近期閉關寫書的羽翹日前與友人行街鬆一鬆，到潮店興奮試帽時更險滑低走光！到Boutique置裝的她專攻露腿短裙，試身時不忘在鏡前擺甫士騷玉腿。

轉型才女寫書的羽翹近日偷閒行街，專攻短裙騷玉腿。

近年羽翹在YouTube教化妝的短片大受歡迎，將乘勢推出美容書吸金的她近日閉關寫作，日前她忙裏偷閒孖住女友人到尖沙咀行街，抖抖氣之餘順道為新書做資料搜集。當日化了靚妝的羽翹先到潮店睇飾物，其中對貨車帽及重玩味的粗框眼鏡特別感興趣，對鏡試戴復古款式的眼鏡時連自己亦忍不住笑爆嘴。羽翹愈試愈興奮，戴上粉紅色貨車帽的她索性坐在吹氣梳化上叫友人替她影相，不過未知是否梳化太滑，她險「Sir」低走光，惟有以尷尬笑容掩飾窘態。

擺甫士晒腿

羽翹接着轉戰名店睇手袋，見到靚袋的她雙眼發光，不時拎起手袋Feel手感，雖然東揀西揀，但她用了不足十分鐘就揀定心頭好。羽翹在櫃枱細心的將「新寵」檢查一番後，即一臉滿足的跟友人離開店舖。其後羽翹又到Boutique睇衫，只見她對碎花款短裙特別喜愛，更揀了兩條試身，對鏡左照右照的她不時擺甫士騷腿，不過似乎兩條裙都不太啱羽翹心水，最後空手而回。

羽翹在鏡前左照右照，非常有自信。

扮靚要揼本，故羽翹只食雞蛋仔充飢。

貴袋當慰勞

羽翹對扮靚方面非常揼本，但對食則非常慳家，行到攰的她只與友人在街邊買雞蛋仔醫肚。羽翹接着到樂器舖玩琴一輪後就打道回府。記者其後致電羽翹問她是否死慳死抵買貴袋，她說：「之前幫品牌做嘢，佢哋送嘅，呢排反而想買個Keyboard，方便我錄歌放上網。」

羽翹襯到絕無裙不歡

羽翹是家中獨女，加上天生一張標致面孔，難怪得到父母愛錫！小時候，她除了愛食糖及拍照外，亦愛着裙扮靚靚！

自小已萬千寵愛在一身的歌手羽翹（Ava），最愛扮靚及拍照，而且相當頑皮，經常偷用媽咪的化妝品，當作畫具畫畫，她笑說：「媽咪好貪靚，成日將我打扮得靚靚先出街，除咗着裙同戴頭飾之外，顏色亦要襯到絕，總之就要求好高啦，哈哈！」

羽翹是家中獨女，難怪爹哋錫到燶！

羽翹去年開騷，父母結伴捧場。

拒着褲睇煙花

由於被媽咪「襯慣」，羽翹自細養成襯衫的習慣，更視裙子為出席重要場合的服飾：「細個喺長洲住，每次爹哋媽咪帶我出香港，我都一定要着裙，唔肯着褲o架！最深印象係每年農曆新年大年初二都會去香港睇煙花匯演，我一定會着裙去！」她笑言升上小學後，即使天氣冷，不少女同學都改穿長褲，但她依然抵冷着校裙：「事隔咁多年，即使長大成人，我依家都係最愛着裙，習慣冇變過！」