明星靚相大分享☆

喺台灣《超級星光大道》踢館賽彈出嘅 242磅大肥仔林育群（小胖），憑一把靚聲紅遍全球，日前去咗美國接受電視節目訪問，雖然行程緊密，但小胖全程心情靚爆。身在洛杉磯嘅小胖，噚日拎住 NBC電視台名嘴艾倫狄格納絲（ Ellen DeGeneres）畀佢嘅 VIP證，去咗欣賞美國才藝節目《一夜成名》（ American Idol），小胖一貫招牌學生 look現身，着住恤衫、冷背心同打煲呔，造型 cute爆，佢仲喺場外影相留念。小胖喺場中又撞見艾倫，當小胖離場，有外籍觀眾仲要同佢合照，搞到小胖鬼咁怕醜。小胖睇到台上巨星嘉賓精采演出，讚不絕口話：「太震撼，超誇張，更希望充實自己，有一天也能和他們一樣開演唱會。」

放大圖片

美國的工作人員對小胖好好，每餐都請佢大吃大喝。

放大圖片

小胖有機會趁空檔四出觀光，令佢眼界大開。

大擦美食

小胖呢次行程得到好妥善安排，食住玩都係星級待遇，難怪相中嘅佢一臉滿足，不過佢係咁食西餐，只怕佢之前辛苦減咗嘅 11磅贅肉好快返番嚟。另外，當日有份做小胖踢館賽嘅《超級星光大道》評審黃韻玲，噚日喺台灣出席宣傳時話：「如果有國際級的音樂團隊幫小胖製作專輯會比較好，例如美國有 David Foster這類的製作人幫他，也希望他走紅後不要迷失自己。」但有網友就揶揄小胖喺美國上電視表演似儍仔，不過亦有人話佢嘅西瓜頭好可愛。


小胖日前抵達美國後，還獲邀睇《一夜成名》，頸上掛着 VIP證的他雀躍地進場。