平治 Benz E 350 Saloon　 3日玩 Options 尋寶－明星靚相大分享☆

之前長測 Mercedes-Benz E 500 coupe，快感回味至今，今次再試 E 350 Saloon，起初覺得房車無雙門咁型，亦明白 350馬力難跟 500相比……怎知坐入車廂一刻，發現令內櫳豪華舒適升級嘅 Options通通有齊，三日長測如尋寶遊戲般慢慢摸索，先發現駕駛樂趣原來可以好多樣化。記者：許維雅攝影：譚盈傑Model： Debbie@ Puremodels

按住背塞紅隧

E仔新款大大話話有成 8種唔同級數型號，論馬力外形，以為上次長測嘅 E 500 Coupe已經係最好玩， Saloon呢類成熟穩重型豪房只會討傳統男士歡心。不寄予厚望，卻帶來無限驚喜，全車 Options多多嘅 E 350 Saloon原來可以咁好玩。加上以平時試新車，好多時 Options都唔會咁齊，最大問題係唔會有咁多時間逐樣試慢慢玩，最令人興奮嘅，首推一張 Active multicontour seats，不但有氣壓軟硬調校，更有靠背按摩功能。呢日由淺水灣揸返九龍，即使兩條隧道加埋塞足一粒鐘，可以按住摩揸車嗰種享受，完全令人忘卻塞車嘅煩憂，連坐隔籬嘅攝影師一樣可以齊齊嘆，呢一刻有誰怕紅隧大塞？除此之外，座椅更兼備 dynamic handling功能，識智能控制承托腰部嘅兩翼左右擺動，感應到車身入右彎時，椅翼會自動升高固定腰部，即使高速行急彎特別多嘅淺水灣道，亦唔會拋到你周身郁。一張充滿生命力嘅座椅令你感受到佢快慢皆宜嘅本事，實在叫人讚嘆。

揸 Saloon講享受

可能好多人仍然覺得加 Options係虛有其表嘅玩意，但今次呢部 E 350所加嘅，大部份都係針對提升乘車享受嘅設備，實用程度十分高。好似後座由三座變兩座獨立椅，兼備冷暖功能，加上附設兩個獨立螢光幕嘅 DVD機，為後座乘客提供另一種老闆級享受，內櫳特別闊落嘅四門房車比起 Coupe更能勝任。仲有防曬電尾簾、搵路易嘅導航系統、倒車安心嘅後泊鏡頭等等應有盡有，亦通通有用得着嘅時候。比較少見就要數車尾嘅 EASY-PACK boot box，用嚟放小型雜物就夠晒方便。平日較怕夜晚揸車嘅我，今次有遇強光會自動 Dim暗嘅倒後鏡，又有兼備 APS煞車嘅夜視鏡頭幫我睇清前面暗黑環境，實在倍覺安心。三日長測後發現 Coupe跟 Saloon嘅最大分別就係操控較爽快嘅 Coupe玩味重，懸掛避震較軟嘅 Saloon裏裏外外都一樣舒適，仲要有埋如 Options demo car嘅配備，三日皇帝式駕駛享受點叫人唔依依不捨呢！

放大圖片
■長測配備大量 Options嘅 E350 Saloon，猶如參加了 三日兩夜嘅豪華團。