幫襯代言便利店
活動結束後，謝安琪變回張師奶，與助手返回大埔買日用品，雖然只係買幾包濕紙巾，佢都十分識做地去幫襯佢代言嘅便利店。不過謝安琪全程苦瓜乾，似是心事重重。
近年四大唱片（環球、華納、 SONY同 EMI）因歌曲版權稅問題愈鬧愈大，除了去年與無綫交惡，旗下歌手絕跡無綫外，更與壟斷本地 9成卡拉 OK市場的 Neway傾唔掂數。
Neway與「四大」就版稅問題一直拉鋸，態度最強硬嘅環球更要求 Neway在和解前抽起旗下所有 K歌。不過 Neway最後只剷走人氣下滑的謝安琪，而環球一哥譚詠麟、 K歌之王陳奕迅及阿倫契仔關楚耀嘅歌都繼續有得唱。
俾無綫無限期封殺完又要絕跡 K場，今個月初先攞完傑青嘅謝安琪，要喺 K場復活就要等 12月 bma老闆羅傑承嘅新 K場開張。
近日有唔少網民在討論區投訴去 Neway唱 K時，不論謝安琪的新歌或舊歌，就連點歌主頁女歌星名單中，謝安琪都統統唔見影。不過同屬環球唱片的陳奕迅，就有不少新歌如《一絲不掛》及《無人之境》有得唱。
謝安琪所屬的新藝寶唱片是環球的子公司，據知「四大」本來有意跟 Neway方面講和，不過 Neway嫌版權收費太貴，而唱片公司又唔肯讓步，所以一直在拉鋸當中，而謝安琪最終更成為炮灰。知情人士透露：「『四大』同 Neway都只係做生意求財，有咩事都想私底下傾掂。環球啲歌之前一直都賣俾加州紅獨家試唱， Neway吞併咗加州紅後，兩方就一直喺版稅問題爭拗，環球仲叫 Neway抽起班歌手嘅歌。 K場要做生意，惟有側側膊用住啲歌先。不過環球態度好強硬，加上謝安琪仲有個私人經理人夏森美（ Sammy）， Sammy覺得 Neway侵權，堅決要抽起晒所有歌。 Neway怕麻煩又覺得謝安琪近期冇 hit歌，加上仲有其他環球歌手嘅歌可以播，所以索性將謝安琪喺點唱名單中剷走。」被無綫封殺已令曝光率激跌，依家連 K場都唔見影，謝安琪呢鋪真係雪上加霜。
唔係封殺係侵權
就歌曲被剷走一事，記者致電謝安琪的經理人 Sammy，他說：「依家係 Neway侵權，我哋要求 Neway抽起晒『四大』嘅所有歌，而唔係阿 Kay被封殺。其實仲有好多人嘅歌已經唔喺 Neway入面播，依家『四大』仲告緊 Neway，不過好明顯係有人打茅波走法律罅，繼續播侵權嘅歌做生意。」
記者本周三（ 20日）致電環球高級副總裁黃劍濤（ Duncan），他一聽到提問即表示：「呢方面嘅嘢要問番 HK Karaoke Licensing Assess嗰邊。」而代表「四大」與 Neway交涉版權問題嘅 HK Karaoke Licensing Assess代表鄭生就表示：「我哋唔會每日都住佢哋播咩歌，如果佢哋需要『四大』嘅歌，呢個時期佢哋仍然都可以用，不過咁做唔代表冇侵權。（但 Neway只係冇謝安琪嘅歌，環球唱片嘅陳奕迅仲有新歌喎？）咁我諗呢樣就唔關版權問題。至於點解只係冇謝安琪，你就要問番 Neway。」記者曾向 Neway方面查問，對方只回應因版權問題，所以完全沒有謝安琪的歌唱。但為何保留環球其他歌手的歌就沒有解釋。
Neway不留人，自有留人處。 bma老闆羅傑承將於今年 12月 18日於銅鑼灣及尖沙嘴開兩間卡拉 OK，據知因羅傑承肯出市價向「四大」買歌，雙方一拍即合，仲會總動員派出歌手撐新 K場開幕，力抗 Neway，而到時謝安琪嘅歌就可重現 K場喇！
環球群星仲有得唱
本周三（ 20日），本刊記者到尖東 Neway幫襯，發現點歌名單內，環球系歌手中除了謝安琪外，其他如陳奕迅、譚詠麟、 Mr.，甚至剛復出嘅關楚耀，都能夠搵到佢哋嘅歌，不過排名會較後，如原本放喺香港男歌手第 1頁嘅陳奕迅，就排到第 6頁先搵到。
唔少 K迷發現 Neway冇謝安琪（ Kay）嘅歌點，即時上網問點解。有網友認為謝安琪人氣下滑而且曾經演出走音，有冇佢嘅歌唱都冇所謂。不過對於謝安琪嘅歌迷嚟講，冇 Kay歌唱係唔能夠接受，仲有人因為咁罷去 Neway唱 K㖭！
自謝安琪 09年憑《囍帖街》橫掃各大樂壇頒獎禮後，事業開始停滯不前，負面新聞如整容、暗交有婦之夫嘅新聞亦接踵而來。《蘋果日報》圖片
留言列表
