滾熱辣
婆媳糾紛引爆抑鬱 葉玉卿有人俾我嘅Ⅲ片佢睇
黎芷珊的《最佳女主角》成熱話，繼訪問鄭秀文、毛舜筠後，下周矚目嘉賓是年初回港拍賀歲片的葉玉卿。卿卿 96年息影， 98年下嫁美國富商胡兆明，婚後育有一女兩子，擁有私人飛機，住的是古堡式莊園，巨鑽、 Hermes手袋多不勝數，乃幸福少奶奶人辦。
不過，在《最佳女主角》中，卿卿自爆鮮為人知的辛酸。拍過三級片的她，入門前曾被奶奶嫌棄。幸福並非必然，記者就此事致電身在美國的卿卿。卿卿坦言奶奶最初出到口驅逐：「我嗰仔唔適合你，你哋唔好一齊！」力阻她入門。當時卿卿患上抑鬱症兩年，幸得有好友邱淑貞開解，婆媳關係才逐步修復，得以走出陰霾。
外表剛強的卿卿，今年初因丈夫被傳欠債，開記招護夫，想不到她曾經患上抑鬱兩年。 
激動落淚
其實卿卿的訪問是年初回港時做的，不過因為《最佳女主角》播出時間一拖再拖，大家在下周才見到卿卿激動落淚。
三級片拖累
卿卿和伍衞國相差 16年，兩人拍拖時更與男方家長居住。卿卿指當年是她提出分手，但強調伍衞國對她好，是一名好男人。
在下周播出的《最佳女主角》，卿卿除大爆與張立基及伍衞國兩段戀情外，亦鮮有提及她 98年嫁往美國後，與奶奶的衝突：「喺美國頭一年真係好唔開心，婚後曾經有人將我拍過嘅三級片俾奶奶睇，令奶奶對我有誤會。」
周一，（ 7日），本刊致電身在美國的卿卿，憶述這段不愉快的經歷時，她亦曾一度語塞，更不禁自爆曾因此患抑鬱兩年。其實新婚前，卿卿奶奶已講到出口唔鍾意未來新抱。她說︰「結婚前，老公帶我返屋企食飯，奶奶走過嚟同我講︰『我嗰仔唔適合你，你哋唔好一齊！』唉！當時真係好難受。老公識我之前同父母一齊住，同我拍拖後搬咗出去，婚前我同佢家人冇了解過，加上我又係娛樂圈人，佢屋企人好難理解我。依家做咗媽咪，我設身處地都會明白當時奶奶嘅諗法。」
細心打動
曾是樂壇、影壇姐級的葉玉卿，不惜紆尊降貴對奶奶服侍周到。 06年，卿卿老公銀行開幕，佢仲當眾細心為奶奶扣好襟花。
《蘋果日報》圖片 
卿卿與老公居於紐約一間佔地 12畝的古堡莊園，因為搬入這個莊園，令卿卿與奶奶接觸多了，因而成功破冰。
智慧的性感
今年 47歲的葉玉卿， 85年參選亞姐得季軍而入行。眼見入行五、六年毫無突破，卿卿在 91年一口氣拍了《卿本佳人》、《我為卿狂》及《情不自禁》三部三級片，雖然有露點場面，不過男主角不論是方中信或曹查理，統統有得睇冇得摸，反映卿卿的堅持。
賺到知名度之後，卿卿見好即收，轉型拍文藝片，更憑《天台的月光》及《紅玫瑰與白玫瑰》連續兩年獲提名金馬獎「最佳女主角」，成功洗底。 96年，當時 30歲的卿卿息影，嫁給胡兆明並移居美國。
85年選亞姐
卿卿參選首屆亞姐，不敵黎燕珊屈居季軍，當時 19歲的卿卿仍有 baby fat。
91年脫上位
卿卿為爭取演出機會，開始為雜誌拍性感照，並接拍三級片，身材表露無遺，成為當時的性感女神。
92年做歌星
卿卿食住個勢，以性感形象進入樂壇，加盟其兄葉志銘創辦的飛圖，一曲〈擋不住的風情〉唱到街知巷聞。
94年晒演技
卿卿見好即收， 92年開始轉拍文藝片。 94年她接拍關錦鵬導演的《紅玫瑰與白玫瑰》，和陳沖鬥演技。
失眠抑鬱兩年
除咗婆媳關係甚僵，卿卿初到美國，她要由知名藝人，反璞做人妻，很多東西都未能一下子適應，令她人生面臨最大的衝擊︰「生活環境唔同咗，好陌生。初初去美國住了半年酒店，有時都會問自己『點解淺水灣有間屋唔住，要嚟呢度？』當時情緒好低落，人生無目標，日日只係陪老公返工或睇電視，成年都瞓到晏晝一、兩點至起身，又失眠，晚晚凌晨四、五點都瞓唔到。起初以為時差，但成年幾都係咁。
