今年圈中喜事一單接一單，繼一班中女郭羨妮、莫文蔚，好勝Gigi及陳貝兒後，下個月洪天明亦會與周家蔚先註冊後補擺喜酒，原本今年亦想加入老襯行列的范振鋒，因撲唔切酒席，要改到明年1月15日，才可以做老襯，迎娶李思欣！娶老婆冇得慳，Ricky（范振鋒）已一擲七十多萬在金鐘萬豪酒店筵開50圍，禮金28萬，加上訂埋過大禮的套裝、姊妹裙等濕星數，100萬埋單冇走雞！


范振鋒與李思欣，在去年除夕夜出席新城倒數活動邂逅。原來，范振鋒暗戀李思欣多年，為攞女方電話，不惜推掉搵錢騷。之後，范更借頭借路，請李思欣上他的清談節目，乘機問女方感情狀況， 攞料後知道女方單身，即刻食住上約會伊人，打鐵趁熱拍拖閃婚。日前，兩位準新人到尖沙嘴百利商場，在「結婚易」訂過大禮物品。甫入店內，Ricky見到痰罐、金色洗面盆，即好奇問店主︰「乜過大禮要用呢兩樣？」店主話兩樣都是寓意生仔的好意頭，最後男家買了個688的套裝，裏面包括龍鳳餅、椰子、京果及扁柏等，還買了紅睡衣拖鞋，總之就要鴻運當頭。

狼狽情人節
兩人正式拍拖是今年二月，首個情人節亦過得特別難忘，Ricky笑笑口話︰「我又花又禮物，book咗 山頂outdoor 餐廳食飯，一心諗住好浪漫，點知嗰晚又大風又落毛毛雨，餐廳搭晒紅色密封帳篷，好狼狽。佢仲俾驚喜我——送條毛俾我，乜都冇呀！」思欣發嬌嗔︰「嗰陣啱啱一齊，冇諗過要送咩。」思欣更坦言因唔識製造浪漫，遭男友投訴。潮流興閃婚，差不多四十的范振鋒原來一早已有成家立室之念。拍拖近三個月，Ricky有次在電話中向女友透露想結婚，原本只是探口風，Ricky大女友話：「你應該冇咁快諗結婚啦！」但她竟出乎意料回應︰「點解唔得 ？」Ricky求婚就係咁簡單！思欣亦話︰「本來冇諗過咁快，由拍拖到依家，差唔多日日都見，就算點忙，佢都會攝時間出嚟。我做呢行都好驚身邊嗰個唔知去邊？但佢令我好有安全感。」

禮金「易發」
講到閃婚，Ricky說要多謝未來岳父岳母加速這段婚姻。原來李思欣是現實版灰姑娘，凌晨未返家，父母便會奪命追魂call爆機，為免夜長夢多，Ricky惟有急急認頭︰「佢父母好緊張個女，直至談婚論嫁，佢至放心俾個女同我出夜街。」初時兩人閃婚消息傳出，以為他們奉子成婚，原來是男方想名正言順過二人世界。
準女婿瓣數多，搵埋唔少，但女方家長未有向準新郎開天索價要禮金，Ricky話禮金是盡力而為︰「總之六位數，係好意頭（係咪28萬？）咁上下啦！」思欣則話「都係意頭啦！」

李思欣密密拍
李思欣今年28歲，中學就讀名校庇理羅士中學。04年於演藝學院畢業，之後為無綫拍第一齣電視劇《四葉草2》，入行7年，至今為無綫拍了19套劇。

范振鋒瓣數多
現年38歲的范振鋒（Ricky），21歲入行當新城電台DJ及推出唱片。4年後離開新城到台灣學習幕後工作，之後回港發展飲食事業及擔任港台二台主持，與梁奕倫主持節目《熱血青年》同《倫住嚟試》。兩人曾組成了組合Double R推出唱片，可惜現已解散。范振鋒現於新城知訊台主持《新香蕉俱樂部》及《流行直播室》，亦在無綫收費台任娛樂新聞主持及節目《范後感》主持。早年他更與朋友開設了輝叔牛肉料理火鍋店，月入不下十萬。

百萬婚禮
「鋒思」婚，雖然獲得唔少贊助，替他們慳荷包及慳時間，不過酒席、禮金及雜項支出，埋單都要121萬。 萬豪酒店50圍約70萬禮金28萬兩卡鑽戒約20萬兄弟、姊妹服裝約2萬回禮禮物約1萬2千結婚用品約3千8 婚禮禮服贊助婚紗相及當日拍攝贊助餅咭贊助度蜜月贊助埋單：121萬5千8 ####


被記者笑問是否同居，范振鋒顯得相當尷尬，「你話呢？嘻嘻‥‥我哋啱啱搵咗間新屋準備搬入去，會同埋我媽咪住，嚟迎接結婚嘅大日子。」呢個心心咕同龍鳳被婚前都用得着。


范振鋒對於印有「囍」字的痰罐相當感興趣，思欣則笑說：「你唔聽話，就罰你頂痰罐，哈哈！」


思欣為未來老公揀睡衣，未婚已一副賢妻相。


范振鋒去年在除夕的倒數活動，問李思欣攞電話，正式展開追求。


李思欣與楊秀惠拍《四葉草》認識，老友鬼鬼，姊妹團當然少不得她，另外，還有陳思齊及梁家琪等。


李思欣及范振鋒的禮服，由法國婚紗贊助，慳番唔少。《蘋果日報》圖片


李思欣今年5套劇集出街，包括《仁心解碼》、《Only you 只有您》、《洪武三十二》台慶劇的《萬凰之王》及《結·分@謊情式》，無綫鬧花旦荒下，升上二線姐仔位置。


思欣在《公主嫁到》一劇中，五公主形象深入民心，拍攝當日，有唔少途人見到佢即嗌：「五公主呀！」


《壹本便利》圖片


年年新城大騷或頒獎禮，Ricky都是司儀鐵膽。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