Face 152期狼溝 5女　借醉抽水李思捷鹹啜湯盈盈 @ 明星靚相大分享☆

16/4當面對質
你睇佢幾 funny，話我啜你喎，哈哈(真實對白)
記者講述醉啜一事，李思捷諗住湯盈盈會識做救駕，點知湯盈盈面有難色。

《荃加福祿壽》大收，最新平均收視 24點，王祖藍、阮兆祥搞笑係意料中事，反而靠扮天王劉華、學友同城城嘅李思捷更令網友拍晒手掌。扮鬼扮馬引到觀眾哈哈笑，不過李思捷最叻唔係扮嘢而係扮醉。
代表作係兩年前出席工作人員生日飲大兩杯，然後鹹啜湯盈盈。除咗借醉索吻，李思捷仲愛溝女，除咗同過 02年落選港姐葉凱茵拍拖，原來亦同過 01年港姐季軍朱凱婷一齊，加上同春卷蜜運期間，亦狂溝女神陳法拉，生性風流扮情聖，不過呢期紅爆嘅李思捷一於少理，對鹹豬嘴同溝女事件，風騷回應：「 You're so funny......just hug, no kiss！你最多咪寫我追女多！冇其他啦！」人紅講嘢都大聲啲！
35歲 TVB扮嘢王李思捷 03年入無綫，曾經同鄭中基一齊主持過《有招出招》而彈起，可惜無以為繼，近年拍劇居多，雖然擅長扮嘢，不過偶然在大騷表演，直到近期喺《荃加福祿壽》入面扮港產天王 hit爆，即時紅爆。

You're so funny，盈盈過嚟(真實對白)
李思捷被問及啜湯盈盈，即時大哥上身叫佢過嚟。

我哋係 hug， no kiss！我諗角度問題啫。(真實對白)
諗住湯盈盈話冇呢件事，點知佢話：「我哋係 hug， no kiss！」搞到轉數快嘅思捷呆晒。

聽到啦！ Just hug， no kiss！(真實對白)
被人鹹啜， 2年後仲要幫人解圍，湯盈盈見功成身退，即刻扮打電話鬆人，留番思捷繼續同記者交代。

扮完張學友、劉德華，週日李思捷扮郭富城，嚟緊下星期六仲會扮丁蟹，重演《大時代》掟仔落街場面，當然係搞笑版啦。電視圖片

前度︰ 02港姐葉凱茵
04年開始拍拖，同李思捷共患難，可惜去年 1月女方難忍思捷大男人性格，主動提分手，葉已嫁眼鏡商人。《蘋果日報》圖片

前度︰ 01港姐季軍朱凱婷
同葉凱茵散咗後，對出身港姐、有樣有腦有身材嘅 TVB財經節目主持朱凱婷嗒糖，可惜唔抵得女友叻過自己而分手！

溝唔掂︰陳法拉
去年 4月合作拍攝《有營煮婦》由於兩人劇中飾演情侶，所以男方攞正牌親近，已有真命 Neway大少薛世恆的法拉請佢食檸檬。

現任︰春卷王寶寶
現任女友，經常出雙入對，不過思捷非常大男人，經常對佢呼呼喝喝。

醉啜熊抱

1.李思捷一向鍾意劉華、學友上身，喺工作人員嘅生日 party上飲大兩杯爭咪唱，其間已對在場女性好熱情。

2.思捷唱唱吓歌，見到盈盈喺面前，忽然熊抱仲錫盈盈個嘴！旁人見唔對路即刻拉開鹹豬嘴思捷。

囂屎犯眾憎

李思捷為新一代扮嘢高手，深受網友歡迎，不過喺一眾小生、蒲友中評價就唔高，據知一班無綫蒲友自從李思捷發生「鹹豬嘴」事件後，已列佢為黑名單，永不預佢，而一直自視甚高嘅思捷，以為自己做戲好掂對一眾小生有微言，搞到班小生唔 like佢。

