眼前坐着年初因為舉報上司鄧智偉利益衝突而被無綫解僱的周永恒，想到他夠膽死和樂大媽及樂大媽的人對着幹，說實話，標題構思我第一個閃過的念頭是：「一路好走。」
ICAC終止調查後，鄧智偉上週四（20日）通過律師樓發聲明，表示對指控保留追究權利，我問周永恒收到律師信沒有，他說：「冇！打一個比喻，我見到有人可能犯罪因此報警，點知做證人原來會犯法，咁樣以後仲有冇人肯企出嚟？」


一番話讓我想起月中發生佛山18冷血路人事件，周永恒說：「個細路女已經夠慘，我唔想借呢件事嚟講，不過事實就係咁。」
周永恒說，為了前上司鄧智偉好，才挺身而出提醒（指證）他，鄧智偉說周永恒被炒，是因為不服從上司、不肯做身為正視音樂Traninee的份內事……
我以為，誰是誰非不是重點，作為下屬，不聽話聽教已經是死罪，搞不清楚利害關係越級挑戰更是注定永不超生，05年以後成為虔誠基督徒的周永恒，看來早忘了現實世界的生存規則。
對於自己是不是個好下屬的問題，周永恒還沒想到答案，坐在身邊的趙梓淇（原名趙頌茹）搶答：「我覺得佢已經做咗本分喇喎！」
有老婆撐，周永恒也理直氣壯起來：「你可以評論我啲歌好唔好聽，但你唔可以要求一個音樂人絕對服從囉！」
14歲在天水圍打架劈友，17歲裝模作樣入行扮陽光偶像，20歲被控藏毒被踢出娛樂圈，27歲傻更更挑戰「樂」勢力……
不論人在哪兒，不論選擇做哪種路人，全世界說你壞說你笨，重要的是，身邊有她。

神呀，請為我出一隻唱片
與上司鄧智偉的是非，周永恒說早於去年中發生。向某人提出可能牽涉利益衝突後，立即不回電話、不獲派工作，投閒置散近一年，直到合約屆滿才收到信表示不獲續約。
「點解分開要搞到咁？點解曾經同我一齊工作過、睇住我大嘅人，同佢同一陣線、話我係搞宣傳炒作新碟，我份人冇人比佢哋更清楚。我同鄧智偉一直稱兄道弟，一直拍晒膊頭，點解要搞到咁？否定晒當年一齊並肩作戰嘅日子？我走咗，一直以為要收埋事實，連屋企人都唔知，直到最近，突然被通天，嗰啲人又係咩目的？」
「件事總要有個完結，一份工嚟啫，TVB唔係我全部，我人生仲有其他角色。04年藏毒案以後，由我自己嗰間陰暗嘅房間走出嚟，用咗好幾年時間想返入去呢個世界、想返入去娛樂圈，想由聲望係負數嘅自己爭取做零。我想搵番失去嘅嘢，我想做番零嘅啫，真係好攰。」
宣傳新碟？是的，出道短短3年就因為藏毒退出樂壇，僅僅出過3張唱片的周永恒相隔9年有新碟面世。正如司徒法正有事沒事說「出事㗎嘛」說「有污糟嘢」一樣，教徒們甚麼都說是神蹟，開口埋口都說要感謝主：
「我唔寫日記、冇網誌，記錄自己嘅方法係歌。呢幾年我儲咗幾首歌，好想出一隻碟，但又好怕返去娛樂圈、怕開會怕過番以前嘅日子。4月29日生日後有一日，我被人放飛機，一個人揸車上太平山頂。突然落雨我停埋一邊避雨，決定向神祈禱。我話畀神聽，自己想出碟，但又唔想過番以前嘅日子、唔想打畀人唔想碌人情咭，你知唔知有幾神奇，中間連罅隙都冇，我嘅願望咁奢侈，一祈完禱，電話就響，Sony香港嘅CEO問我想唔想合作。」
我有點懷疑，真的冇罅隙？


「真係冇，呢頭阿們嗰頭電話即響。一個咁高職位嘅人，我哋成年冇傾過電話，應該係我打畀佢至啱……而佢提出嘅發行抽佣，係出邊市價五分一……」

那些年，我們一起吸過的毒品
周永恒的新唱片，封套拍攝由教友張致恆、譚俊彥操刀，形象自然是曾任形象指導的老婆負責。訪問當天，趁着老公化妝造頭，阿YU向我解釋全程在水中拍攝的唱片概念：
「佢以前似魔鬼，呢幾年我睇住佢慢慢洗乾淨，化作天使……」
周永恒接着告訴我，他曾經有多魔鬼：
「曾經有同學爆料畀雜誌，話我着住校服去劈友，句句都係真話。我成日覺得，如果唔係入咗行唱歌，我一定會做一個黑社會大佬。我中學喺天水圍大，一放學就有好多黑社會等我哋放學踢我哋入會，唔袋住個手提電話報定警，連屋企都返唔到。成個中學一年一集《古惑仔》，英雄主義盛行、個個都覺得漫畫內容係真㗎，講出嚟冇跟大佬點夠人型？其實呢，我哋個個都係puppy gang，冇真係入黑社會，冇真係劈友，被人call去晒馬啫，同學話：『喂，去唔去食盆菜，去有兩嚿水利是袋喎！』梗係去啦！」


