記得我78年剛畢業回港，喺電台撈，食晏係一個大問題。當然冇畔溪（哈！而家畔溪都搬咗！），亦無樂富。要食晏要去到太子道「南天」，飲茶要去到愛民邨，食個爛鬼魚蛋河都要去到九龍城。原來我哋都比較幸福，因為有很多friends做garment，喺新蒲崗，觀塘返工，邊度有嘢食呀?!日日自己帶飯返工，真係除咗生日或者大節日，大家才會相約出去老尖。
觀塘嘅銳變！
當時大家都覺得觀塘係個鬼地方！就講10年前，仍然係好工廠區，不過已經開始有啲新大廈，Millennium和apm真係改變了觀塘很多production house都在觀塘，我拍《蘇Good》的廠亦在觀塘，所以很多時間會出入觀塘，一路睇住佢變，仲愈變愈快，唔去一個月又變咗樣!!!鴻圖道我成日都去做嘢，真係一個月唔去，乜對面有又間酒吧，又有間wine shop，街尾仲有呢間「Corner 90」，真不相信我對眼睛！半露天，那天有人包場，仲有band。不過好得意，離我張枱唔夠三呎，有兩個人企喺度等小巴！哈！
餐牌
噢！原來食西餐！睇咗一輪餐牌，都決定唔到食乜，於是問位經理有乜好食，經理話食印度嘢呀，我哋啲廚全部都係印度人，跟住經理反轉個餐牌，後面才是印度餐。第一個錯處就係，自己都唔知自己嘅強弱點，如果你主攻印度餐，咁咪一開餐牌就雞乸咁大講印度餐啦，就唔好將印度餐放後頁。第二，食完之後。根本啲西餐好普通，就不如主攻印度餐，還有一個說法。我問我production house啲人知唔知間餐廳食乜，無人講得出。這是個marketing上的大錯！
食物
我叫了個mushroom soup $58，朋友叫了個tomato basil soup $58，朋友的tomato soup還可以，但我的mushroom soup?口，水汪汪，我問經理，乜冇用cream做？他說我哋嘅mushroom soup唔係cream of mushroom soup，冇嘢講!!! tomato soup好番茄味，我嫌酸咗啲，我哋叫咗butter chicken $95，Lamb Vindaloo $98，Jheenga Suwa Hara Pyaz $135（咖喱蝦），Raitha $25，Plain Naan $18，butter chicken汁好食，chicken雪藏的。Lamb辣到飛起（我又唔食得辣的），汁好authentie。蝦又係汁好，好番茄。Naan唔鬆！Raitha係青瓜+yogurt，食咖喱太辣，Raitha好refreshing，但太稀，兩人食咗$578，貴！只不過係觀塘個新屎坑，外觀幾好而已！
Corner 90
地址︰觀塘鴻圖道90號地下
電話︰2344 4898
蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。 ####
答案︰觀塘
估吓間餐廳喺邊區？
留言列表
