家長為子女安排各種補習班、興趣班，都以催谷子女潛能為目標。而「Benz雄」許紹雄同太太龍嬿而，四年前更索性開補習社，為女兒Charmaine度身訂做補習課程，看似誇張，卻有苦自知。

「佢小三嘅時候，數學成績一落千丈，我哋搵過好多補習老師都搞唔掂，於是我決定自己搞一間補習社，等佢唔使跟得咁辛苦。」許太邊拭淚邊道出教女的苦與樂。

許紹雄女兒Charmaine現已升讀中一，一放學就到補習社打躉，一面做功課，一面陪媽媽，一家人關係好親密。

Charmaine七歲時和小狗的新年合照，未幾她的數學功課，開始跟不上學校進度，令許氏夫婦費盡心神。

成績止跌回升

許太在新加坡長大，七年前帶着五歲女兒Charmaine從新加坡回港定居，順理成章選擇了新加坡國際學校（Singapore International School，簡稱SIS)。「我對新加坡教育質素有信心，校風好啲，唔怕佢容易學壞。」

不過，SIS出名課程比其他學校深一兩年，Charmaine讀到小三，數學科由九十幾分跌到得六十分，令二人束手無策。「我同老公試過四出揾補習社搶救，但都無效，一時間壓力好大，唔知點樣先可以幫到個女，又唔可以畀佢知連我自己都有啲亂。當時坊間又冇新加坡課程嘅補習社，於是我辭咗份工，同老公商量過，索性自己開以新加坡課程為中心嘅補習社。」

許太之後親自回新加坡挑選良師回港，包機票包宿舍，務求以最優良的師資，為女兒救亡。提到當時獨扛助女的壓力，即使事過四年，許太仍忍不住落淚，許紹雄即為太太遞上紙巾拭淚。

許太為女兒學業問題而奔波，不禁落淚。

閒時最愛和女兒行書店的許太，家中圖書太多，索性將私人圖書館搬到補習社，而女兒最近的讀物則是熱門文學《Twilight》。

女兒的新南威爾斯大學英文試成績優良，貼在補習社成為生招牌。

母女合唱GaGa

許太為Charmaine放棄了在外資公司擔任行政主管的高薪厚職，專心照顧女兒，現在母女二人感情之好，連許紹雄說起也有少許妒忌之情，「我做嘢好忙，自己又無乜學識，所以少啲同阿女溝通，佢同媽咪好friend，兩個女人會傾心事。不過，我知阿女好鍾意食buffet同踩單車，所以一有時間，就會陪佢，等佢知道爹哋都好care佢。」知道女兒鍾意Twins，上周六又替她撲了第一行握手位，並陪伴入場睇演唱會。

為了融入女兒的世界，許太會與女兒一同唱K，許紹雄則在旁邊負責聽。「去唱K嘅話，我同個女唱Lady GaGa嘅歌，又唱又跳嘅時候，佢（許紹雄）就喺側邊打吓拍子，或者話個女扮得似，已經o氹得阿女笑得好開心。」

許太又不介意將人生經驗與女兒分享，「我試過畀朋友出賣，所以會教個女小心交友；有時我好快點出佢啲朋友嘅性格喜好，佢會覺得好amazing。」看着女兒近年的成績突飛猛進，去年更在新南威爾斯大學英文試中獲優良成績，許太流過的淚水與汗水，終換來今天的安慰。

女兒三歲時做的DIY相架，許氏夫婦珍而重之放在家中大廳。

女兒和學生都愛看的新加坡鬼故事《True Singapore Ghost Stories》，講新加坡傳統流傳下來的鬼故事，女兒又驚又要追看。

新加坡國際學校 面試攻略

SIS出名唔易入，要成功考入，身為SIS家教會成員的許太親自教路：

1. 新加坡公民有優先入學權，如不是新籍，就要操練英文，因為上學除了中文是普通話外，全用英語。
2. 不要參加校外的面試班，讓小朋友保持心情暢快，以自然的一面見人，開朗個性又懂得與其他小朋友相處的小孩，會較易得到老師垂青。

   新加坡國際學校在四月二十四日舉行小學部開放日，有心入學的家長，可以帶同子女一起參觀，讓子女多了解學校環境，日後有機會面試亦不會感到陌生。