「其實當時我仲年輕，應該積極融入當地生活，去吓博物館或識吓朋友。但我改唔到喺香港嘅習慣，仲走去 Chanel買十幾萬衫，買完返屋企掛上衣櫃，但其實我已經唔使做宣傳，啲衫根本冇用，買嘢只係純粹發洩。當時係有抑鬱，但我冇睇醫生亦冇食藥，持續咗兩年。」
親自接送
10年，卿卿與老公胡兆明回港，邱淑貞大住肚都為好友送行，仲親自開埋車門，認真夠老友。
葉玉卿和邱淑貞因為吳君如介紹而認識，兩人同在香港時，已經不時有約會。
邱淑貞開解
卿卿有一女兩子， 13歲的大女胡芷欣（左）今年初陪卿卿回港宣傳賀歲片，令留在美國的兩子詐型，仲問卿卿點解家姐有得去，佢哋冇得去。
這樣漫無目的過了兩年，但卿卿堅持「一定唔會返轉頭」，加上老公錫及好友邱淑貞開解，終於渡過了難關。她說：「真係好多謝豆斗（邱淑貞），我剛去美國幾個月時，佢已經飛嚟兩次探我。同佢真係乜都講得，後來我哋又去加拿大同歐洲玩，我嗰女滿月佢又過嚟探我，我唔開心就打俾佢呻。」
抑鬱的生活過了兩年後，卿卿婚後第三年，女兒胡芷欣的出生，令卿卿重拾人生目標。「當時老公買地建屋，入伙後奶奶一星期都嚟住幾天。彼此相處原來就係解決婆媳矛盾最佳的方法，同奶奶一齊住，佢睇到我嘅誠意，時間證明咗一切。加上有咗個女，對我嚟講係個大 Project，心情好番好多，而小朋友亦成為我同奶奶嘅橋樑。」
卿卿說人心肉做，她發自內心的誠意，終於感動奶奶︰「試過奶奶屋企廁所要整，但當時個個都返晒工，於是我幫佢睇黃頁搵人整。就係呢啲生活上嘅細節同互相扶持，慢慢減低咗彼此嘅誤會。婚後第三年，我同奶奶關係變好。其實奶奶係個坦白同善良嘅人，佢有嗰句講嗰句。近年奶奶都會問我以前拍戲啲嘢，仲租碟睇我拍過嘅戲㖭。」
闊太唔易做，尤其面對大戶人家的家長。卿卿是聰明女，當然明白婚姻要長久，先要冧掂老公的父母，所以對外硬朗的葉玉卿，對住奶奶卻馴如羔羊，服侍周到。能夠面面俱圓，也是卿卿人生的致勝之道。
新不如舊
去年的《最佳男主角》令主持黎芷珊吐氣揚眉，今年添食的《最佳女主角》，雖然嘉賓陣容加強至十五位，更播足七星期，但平均收視暫時只有 20點，較《男主角》低了 4點，而網民就插卡士冇上次咁好，亦唔信劉曉慶冇整容。
本周四（ 10日）至下周一（ 14日）的嘉賓是毛舜筠，內容將會提及「哥哥」張國榮，下周二至三是葉玉卿，周四及五是袁詠儀。
嘉賓所佔集數有多有少，好似李心潔只有一集，而壓軸嘉賓劉嘉玲就有四集。其實每次訪問都是三小時，集數長短是根據內容吸引度剪輯。
今集卡士被網民彈名不副實，因為好多嘉賓未攞過「最佳女主角」，甚至連提名都冇。暫時梁詠琪是被彈得最厲害的嘉賓。
娛片頭
卿卿自白：當時嘅情緒好低落，人生無目標！
幾時都話，女人唔易做！近排追黎芷珊主持嘅《最佳女主角》，個個受訪者都有段血淚史㗎。好似葉玉卿就喺鏡頭前自爆曾經被奶奶阻入門，而《忽周》記者仲搵佢做咗個越洋深情訪問。
嫁入豪門，有仔有女，幸福滿瀉，話咁易咩？卿卿付出咗好多囉。台灣《蘋果日報》
聽番錄音聲帶，卿卿講到婚後第一年，日子好難過，好在後尾雨過天青啫！ Btw，聽卿卿講嘢，就感受到佢係個爽直、堅強嘅烈女，大家快啲 click條片𥄫吓，睇吓媽咪姐講得啱唔啱啦。
易整貴食！
平日媽咪姐都係用番薯煲吓糖水，或者就咁烚熟嚟食。 Well，今次睇完《忽周》條片，發現呢個「燒焗鱸魚釀紫心番薯」好鬼易整，但睇起嚟呢，似高貴菜式。一於整俾 honey食，威俾佢睇先！
楓華絕代
利益申報，媽咪姐從來都唔係蔡楓華粉絲，但耐唔耐都會留意吓佢嘅最新動向，好似探吓街坊咁。睇片見就嚟又開騷嘅佢，好似無乜精神，睇醫生狂捽眼，忽然又戴番超去買文具。華哥，難得你堅持理想，振作呀！
留言列表
