呢期經典角色興復活，好似 Predators早幾年就同 Aliens合作，至於 7月上畫嘅《鐵血戰士 S》本周極速出碟，劇情啱唔啱胃口因人而異，但兩代 Predators隻揪，加埋刀劍槍等武器出齊，搭上 DTS-HD MA 5.1，試聲一流！記者：陳國輝
紅光綠血搶爆鏡 放大圖片 
■除咗膚色同黑位，亦不妨欣賞 CG激光效果。
邊個話睇《鐵血戰士》要見血先算精采 o架？好似劈甩頭、斬斷手、刺穿心臟呢類殘酷核突鏡頭，實情大把貨，只係血肉模糊嘅畫面比較少，並非劇情上缺乏打鬥場面，而係 Predator的血根本就唔係紅色！追開無理由唔知，無論新舊 Predator都好，身上流嘅依然係螢光綠血液，呢次喺全高清顯示下，直頭應用靚去形容！咁似乜？就好似《阿凡達》戲內晚上嘅森林螢光植物，色澤鮮艷搶鏡；想睇多啲視覺效果，亦可留意 Predator向人類發射頭頂嘅紅色激光，效果同樣咁 Sharp，至於人像膚色、暗位等畫質，呢隻碟整體表現幾好。
前段好瞓 後段好炸 放大圖片 
■ Predator慘被吊起任打，無得還手。
你又諗，睇得呢類片，如果唔打足全場點收貨！若然抱呢個心態欣賞《鐵血戰士 S》，你可能會失望。老實講，睇劇情一定無佢份，之但係真正打鬥時間有幾長？數埋手指，大概有 70分鐘；特別一提，首 25分鐘絕對係「廁所位」，無交打不特止，連 Predator身影都未見過，只交代呢班僱傭兵係點嚟，悶到想瞓；好彩戲肉喺之後就發生，睇住人類逐個如何反抗，但依然被殺，重點可以欣賞吓重低音，聽吓刀、劍、槍等不停穿插等效果，感覺好震撼。
送面具× Hot Toys 放大圖片 
■ Hot Toys 1:6 Predator現價賣緊千幾蚊！
除咗普通 Blu-ray，亦推出咗限量血獸面具版，唔止包裝靚仔，仲有齊三部曲咁多集，再送埋 Predator面具畀你，最適合用嚟收藏。另外，你仲可以參加《鐵血戰士 S》問答遊戲，隨時有機會獲得 Hot Toys人偶㖭！
武器靚聲逐格聽AK狙擊出動 放大圖片 
淨係槍械，粗略估計都有 6、 7款咁多，唔識唔重要，最勁係子彈發出時聲效差異好唔同，扭太大聲小心隔籬屋投訴！
武士刀比拼 放大圖片 
o架仔唔識死，自告奮勇拎把武士刀單挑 Predator，邊個贏輸自己估，但係同 Predator把鐮刀互撼，音色勁尖亮。
斧頭劈腰頸 放大圖片 
搽到一身泥漿嘅安哲倫保迪，揸住把斧頭猛劈 Predator，首先係腰，然後到頸，聲效雖然無乜特別，但有血肉模糊嗰種 Feel。
內容簡介 放大圖片 
一班僱傭兵同時被派往異族星球執行任務，點知遇上「終極異種戰士」，更成為其捕獵點心！唯一方法，係搶奪對方嘅太空船，離開星球，之但係呢批所謂僱傭兵，幾乎全部屬十惡不赦嘅死囚及黑幫人士，內訌不斷，令呢場殘酷大廝殺正式展開。
$199（ BD）$639（限量血獸面具版） 放大圖片 
片種：動作格式： BD50音效： DTS-HD Master Audio 5.1特別收錄：從未曝光及刪剪片段、製作花絮、導演及演員訪問等 
留言列表
