若說斯里蘭卡香料農夫借大耳窿跟香港的你有關，別以為我黑心詛咒。諗真啲，閣下吃的用的穿的，統統是農民工人的血汗成果，惜中介人賤價買貨，換言之香港人消費時亦有份參與剝削！公平貿易近年經組織積極推廣，有 90後買產品又做義工，成為朋友家人的教育大使。記者：蔡俊業攝影：楊錦文、周旭文、蔡俊業
一分貨換一分錢非必然 放大圖片 
■產品上有「 Fairtrade」標籤，以資識別。
「公平貿易」（ Fair trade）並非新興社會運動，最遠可追溯至五十年代的歐洲，當時英國及愛爾蘭的樂施會，在旗下專賣店出售由在香港的內地難民所生產的手工藝品。直到 1967年，全球首家公平貿易產品進口組織於荷蘭成立，繼而首家「公平貿易商店」於兩年後揭幕。此概念在地球兜了幾十個圈， 2002年終落戶香港，樂施會及「香港公平貿易聯盟」剛於上周五一連三日舉辦「公平貿易嘉年華」。「『公平貿易』係幫助一班來自發展中國家嘅農民同生產者，得到合理回報！」原來一分貨換一分錢非必然，樂施會倡議幹事溫子雁（ Charlotte）直言，這班「弱勢社群」就算出賣勞力依然難得溫飽，只因他們面對無數貿易壁壘，「例如富國對自己國家嘅農民或企業有補貼，或者係傾銷，令佢哋嘅產品喺國際市場上無競爭力；另外有中間人嘅剝削，就算佢哋付出好大努力，都得唔到應有回報，仲會越做越窮！」 Charlotte以種植咖啡豆的農民為例，很多都無法收回成本價，按四年前的國際價，咖啡農要以每磅 0.6美元（約$4.7港元）出售方能收回成本，「但 2001年試過低見每磅 0.4美元（約$3.1港元）！」她說，這種情況之所以出現，因為當地只得一個咖啡豆收購商獨大，農民為免無收入只好屈服。 09年她到斯里蘭卡，探訪一戶香料世家，「呢對老夫婦住得好偏僻，自己無車運啲香料去市集賣，由於全村只得一個中間商人收貨，無得揀，焗住賣，無議價能力；就算當地政府有報價，中間人根本唔會跟，搞到佢哋入不敷支，仲要問大耳窿借錢。」
放大圖片 
樂施會倡議幹事溫子雁
放大圖片 
■公平貿易組織以較高價錢購買可可豆，以保障農民生計。
放大圖片 
■公平貿易稻米
放大圖片 
■公平貿易棉花
自己上腦再推銷 放大圖片 
■ Logan去年曾到印度實習。
鄭兩湖（ Logan）， 21歲，現時在港大經濟及金融系就讀三年級，事前對公平貿易毫無認識。直至去年參加學校通識教育部主辦的實習計劃「 Project See」， Logan的目的地為印度，到一家名為「 Kuprkabi」的 Design Studio實習，擔任 Marketing Trainee，為期半年。 Logan謂，這機構的業務範疇包括和非政府機構合作，以「合理價錢」出售手工藝品，保障生產者收入。因為工作需要，他經常要到貧民區接觸家庭主婦，令他親身體會到「公平貿易」的好處：「你有無睇過《一百萬零一夜》？佢哋嘅居住環境係同套戲差唔多，呢班 slum women平時都係打掃同煮食，無收入，而丈夫因為 income level太低，連小朋友都無錢返學。我哋組織就向呢班婦女提供工作機會，因為佢哋好多都識整印度薄餅，對手好 refine（精煉），就叫佢幫手做陶瓷珠鏈，咁佢哋就有收入供小朋友讀書。」回港後他到售賣公平貿易產品的「公平棧」當義工，「呢個決定對我嘅轉變真係好大！」他說做義工期間，以推銷員身份向消費者直接推廣公平產品，連帶朋友後來亦成為目標，「我本身讀 marketing，覺得最有用就係同朋友嘅 personal interaction，同佢講，啲（公平貿易）朱古力好好味，好過廣告入面講一百次，因為你自己試過，有 creditability同埋信任！」
嫌公平產品未夠 放大圖片 
曾淑雯
