楊千嬅日前着上透視裝，露出白滑背脊，佢仲好有自知之明，表明胸前唔偉大，費事獻「細」！佢想大嘅，一係隆，一係嗱嗱聲大肚咪得囉。努力啲啦千嬅，媽咪姐都希望見到你佗B。
官恩娜出席珠寶活動時，表示絕不要求男友送鑽飾，寧願自己賺錢買，唔做金絲雀，唔鍾意靠男人。傻妹嚟嘅！男人買首飾俾你，係錫你嘅表現之一。如果一個女人冇收過男人送嘅首飾，反而仲唔馨香。
女友陳茵媺喺《法證先鋒3》性感露bra，陳豪大方表示唔介意，仲賣花讚花香：我俾一百分佢！依家一百分，咁將來咪要俾二百分先夠。喂，口甜舌滑都要有個譜先得！
莊思敏得緋聞男友林忠豪以五百萬新車接送，不過佢不受名車誘惑：車係用嚟代步，揀男朋友係講人品。唉，你估個個都有人品㗎咩！冇人品至少有架名車，好過兩樣都冇吖。
黃宗澤早前自爆唔見咗女友胡杏兒所送、價值十萬蚊嘅鑽石耳環，但杏兒竟踢爆耳環根本唔值十萬。難怪黃宗澤冇癮呻爆，女人真係口疏！唓，係你老作在先嘅，邊怪得人。下次佢想充闊佬的話，先同杏兒夾定口供，咁咪唔會出事囉。
跟超雲拍拖嘅人往往成為追訪對象。身為超雲過氣男友嘅王大業自言與傳媒關係好，亦未遭寫衰過，呢啲嘢要睇人！咁又係，好人好姐讚都讚唔切，係嗰啲賤男先容易被寫衰啫。 ####
文章標籤
全站熱搜
留言列表
