喺過去一年，我履行街頭霸王 Fans嘅義務，透過 Xb360同埋 PS3挑戰世界各地嘅玩家，大開眼界之餘，更加出力宣揚香港機迷嘅讓 Round豪情。今年加強版《 Super SF IV》推出，又係時候再踏戰場，多咗角色參戰之餘，每人仲追加一招超必，而且仲有 Online格鬥家最期待嘅上網開房搏擊會，令到更多人睇到你哋點輸畀我！文：阿洛
36人參戰歷代強者再現 放大圖片 
■囚犯 Cody是大隻系角色，兩嚿胸肌厚過辭海。
新版本梗係要加新角色參戰，當中不乏街霸迷熟識嘅人物，好似《 Super SF II》嘅印第安人 T.Hawk、玩沙鎚嘅 Dee Jay，仲有《 Zero》登場、沿自《 Final Fight》嘅 Guy同 Cody，加埋女忍者伊吹同埋全新人物用跆拳道嘅韓妹 Juri等等，齊齊整整登場。而且今次豪鬼、阿 Dan等都係以基本角色身份登場，唔使爆呢個爆嗰個先集齊隱藏人，話時話，我個《 SF IV》 Save都仲未有得用豪鬼，我果然睇虛名呢啲嘢睇得好淡。
放大圖片 
■忍者 Guy以快絕身手取勝，適合速度型玩家。
放大圖片 
■女忍者伊吹，無見幾年好似大隻咗。
放大圖片 
■ Dee Jay又登場，以前都靠過佢搵食。
放大圖片 
■韓妹 Juri，明顯整過容，隻眼識發光。
新背景 加舊 Bonus Stage 放大圖片 
都知你貪心，有新角色登場當然又唔少得新背景啦，例如印度佬之前無自己主場，今次就追加咗，仲有新人物嘅專用背景，好似 T.Hawk嗰個咁，直情係野生動物頻道咁款，好靚好精細，真係估唔到打打殺殺都可以令人咁心曠神怡。講開第二代，機迷唔會忘記係打車同打木桶兩個 Bonus Stage，今次呢兩個小遊戲就會以次世代機能重現眼前，當然架車都係新款車，始終古董舊車難搵零件嘛。
放大圖片 
■阿龍新超必係滅•昇龍拳，打到阿 Ken變鞋抽。
放大圖片 
■打木桶，好令人懷念啊！
放大圖片 
■新款車，仲用咗自定車牌 CAP-99999。
放大圖片 
■有大量新衫追加，蘇聯佬版本嘅 Ironman。
放大圖片 
■網上模式齊全好多，當然繼續有排名。
8人開房 重播大戰 放大圖片 
上次個上網模式比較單調，今次廠方就順應民意加入開房模式，最多 8個人可以爆房進行淘汰戰或團體戰，人哋打時可以做旁觀者「依牙鬆槓」，打緊嗰兩個又自然更加有表演慾。另外亦可以利用「重播頻道」欣賞或下載網絡上嘅各個大戰，唔使下下上 Youtube搵，可以自己搵夜粥食吓。仲可以用主題搜尋或者加入「我的最愛」，隨時可以上網學到旋風腿同鐵沙掌，唔使求蔣志光囉！
Profile 放大圖片 
遊戲： Super Street Fighter IV主機： XB360、 PS3製作廠商： Capcom遊戲類型：動作遊戲人數： 1-2人發行廠商： Capcom推出日期： 4月 28日 
留言列表