曳到咁，周永恒還說中學時代自己不是曳，是好動，到入行以後才真正學壞：
「形象就好似一套衫，係做呢份工嘅制服。人哋鍾意陽光，我咪陽光啲囉，人哋鍾意乖仔，我就扮乖。其實身邊唔少人吸毒，我哋冇人覺得唔啱、冇人諗過未來……有諗就唔會食啦。大家互相同化，連女朋友都被我同化一齊試，我哋唯一觀念係，呢樣嘢喺香港犯法，係香港嘅錯。」
17歲入行，青靚白淨彈結他識作曲，還挾着叔叔周啟生的大名，周永恒說自己當年紅過：
「十幾歲係咁意就搵到10幾萬，幾嘢就fing晒，買萬幾蚊遙控飛機、買萬幾蚊遙控車再砌買跑道，再用幾萬蚊嚟買毒品，轉個頭就用完。當年馬偉豪搵我拍《這個夏天有異性》，我做阿Sa嘅friend，好多戲分，導演擺明畀位我上。結果呢，開6點，我遲個幾鐘到。成晚high嘢冇瞓過，個樣衰又上唔到妝，一句台詞都記唔到……人哋點會唔知，成個片場都知我high咗嘢，我仲覺得自己好型，成個rock star咁。」

愛女兒，像愛童年時的老婆
上得快跌得快，周永恒說04年出事退出娛樂圈，不用多久就身無分文，學會兩個字「窮」和「餓」。直到被陳志雲推薦進正視音樂以前，他的工作是月薪$6,000的救生員。 「連自己都養唔掂，點顧個女朋友。嗰陣時我哋試過肚餓買麵包，要夾埋啲毫子數夠一個麵包錢。家住天水圍，去元朗小欖女朋友屋企黐餐，冇錢搭車，係一前一後踩單車，踩成個鐘至到。好彩女朋友父母（即現時外父外母）從來唔睇新聞，話唔信新聞講我嘅嘢：『阿仔，唔緊要㗎，你對我個女好就得啦！』呢個係一個好簡單嘅要求，亦係一個最重要嘅要求。第時我個女嘅男朋友同老公，我都淨係得呢一個要求。你話我歪理都得，我由細到大都覺得，一個人打家劫舍為頭家，壞極有譜。一個人貪污為溝多兩個女，才真正唔係好人！」


周永恒與趙梓淇拍拖7年，去年一月奉女成婚，女兒現時14個月大。周永恒說看到女兒，就像看到小時候的老婆，像有一個機會看着自己最愛的女人慢慢長大： 「老婆對阿女狠到心，我諗就好似每個爸爸對阿仔一樣心態，我唔得，狠唔到心。我會盡量唔出手，直到最後一刻英雄位至出馬，我想佢自己搞得掂，但一定唔會畀佢搞唔掂。佢前排學行，老婆想佢跌一跌，我口講唔想扶，但就似守龍門一樣，成日最後一刻飛撲。」 父母都年輕過，瘋狂過，我問他們，如何防止女兒走歪路？要是女兒將來遇上像過去的周永恒一樣瘋狂的男孩子怎麼辦？ 「我哋返教會，識嘅人都係教會，大家價值觀一樣，佢哋嘅仔女亦一樣，有信心佢唔會識壞人，唔會俾人傷害。」《恐怖熱線》常說的一句話，信不信由你。信鬼還是信神，這就是信仰。

小夫妻
04年被控藏毒，相戀一年的周永恒與趙梓淇曾經傳出過分手。阿Yu澄清，這麼多年這麼多事，從來沒有想過放棄：「當年鬧分手，係因為唱片公司怕事、怕孭鑊，一出事叫我乜都唔好認。嗰段日子佢最需要有人企喺佢身邊，我好遺憾冇堅持企出嚟。」最後悔的事，阿Yu說不是吸毒亦不是認識周永恒，反倒是入錯行：「入咗行就永遠走唔番出嚟，過咗幾耐去到邊，都俾人話：『呢個咪唱歌嗰個！』『呢個咪似鄭秀文嗰個！』」阿Yu說過，老公Roy就是她第一個男朋友，好一個死心塌地的女人。 ####


我哋試過肚餓買麵包，要夾埋啲毫子數夠一個麵包錢。


相隔9年，推出新唱片《Immerge》，拍攝封面照、形象、後期全部由教友、老婆義務相助，發行是市價五分一，周永恒說是神的旨意。


在無綫旗下的正視音樂共事3年，周永恒說與鄧智偉（左）一直稱兄道弟，對於對方指他不服從上司：「佢有咩事同我講，唔好同唔關事嘅人講！」


04年7月，周永恒因為藏毒被判感化18個月，卻在感化期內再被拍到街頭醉酒破壞鐵閘，差點觸犯感化條例。《蘋果日報》圖片


17歲入行時陽光純品的形象，周永恒說是制服，其實朋友圈子吸毒的不少：「我咩毒品都試過，拍《這個夏天有異性》時，high完去開工，每個月起碼買幾萬元毒品。」


去年四月與趙梓淇奉女成婚被指有違基督徒教條：「我哋一直同居，信教後高皓正提我哋基督徒唔可以婚前性行為，所以結婚。」《壹週刊》圖片


一手帶周永恒出道的音樂人叔叔周啟生，02年曾與周永恒因為金錢糾紛大打出手報警收場：「阿叔已經重新接受我。」《蘋果日報》圖片


03年為無綫拍攝電視劇《青出於藍》造就一段姻緣，阿Yu說Roy是他第一個男朋友亦是唯一一個。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