同樣是 90後的曾淑雯， 21歲，生於馬來西亞，去年暑假參加港大的實習計劃，遠赴孟加拉的公平貿易組織 ECOTA Fair Trade Forum實習，過程中發現很多公平手工製品都是銷向歐美為主，「好似孟加拉呢類南亞國家就係屬於 produce market，因為孟加拉人無錢買公平貿易產品，令我意識到點解亞洲唔可以自己創造一個消費市場？因為亞洲消費者對公平貿易嘅意識好低，就好似馬來西亞根本無咩人知道咩叫 Fair Trade，但其實喺亞洲嘅潛力可以好大！」她實習回港後開始做義工，亦在學校經常參加公平貿易組織「 Fair Trade Voice」的活動。那麼在日常生活中有沒有盡量使用公平貿易產品？她笑笑口說，「我都係一般的消費者，覺得市面上嘅 Fair Trade產品唔夠，同埋價錢都係一個問題。好似朱古力咁， 100g大約三十幾蚊，但出面就賣二十幾蚊！」談到價錢貴，淑雯說一來是因為要向生產者支付合理價錢，二來是產品是有品質保證，「品質和價值是高過一般產品，呢個係好多消費者唔明白或認識不足嘅地方。」 Logan解釋，「因為生產者要面對剝削，收入連基本成本都抵唔番；但公平貿易保障收入，農民有多啲資源，例如用少咗殺蟲劑，改用較優質物料去種植，所以質素好好多！」
支持者說 放大圖片 
■黃耀明：「以前真係行好遠先買到，但家賣嘅產品同埋銷售點都多咗，證明呢類產品有需求，同埋開始有大機構都參與嚟吸引消費者。」
放大圖片 
■盧凱彤：「公平貿易加強咗我同朋友嘅購買慾。譬如一樣禮物就咁喺街見到我唔會想買，但知道佢係公平貿易嘅產品，就算唔係買畀自己，都會想買嚟送畀人！」
放大圖片 
■鄧小姐花$240買了麻布袋：「我覺得公平貿易呢個概念幾好，幫番真正有需要嘅人。喺我負擔得起嘅範圍內，貴少少都無所謂。」
放大圖片 
■林小姐花$10買豆漿：「有啲公平貿易產品貴成倍，好似即冲朱古力。我未完全投入都會畀錢買，因為如果貴幾蚊，例如餅乾貴十蚊對我嚟講都可以支持。」
嘉年華人氣勁 放大圖片 
■上周在奧海城舉行的「公平貿易嘉年華」，以售賣食物的攤位最人氣。
放大圖片 
■擺放孟加拉製麻布袋的攤位吸引不少女學生選購。
放大圖片 
■由智利運過來的 Rain Stick，堪稱全場最多人留意的產品。
放大圖片 
■公平貿易產品種類越來越多，包括公平稻米。
公平產品 放大圖片 
■（左） Divine 85%黑朱古力$33、（右） Divine 70%野莓黑朱古力$38（ a）
放大圖片 
■（上）有機茉莉花茶$25、（下）有機伯爵茶$25（ a）
放大圖片 
■ Nabali Tree橄欖油$98（ a）
放大圖片 
■有機豆漿（無糖、黑糖）$10/250ml、$15/500ml（ b）
放大圖片 
■（左）公平貿易天然海鹽$25、（右）有機黑糖$35（ b）
放大圖片 
■縫上印度傳統服飾 Sari布碎的麻布袋$90（大）、$65（小）（ c）
a.公平棧（葵涌葵喜街 13-29號永恒工業大廈 1310室/2805 2336）b.饗璫璫雜貨店（銅鑼灣鵝頸街市北座一樓 NM131/6013 6628）***28/3開幕c. Global Handicrafts（屯門青山公路 2號國際十字路會/2272 9333）
公平貿易 Q&A
Q：記者 A： CharlotteQ：公平貿易主要幫助哪些人？參與的農民會受到哪些保障？A：主要幫助發展中國家的農民、工人及生產者，以高於成本的價錢賣出產品；此外，負責購買產品的合作社亦需要額外多付一筆「社區保證金」，協助農民等興建社區設施。Q：如何得知公平貿易機構的誠信及來歷？A：現時主要有兩套認證準則：一是針對商品，負責收購的中介機構須向「公平貿易標籤組織」申請成為持牌人，當中需要符合多項條件如沒有僱用童工、不使用殺蟲劑等；二是針對手工藝品，負責機構須向「國際公平貿易協會」申請資格，條件與前者相同。Q：公平貿易產品包括甚麼？A：本港以食品及手工藝品為主。前者如咖啡豆、茶葉及餅乾等，近年亦開始出現紅酒、豆腐、豆漿；後者則包括手織布袋、木製品及蚊怕膏等。近期市面上亦開始出售公平棉花製造的 T恤。Q：為何公平貿易產品價格偏貴且供應少？A：因為要向農民及生產者支付高於成本的價錢，但假如需求上升，按供求定律售價將有下調空間。 
留言列表
