地點：東港城／時間：3月7日

自從《溏心風暴》開始，陳豪原來都演得嚟喜劇，並唔係以前做電影人時嗰個惡死奸人樣。今次無綫新劇《秋香怒點唐伯虎》，口碑認真唔錯，辣妹都係陳豪迷，扭開電視見佢神高神大喺度扮鬼扮馬，都的確笑得幾冧。

早幾日成班《秋香》演員喺東港城晒冷做宣傳活動，個個着晒古裝扮相喺度行商場，淨係個場面都已經夠笑爆嘴。後來辣妹走去同迷死人嘅陳豪傾偈，佢同辣妹講，今次拍《秋香》，雖然唔係咩動作戲，但係就成日俾人打！咁當然，打陳豪嘅人，就梗係唔係其女密友兼打女廖碧兒喇，而係劇中嘅陳法拉同胡杏兒。事關陳豪會週旋於兩女之間，大搞三角關係，所以就頻頻招惹毒打，尤其是陳法拉，喺拍劇嘅時候，仲曾經試過NG十幾次，即係豪哥被法拉狂摑十幾次，真係戥碧兒心痛。

面對住兩個絕頂靚女，陳豪不但只冇乜纏綿戲，仲要經常捱打，不過陳豪都死剩把口，話佢兩個咁鬼粗暴，簡直係古裝版港女喎！嘩，又唔好咁講呀，港女最多都係諸多挑剔，好少動粗?，係嘛，碧兒？


陳豪呢個冧爆迷暈樣，扭盡六壬，換咗隔離兩位靚女得個笑字，所以話情人眼裏出西施，冇呃你嘅。


兩男一女就話得個「嬲」字啫，兩女一男原來唔係享齊人之福。就憑呢張相，各位男士，都係唔好包二喇。


監製劉家豪（左）同坐正嘅陳豪隔離有傾有講，呢啲叫咩呀？咪就係叫「坐正」囉，陳豪。


嘩，忽然拉開杏兒張相，麥包咁樣嚟陰李思捷。思捷，你好應該真係咀落去，懲罰番麥包嘛。


所以話，啲後生仔真係唔識世界，你睇黎諾懿咁樣整法拉，因住第時去唱K，冇折扣不但只，仲要加十添呀陰功。


胡杏兒講明今次《秋香怒點唐伯虎》，真係只有「怒點」而冇「露點」。唔係挂，咁都要解釋？

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