電視有正嘢
宮廷劇收得，無綫食住條水，開多套被譽為《金枝慾孽》加《宮心計》混合版嘅《萬凰之王》。
《萬》乃無綫今年壓軸台慶劇，內容聚焦喺清朝道光皇帝嘅後宮暗戰。主角胡杏兒今次收起冏樣，飾演奸到出汁嘅皇后佟佳沅宛，為咗爭寵，不斷出毒招陷害宣萱飾演嘅全妃，而宣萱為自保亦出招抗衡。兩人為要成為「萬凰之王」展開明爭暗鬥。
雖然有傳《萬》劇開拍無耐，宣萱發覺胡杏兒嘅角色比較搶戲，怕自己輸蝕，曾多次向高層詐型，可惜高層無反應，於是視胡杏兒為眼中釘。情況孰真孰假，姑且聽住先。但喺《萬》劇入面，兩個確係死對頭，為求上位，鬥出毒招，務要整死對方為止。
後宮惡鬥連場
凡以女人為中心嘅戲，都離唔開爭寵同互相陷害，而《萬凰之王》入面一班女人，爭寵手段比《金枝慾孽》嘅如妃、《宮心計》嘅麗妃狠十倍。故事嘅開始，係講道光皇帝旻寧（陳錦鴻飾）正籌劃冊立沅宛（胡杏兒飾）為孝慎皇后之際，另邊廂嘅皇太后扎拉芬（黃淑儀飾）正強迫鈕祜祿伊蘭（宣萱飾）為大皇兒殉葬。旻寧為保大嫂性命，不惜放下冊后大典一事，趕往相救，並破格將伊蘭納為妃子，令沅宛懷恨之餘，後宮亦由此激起連番爭寵惡鬥，令旻寧疲於奔命。伊蘭因為得到道光寵愛而游走於眾勢力之間，更成為皇后心中大敵。最後不甘命運受到擺布和迫害，決心棄善行惡，將自己變成一個心狠手辣嘅女人。
播映日期：10月31日起 周一至周五晚8:30pm 翡翠及高清翡翠台 ####
我步步後退，你卻步步進迫。（劇中對白）
一開始，我兩個就勢不兩立！（劇中對白）
胡杏兒飾演嘅沅宛，好勝心強，而且氣焰迫人，對伊蘭（宣萱飾）心存嫉妒，處處迫害。惟伊蘭亦唔係省油嘅燈，心計之高，令人防不勝防。
恭慈太后（黃淑儀飾），表面處事公正持平，實則老謀深算，從中挑撥沅宛同伊蘭嘅鬥爭，令道光疏於朝政，伺機讓細仔綿忻（陳山聰飾）奪權篡位。
沅宛受阿媽唆擺設局，欲令伊蘭流產，可惜東窗事發而被打入冷宮。
沅宛為穩坐「萬凰寶座」，喺道光面前扮作依人小鳥，實則機關算盡，甚至犧牲至親及至愛亦在所不惜。
芸妃（楊秀惠飾）曾為道光寵愛妃子之一，但因偷賣宮中珍品而被貶為宮女，最後卻慘成為沅宛犧牲品。
為令伊蘭失寵，沅宛特意瞄準道光路過之時，向伊蘭挑釁，好讓道光目睹伊蘭掌摑自已。喺道光責難下，伊蘭百詞莫辯。
留言列表
