腸胃醫生雕琢生活像手術 @ 明星靚相大分享☆

身穿廚師袍，手執大鑊鏟，腸胃科專科醫生胡興正既有姿態，又有實際；先把雞肉醃一醃，再泡油，加上雲南昭通醬略炒，就輕易做出一味昭通醬炒雞丁。胡請記者試食，雞肉嫩滑，昭通醬惹味，色香味俱全。胡指泡油步驟是炒雞丁的靈魂，花多幾分鐘泡油，可令雞丁口感煥然一新；「好似做手術一樣，麻醉藥份量少啲，花多幾分鐘等病人瞓着，病人就會安全啲」。

為芭蕾舞團拍照製月曆

在中環開設私人醫務所的 48歲胡興正，他說自己有 20多年烹飪經驗，最初學烹飪只為「求生」，「嗰時去倫敦讀書，出去食好貴，所以食完就會返去學煮」。胡甚有烹飪天份，買幾本烹飪書研究一番，無師自通，「起碼易過學做內窺鏡先啦」。有說外國留學生喜歡夜夜笙歌，胡指自己不愛「蒲」，寧願花時間鑽研美食，「試過整法國聖誕大餐，幾個男人喺間屋度，成晚食咗八個 dishes」。胡興正於 1995年到澳洲深造，沒有娛樂，於是走去學搓意大利麪，「 pasta就成日食，但覺得爭在自己仲未識搓，就用咗幾個星期去學」。他說搓麪糰有秘技，「用未經漂白嘅麪粉，會煙韌啲；唔好加水，要加蛋去搓；碌嗰陣最好用木棍，用金屬雖然快，但因為木棍有紋，凹凸不平會令到個 pasta入味啲」，沉默寡言的他越說越興奮。烹調成為親子活動，「會同仔女一齊整嘢食。佢哋家好識食，都驚佢哋食到嘴刁，哈哈」。胡帶記者走進他的書房，牆上掛着數張芭蕾舞照片和風景照，攝影也是興趣之一，「中學已開始影相，最舊嘅相機用咗差唔多 30年，仲未壞」。胡興正收藏了約 20部相機，大部份是舊式菲林機，因為喜歡菲林機的「慢」，以及相片影像的微粒，「藝術感強啲」。他認為攝影是需要深入了解相機結構，才會影出有感覺的相片。日子有功，胡興正也變成半個專業攝影師，將會為香港芭蕾舞團拍攝影像，製作 2013年月曆。

放大圖片
胡興正喜歡攝影及烹飪，右圖的手動菲林相機已用了接近 30年。