楊梓瑤：想搣甩「浸大E神」個名
楊梓瑤（Carol）去年以學生模身份推出超激寫真，引起話題，在大學「響晒朵」，她坦言想搣甩「浸大E神」稱號，又自爆曾被副校長召見，嚇得她以為要「照肺」！
我依家仲讀緊人文學系，一直都好畀心機讀書，但當初話我挾「浸大」銜頭博出位太招搖，又傳我用錢買學位、抄功課、搭上教授，甚至話我影響校譽，要取消學位資格，傳言層出不窮！
雖然傳言歸傳言，但都要對學校講聲唔好意思，其實好想搣甩「浸大E神」呢個名，仲有嘅係，學校冇唔畀我返學，當時本寫真出咗街，係有見過副校長，當時都嚇咗一跳，以為佢唔接受，但出奇地副校長好明白事理，佢知道我嘅難處，亦明白唔係齋露肉，知道呢行市場細但好多人爭，其實好多女仔都唔想露，但依家真係冇乜辦法，我都好清楚自己條路，過咗熱潮就會回復平靜。
連踩40小時冇得瞓
好多人都會問當時返學有冇遭受歧視或者奇異眼光？開頭係有，會有同學嗌：「嘩！Carol呀！」反而自己學系就冇乜嘢，啲同學都比較靜態。其實讀嗰科主要係通識同文化研究，同我息息相關，開正我嗰瓣。
雖然要讀書又要兼顧娛樂圈工作，但後生捱吓冇影響嘅！只係之前個學期捱病咗要食藥，搞到個人「瘟瘟沌沌」，仲試過邊返學邊拍嘢，四十個鐘冇瞓覺，所以啲錢真係唔易賺！（明日待續）
口述：楊梓瑤 筆錄：專案組
入行後，楊梓瑤曾玩「制服誘惑」，於電影中扮學生妹。
當日挾「浸大E神」之名為人認識，但楊梓瑤現在最想搣甩這稱號。
Carol透露曾就寫真集一事，被副校長召見。
要一邊讀書一邊工作，楊梓瑤（左）自爆一度捱到病！
文章標籤
全站熱搜
留言列表
