Battlefield 3 荷李活戰場　《 BF3》打真軍 @ 明星靚相大分享☆

荷李活戰場　《 BF3》打真軍

一名海軍陸戰隊員，接到任務到中東調查生化武器，後來事件演化成美俄戰爭，引發核彈危機，導致 8萬人死亡！呢類美式嘅荷李活橋段，實情係最新射擊遊戲《 Battlefield 3》單機版劇情。該系列等到戰爭迷頸都長，今集畫面以及物理現象逼真到嘔，恍如親身落場廝殺！記者：陳國輝

爆炸物理現象逼真放大圖片
■今集新加入空戰元素，俾你揸戰機。

■今集新加入空戰元素，俾你揸戰機。

個人覺得，玩 FPS的最高境界係要投入戰爭氣氛，好似爆炸、槍林彈雨等模擬環境，效果越逼真就越正！今次，《 Battlefield 3》特別以次世代遊戲引擎 Frostbite 2來開發，大幅提升咗模擬真實嘅情景。例如遊戲開始喺地鐵車廂內，一陣冷光打落槍械上嘅感覺，就叫人真假難辨；而更絕嘅係，當戰鬥機喺濃雲密雨間飛過嗰陣，由機艙往外探，你會見到雨點撞擊機身時造成嘅水花，電影感好豐富。當然，戰爭時嘅物理效果才最值得欣賞。當你擲下手榴彈，一般 FPS遊戲會喺牆上炸咗個大窿，甚至乎會整幅牆倒塌；但喺《 BF3》，則會出現一連串爆炸後產生嘅連續物理現象。首先在爆炸點上碎石四飛，然後周圍嘅大石、玻璃等相繼會倒塌和爆破；最後，濃煙、塵埃就開始籠罩整個爆炸範圍。睇落勁複雜嘅效果，原來不過喺幾秒內發生，可見製作認真得緊要。

放大圖片

畫面細緻驚現手毛放大圖片
■一座建築物由零到爆炸後嘅物理效果，超真實！

■一座建築物由零到爆炸後嘅物理效果，超真實！

除咗可模擬真實嘅物理環境，《 BF3》喺畫面細緻度方面，也作出大幅提升！例如不同槍械嘅金屬質感，損耗以至刮花等痕迹，繪畫得相當精細；另外，士兵所穿嘅手套、衣服等布料，亦好講究；而最搞鬼係，連鬼佬嘅手毛都能夠清楚睇到，仔細到有啲誇張！不過，要讚係佢仲將《 FIFA》系列用嚟處理球員外貌嘅系統，也搬到《 BF3》，令到士兵們嘅面貌不至於成條喪屍咁木口木面，更似真人。《 BF3》分別推出 PC、 PS3以及 XB360三個版本。有網民就讚， PC版畫面最精美，尤其選用特效嗰陣，畫面靚到好似睇 1080P電影咁，無得彈！但佢哋又批評， Console版只係達到中至低效級數，更隨時係左 Cut右 Cut之後再落到家用機，所以效果肯定無咁正！另一方面，網友亦大讚 PC版最多可 64人同時 Online，相反 Console則最多容納 24人，但係想約埋一大班 Friend齊齊廝殺，應該夠晒有突！

放大圖片
■窺探瞄準器，你仍可清晰睇到前面狀況。