李曼筠（動漫 Maggie）噚日喺鰂魚涌接受網上電台訪問，馮仁昭發現佢下巴左邊有撻瘀傷，左邊鎖骨位又損咗有條紅痕，隱約見到佢右邊大髀都有撻瘀痕，不過佢就着住黑色絲襪遮住。問佢發生乜事？ Maggie即刻好緊張咁用手遮住自己個下巴，跟住話：「唔記得啦！女仔要保護自己。」Maggie之前都學過幾個月功夫，似乎保護唔到自己喎！點知佢九唔搭八咁話：「女仔識功夫唔代表唔受傷，我俾貓親、發夢俾人打、前幾日去鬼屋拍節目冇拜神，今朝起身發現有呢啲瘀傷，唔掂都唔會痛。」
放大圖片 
噚日李曼筠現身時，面到腳都有瘀傷，只係佢着咗黑絲襪遮住大髀瘀痕。
放大圖片 
Maggie下巴位同鎖骨位嘅瘀傷（紅圈示）好明顯，睇見心都寒。
「承受唔到呢種痛苦」
因為 Maggie表面嘅瘀傷實在可疑，加上佢九唔搭八嘅解釋很難令人信服，希望佢唔係俾男友打啦。問佢係咪拍緊拖？ Maggie話：「冇，我承受唔到呢種痛苦，就算拍拖係開心我都唔想要。」再問佢係咪俾人打？佢繼續亂噏：「可能練功整親，有好多可能性，女仔要練功夫防身，瘀傷好小事，可能煮嘢食揸刀整親。」再追問 Maggie係咪俾人暴力對待，如果係點解唔報警？佢先至肯答：「唔係今日發生，唔想搞大件事。」一時又話今朝發現瘀痕，之後又話唔係今日嘅事，唔知邊句真，見 Maggie接受訪問時個樣好慘咁，點知佢一影相，又擺出鬼咁開心嘅表情，真係服咗佢。 
Maggie樣唔差身材好，曾經擄獲唔少宅男嘅心。資料圖片
全站熱搜
留言列表
