會口腫面腫，故事前必須徵求醫生意見。前日本港 14個監測站的空氣污染指數均錄得 500的爆標指數，紅館外的天空一片灰濛濛，場內的 Eason滿面病容，雖已打開聲針，奈何仍多次走音，唱高音位危危乎，其間他還拎開咪高峯咳了幾聲，狀態見底的 Eason在台上說：「聲沙，唔舒服。」他直認自己確非處於最佳狀態，但會盡力表演，讓觀眾看到他的誠意。不過冒着聲爛危機大唱大跳的 Eason還是有點蝦碌，幾度唱錯歌詞，如開場不久他唱《囍帖街》，至中段副歌「等不到下一代，是嗎？」唱錯成「終須會時辰到，別怕。」他自知將歌詞及高低音調亂，即呢喃將該句唱多次補鑊；唱《天下無雙》時，又將「眷戀」唱錯為「轉戀」，他自言自語說：「眷戀，轉戀，唱咗國語㖭。」

「要返屋企休息呀」 放大圖片

香港前日空氣污染指數爆標，紅館所在的紅磡區被沙塵遮蔽，能見度極低。

前晚的個唱於 8時 45分開始，約 11時 15分結束，綜觀全場演出， Eason唔錫聲獻唱，加上個唱不設嘉賓，他由頭撐到尾十分吃力，所以觀眾及低調到場的 Eason嫂徐濠縈、蔡一智、藍奕邦及 HotCha等俱加倍打氣支持。至開騷後半段， Eason演出轉趨穩定，還嘲諷許志安搞氣氛，他笑說：「啲人成日話演唱會減肥，我 177磅，肥咪肥囉，做完演唱會就瘦 o架啦，好似許志安咩。」之後他擺動身體扮安仔聲線唱《迷糊、情慾、對象》，然後說：「肥都可以唱啫。」逗得觀眾大笑。到安哥部份 Eason僅唱了兩首歌，並再度示意唔多掂，苦笑謂：「唱完呢首真係走啦，要返屋企休息呀。」採訪：丁寧

一網講盡：網友憂 Eason變毓民

全城熱捧陳奕迅開騷， 18場演唱會一票難求，但前晚唱到第三場他的聲沙問題已相當嚴重，不少網民睇騷過後均擔心偶像不能撐下去。

Him10：真的令人有點失望，佢把聲係好拆，高音好多上唔到……有咁多場真係要搞搞佢！csonbig：好驚，今次買飛入場都係驚佢冇下次，好驚，今次都捱唔到， Eason家把聲起碼要休息一年！fatho1016：音樂一靜，就會聽到 Eason把聲好沙，例如《陀飛輪》、《約定》、《囍帖街》呢啲。著名藝人：唱至尾場，到時 Eason把聲應該會同毓民一樣。翻版陳信宏：我建議搵 Alan Po（ Mr.主音）喺幕後代 Eason唱。資料來源：香港討論區、高登討論區

娛樂資料庫：聲沙歌手腰斬個唱

陳奕迅在感冒和沙塵暴的雙重打擊下，能否支撐漫長的演唱會仍是未知之數，但過往不少歌手曾因聲沙問題取消演唱會。

放大圖片

張學友

張學友　事件： 07年在紅館舉行一連 18場「學友光年世界巡迴演唱會」，尾場時因喉嚨不適，臨時取消演出，大批歌迷在場外鼓譟，更驚動警方到場。

放大圖片

徐小鳳

徐小鳳　事件： 05年復出在紅館舉行「金光燦爛徐小鳳演唱會」，至第七場時因喉沙及身體不適，無法再唱下去，決定腰斬當晚的演唱會，在台上向近萬名歌迷致歉。

放大圖片

米積加

滾石樂隊　事件：原定 06年 8月在西班牙南部巴利爾多利德舉行演唱會，後來因主音米積加（ Mike Jagger）喉嚨發炎而被迫取消開騷。資料來源：《蘋果》資料室

小八卦：唱歌教正字 放大圖片

陳奕迅有唱錯歌詞前科，在《天下無雙》中將「不削」唱成「不肖」，今次他卻憑新歌《陀飛輪》翻身，當唱到「蕭邦的雋永」時，他將「雋」唱成「吮」，初時令人懷疑他又唱錯音，不過翻查粵音字典，「雋永」的確可讀作「吮永」， Eason今次可謂一雪前恥。


Eason前晚舉行第三場演唱會，在感冒與空氣污染兩面夾攻下聲沙及多番走音，但仍落力又唱又跳。資料圖片
謝安琪恨睇 Eason

曾與陳奕迅傳緋聞的謝安琪，昨日以宣傳大使身份在跑馬地出席《救亡 16度 Part II》首播會。她透露剛自內地探訪回來，稍後又要到內地參加頒獎禮。對於徐濠縈表示歡迎謝安琪往看陳奕迅演唱會，又謂不介意老公唱《囍帖街》，謝安琪說：「我知佢都有唱其他人嘅歌，我未去睇，有時間都想睇，但一睇就好麻煩，因為好多人想黐我一齊去，為咗避免順得哥情失嫂意，我寧願唔去。」談到田亮和鄭希怡日前在南京酒吧遇襲，謝安琪說：「我冇試過呢啲情況，做完嘢我就返酒店。」並指其夫因此不會為她擔心，她續說：「佢知我唔應酬，唔去危險地方，咁大個人識照顧自己。」採訪、攝影：胡比


謝安琪謂有很多人想跟她去看陳奕迅個唱。

謝安琪唔敢帶親友睇Eason

謝安琪（Kay）昨日出席《救亡16度Part II》首播午宴會。對於徐濠縈開口叫她去欣賞陳奕迅個唱，Kay表示：「係咩？我知道阿徐仲同大家講，話Eason唱我首《囍帖街》，大家唔好大驚小怪添，我好同意呀。」Kay表示若有時間會前往欣賞，並自爆：「好多親友叫我捧場時帶埋佢哋入去，但我驚順得哥情失嫂意，所以暫時唔去住！」

Kay老公張繼聰昨日在另一活動上，被問到是否避忌而不捧Eason場？他說：「梗係唔會，自己都好想去睇，但佢一票難求！」記者指Kay踢爆他不會去捧場，張繼聰即說：「有飛就一齊去，好彩Eason開咁多場，希望有期可以睇。（會唔會叫Kay問公司攞飛？）我只係知道啲飛唔多，我自己都好支持佢o架，佢係樂壇中流砥柱。」

Kay坦言若有時間，會去欣賞陳奕迅演唱會。