小生黨︰鄭嘉穎
眼紅鄭嘉穎有樂易玲撐，試過喺化妝間寸對方，因而令嘉穎不滿。

馬俊伟
拍攝《秀才愛上兵》時，不滿馬仔守時話佢遲到，即喺背後幫馬仔改花名叫「班長」。

蒲友團︰洪天明
「同佢少聯絡，唔係好熟，我當時（鹹啜湯盈盈）唔喺度。」

周家蔚
「冇打招呼、唔熟，我唔知喎！可能思捷飲多咗，玩吓啫！」

港姐殺手

李思捷唔只搞笑叻，亦係溝女王。曾與 02年落選港姐葉凱茵拍過 5年拖，但期間李思捷極度大男人，試過喺夜店當眾呼喝女友。知情者說：「思捷好大男人 o架！飲大兩杯脾氣仲勁，試過當眾喝 Fanny（葉凱茵）叫佢『收聲！同我坐低。』」
據知葉凱茵頂唔順佢大男人同自大性格喺 09年飛佢，不過思捷對港姐情有獨鍾，喺同春卷王寶寶拍拖前，亦與 01年港姐季軍朱凱婷拍拖，可惜大男人頂唔住朱凱婷叻過佢而分手。本週一朱凱婷在電話中仍很維護前度：「思捷係一個好 gentleman嘅男人，風趣有學識，但我哋係傾得埋嘅朋友，唔係拍拖囉！」
同朱凱婷散咗，好快就同 18歲嘅春卷拍拖，不過當時思捷拍緊《有營煮婦》對拍檔陳法拉相當嗒糖，仲不時請纓做柴可夫。可惜法拉有 Neway太子，對思捷唔過電。除溝女勁，思捷狼吻亦有一手。最激一次，莫過於在 08年某工作人員喺夜店舉行生日會，當座上客嘅思捷飲大兩杯，即借醉攬啜同場嘅湯盈盈。

李思捷同落選港姐葉凱茵拍拖 5年，女友一直支持思捷，可惜最後都頂佢唔順分手。《蘋果日報》圖片

09年 3月李思捷開始同細佢一大截（ 16年）嘅 19歲春卷拍拖，不時甜蜜行街，但最近開始被人拍到經常懶理對方，大男人性格開始浮面。

上週五（ 16日）李思捷出席《荃加福祿壽》祝捷，問及此事卻劉華上身 chok爆回應，可惜湯盈盈唔交戲。
F：《 FACE》李：李思捷　湯：湯盈盈
F： 07年你試過醉咗咀湯盈盈喎？
李： You're so funny......（即時大聲嗌盈盈過嚟，之後再叫記者問多次！）
湯：哦……我哋係 hug， no kiss！我諗角度問題啫！
李：聽到啦！ Just hug， no kiss！
F：咁你係咪同過朱凱婷拍拖呀？
李：你喺邊度聽番嚟 o架？冇喎！唉……我都知套《荃加福祿壽》 hit，不過我真係幫唔到你，你最多咪寫我追女多，有啲咩啫，冇其他啦！係咪？唔介意喎！明嘅！

躁底實錄
思捷曾經喺一夜店鬧當時女友葉凱茵：「收聲！同我坐低！」

搵女出氣
早前有傳媒拍到李思捷喺 Hong Kong Records，懶理女友春卷自顧自買碟，女友十足跟尾狗。

12年扮嘢路

李思捷由細到大表演慾強，他曾在訪問中透露：「 14歲有卡拉 OK，日日唱譚詠麟、張國榮，扮佢哋唱歌然後參加歌唱比賽，就係咁練出嚟！」

98
多倫多回流後，自薦參加「喜劇之王訓練班」，之後仲喺戲中飾演表情浮誇嘅導演。

03
由於喺《開心新班子》扮半人半狗搞笑角色出色，之後被《美麗在望》編劇?中，加插「天使狗狗」一角喺戲中。

05
05年同鄭中基一齊主持《有招出招》，唔使扮嘢搞笑，可惜只做了 8集，因收視低而停播。《蘋果日報》圖片

07
07年李思捷、王祖藍同阮兆祥喺台慶扮鬼扮馬表演，可惜當時以祥仔扮阿 Rain最搶鏡，李思捷扮黃凱芹、郭富城，觀眾反應唔大。《蘋果日報》圖片

10
《荃加福祿壽》首集扮張學友，無論唱腔及台風都十足十，正式上位！《蘋果日報》圖片

有米笑匠

李思捷有家底唔使憂，父親做空運生意，媽媽（左）就係中學老師，仲有個 DJ家姐李思維在香港電台第一台主持週一深夜節目《數字人生》。家住何文田山道加林閣市值 950萬，絕對唔使憂，有錢又搞笑，唔怪得知溝女話咁易啦。