Angelababy白色喱士綴銀珠片連身裙 Nina Ricci Showpiece for I.T 25th Anniversary
cover face
Angelababy跟得女友
隨住「𡃁模」一詞漸漸變質，始祖之一的 Angelababy，早就另闢蹊徑成功跳上大銀幕，拍住男友成為內地娛樂集團巨頭華誼兄弟旗下藝人，電影一部接一部，主角一個接一個，忙到沒影，消息每每傳來，皆是做到臥病見頭暈之類。
回到香港，一樣沒停手，拍攝當日，她要 8小時內連影 6本雜誌封面，仲有廣告、訪問，考驗最大，大抵便是其瘦剩一百磅唔夠的嬌軀；應驗了「財多身子弱」。
今年， Baby獲頒《第 13屆華語電影傳媒大獎》最受矚目女演員獎，
據講獎項由觀眾投票，足證她在內地頗吃得開。
年紀輕輕，事業、愛情，由冇變有，辛苦少少都冇計，「我食得鹹魚抵得渴。」
面對變幻娛樂圈，適者生存，擁有這種本能又發揮極致的，我認為箇中佼佼者，正是已躋身內地富豪榜的黃曉明，男友瓣瓣掂，難怪女友有樣學樣，跟到足。
Profile
楊穎
出生日期： 1989年 2月 28日（雙魚座）
出生地：上海
身高： 5呎 4吋
體重： 90磅
語言：廣東話、普通話、上海話及英語。
簡歷：出生後，移居香港。六歲時，隨父母返滬。 03年，回港升學。 04年，給星探發掘入行。 09年，簽約日本 Avex Group。 12年，簽約內地華誼兄弟，男友黃曉明為該公司股東之一。
主要作品：電影《破事兒》（ 07），《花田囍事 2010》（ 10），《全球熱戀》、《建黨偉業》（ 11），《狄仁傑之神都龍王》（ 13）。
微博： http://weibo.com/realangelababy 
95年自細鬼馬，自言加入娛樂圈令心智加快成熟。《蘋果日報》圖片 
13年由收收埋埋到見家長，足證感情愈趨穩定。《蘋果日報》圖片 
13年胃炎、腸胃炎輪住嚟，病到得番九十磅，我見猶憐！《蘋果日報》圖片 
13年帶病赴法國睇騷， deep V上陣，「博」唔係得個講字。
男友好貼心
由娛樂插班生至今日成績， Baby自問勤力滿分，拼博程度絕非紙上談兵，新戲《狄》我都有睇，印象最深還是多場落水戲。「冬天拍，古裝闊袍大袖入晒水，凍到發燒。」古裝辛苦，時裝亦唔見得輕鬆。「拍《一場風花雪月的事》講我亡命天涯，埋位前，一個人喺條高速公路上來來回回不停跑，當做熱身！
「著住高踭鞋狂奔，你知有幾辛苦？每晚收工都係助手抬我返酒店。」
體力上，算過關，講到演技，就唔係單靠賣命練成，我要佢為自己評分，「套戲三年前拍，計演技，當時我只係小學生水平，呢個角色需要大學水平至會演得好！」我心水清，當年，她跟「海綿蛋糕」仍未正式開始（或仍未曝光啩），講句一戲定情，沒錯吧？
「的確係佢向導演推薦我，一早就知大家會有感情戲。」戲外也情不自禁嗎？「佢本身好勤力、好專業，對人貼心，聖誕節仲會買小禮物送俾每位工作人員。」嗱！這是 Baby自己講男友黃曉明有鋪送禮癮咋！同事個個受惠，輪到自己，更加唔手軟，俾人影到她入住貝沙灣揸瑪莎拉蒂挽愛馬仕戴 Franck Muller鑽錶，邊個送，邊個受，已無分你我，然而，女方堅持對男方有 feel，只因才氣，不是財氣。
「每埋位前，一定跟對手對戲，好專業，佢本人好入戲，語速、表情均帶動住整個節奏，令對手投入氣氛……」完全讚不絕口，只差在未豎起大拇指，有一個有才又有財的男友，你唔恨得咁多！
我哋仲後生
工作上，有個大靠山，生活上， Baby亦移船就磡，實行中港兩邊走，結果，行蹤每每引來兩地狗仔隊輪流監視，為何不索性定居內地，省卻麻煩？
「邊度有工開咪住邊度，任何戲種都想試，呢大半年，內地電視劇、廣告較多。」
吸金力強，但競爭亦大，被選為「內地新四小花」之一，她說來並不輕鬆。「其實，我身體算唔錯（！），只係國內唔同地方，水土氣候唔同，適應上有困難，加上少時間休息，梗係多病。」以健康換取成就，有苦自己知。
賺錢之外，長駐內地，近水樓台更方便探班，也無妨呀！「未必成日見到㗎！大家都要周圍飛，況且，我哋仲後生，工作至上。」
拍戲拍廣告賺快錢，青春飯卻不能食足一世，有個生意頭腦甚發達的男友教路， Baby亦晉身商界做老闆，長線發展，慢慢搣，但自己終日離家，放心嗎？
「媽咪幫我管美甲店，朋友睇住 café。
「雖然讀過商科，做生意資質卻麻麻，有人幫手我仲放心。」我又記得，黃先生也曾經講過，自己做生意唔叻，最叻睇人，財源滾滾全靠每次搵啱拍檔有腦又放心，這一招，女友都受用。
「始終做藝人，尤其女仔，好難做成世，做生意，當搵機會又好，學吓嘢又好，我都好想試。」
人人話，靚女冇句真，我就話，呢句最實際。
Baby's tips
Q：入行多年，打扮喜好有變嗎？
A：前幾年，鍾意成熟型格，依家，我反而鍾意女性化，著多咗裙。
Q：轉季最想買乜？
A：一件毛毛褸，中等厚薄，不過，唔好真毛，唔想傷害動物，人造毛一樣靚。
後記
成功走出𡃁模框框的，還有 Janice Man。
早前，二人於內地活動碰面，被指唔肯合照，視如陌路，我又另有睇法，刻意影相的話，咪又俾人話此地無銀！今日， Baby直言，「冇話對唔對手，好欣賞對方，只係私下難有機會再聚。」
人大了，追求事業渴慕愛情，友情靠邊站，人之常情，只要，誰是真朋友？在心中已足夠。
Shop List
b+ab銅鑼灣時代廣場 501號鋪 2506 3147
I.T金鐘太古廣場 252號鋪 2918 0667
Maison Martin Margiela中環雪廠街 10號地下 7號鋪 2869 7707
留言列表
