浪客劍心劍招注入山口魂
有時玩具嘅嘢真係唔可以「一本通書睇到老」，因為出其不意嘅事往往會失驚無神發生！好似出開機械人嘅「Robot魂」系列，都無端端出咗多啦A夢、專門推出女形Figure嘅Figma又話出宇宙騎士，山口式都唔執輸，打孖推出《浪客劍心》嘅緋村劍心及緋村拔刀齋，仲係由山口勝久親自操刀設計，為咗展現原著中「飛天御劍流」嘅劍招真髓，大膽將劍心全身以機械式分割構成，最初睇成個機械人咁，但玩落又幾盞鬼喎！
新款造型握劍自然
以往嘅人物Figure多數交由Figma系列推出，今次嘅山口式劍心造型就認真大膽，將着住武士服嘅劍心，如同機械人般斬件、再植入Ball Joint組合，初初睇可能唔多慣，但當你拗腰擘腳擺甫士時，就發覺容易得嚟又幾有氣勢，傳神做番飛天御劍流嘅各式劍招，賣相仲幾型仔呢！不過礙於山口式嘅獨特「八字腳」風格，令劍心未能轉擺拍埋雙腳嘅優雅站姿，而且髖關節稍嫌過鬆。好在為配合劍心嘅握劍動作，官方一改手腕大大個轉輪關節嘅傳統，換成可上下扭動嘅幼細榫位，而且專為握劍而設嘅造型手亦相當實淨，拔刀擋格嘅甫士相當順眼自然。
武士褲拆件有得坐
上述提及嘅關節特色，劍心同拔刀齋都一致共用，至於面相方面，拔刀齋有齊左、中、右三種怒目眼神角度臉孔換件，但劍心只得怒目斜視，夾唔到劇中凌空正面劈下嘅「龍槌閃」甫士，難免令粉絲失望。另一方面，為咗方便擺出休息坐姿，原來左外側武士褲腳可以拆件，不過右側就冇咁嘅Gimmick，擺坐姿有所限制。造型方面，兩者均算跟足原著，好似劍心左邊臉有十字刀疤，喺故事中被雪代芭刺傷所致；拔刀齋就只有一條疤，武士服就參考維新時期肅清餘黨嘅刺客配色。要數到最細心又原汁原味嘅塗裝位，就係劍心嘅配劍係「逆刃刀」，即係銀色刀鋒喺刀背上，反之拔刀齋用嘅係正常武士刀，大家開盒時要落足眼力喇。
Alfred
Revoltech No.109緋村劍心（右）、No.110緋村拔刀齋（左） 售價：$235/個
多得左邊褲腳外側有拆件Gimmick，可以擺到悠閒坐姿。
劍心嘅嬲樣面相只有斜視Look，爭咗個正面怒睥，好彩刀疤跟足原著比拔刀齋多一條，加番唔少印象分。
九頭龍閃！高速向九個方向發動斬擊，既快且密，令對手避無可避。
龍翔閃！刀鋒由下方向上抽，專攻擊敵人關節部位。
天翔龍閃！左腳踏前嘅終極高速拔刀術，劍心專用劍招。
龍巢閃！亂擊術嘅一種，以連環軟擊令對手忙於招架、無暇變招。
龍槌閃！靠腳力及腰力飛身彈起，再借勢向下劈，增加殺傷力。
留言列表
