忽然覺得，Blizzard呢間遊戲公司勁似神教，產品素來貴精不貴多，只有三大遊戲系列《WarCraft》、《StarCraft》同今次介紹嘅《Diablo》，就已經賺晒全世界粉絲嘅錢。一個續集叫人等足12年，各位粉絲從冇詐型，就算Blizzard不斷玩延期，粉絲們依然肯等。今次有得搶先試玩《Diablo III》，感覺就等於教主賜你率先摸一摸最新iPhone 4S一樣，全世界唔係有幾多人可以咁做㗎！
玩《Diablo III》搵真銀
由於《Diablo III》將會設立一個現金拍賣場，准許玩家之間進行真金白銀買賣戰利品，並可以透過指定合作夥伴Paypal過數。咁即係話，只要努力打大佬，一下唔覺意打到件稀有品，咁就發囉！（幻想中）呢下真係絕，以後可以話畀人知，我打機可以賺錢！．遊戲平台：PC、Mac ．發行公司：Blizzard ．遊戲類型：動作RPG ．發行日期：2012年年初
全新班底 依然咁好玩!!
如果你想要玩《Diablo III》完成版，恐怕最快要等到出年年初（2011年內亦可能有公開測試）。千祈唔好問：點解你一樣係死忠粉絲，我有得試玩而你冇呢？全因為Blizzard要借各地傳媒做勢，超限量派測試A/C先顯得矜貴。唔係講風涼話，其實呢次測試真係冇乜特別，只不過係一次打骷髏王嘅冒險旅程，由開始遊戲至打完，都係一個鐘多少少。整體嚟講，Blizzard好似想話畀新舊玩家知道，即使前兩集嘅製作班底都走晒，改用全新班底嘅第三集，雖然轉走《World Of WarCraft》嗰種華麗風格，依然係咁•好•玩！
可以有幾好玩？
《Diablo》頭兩集叫人玩極唔厭，唔單只因為每個滅魔職業都有唔同爆機嘅考量，因此喺單機故事模式殺死咗N次Diablo，大家都希望試吓用另一個攻略方式嚟挑戰呢個暗黑味十足嘅RPG。但佢能夠成為經典嘅主因，就係當年Internet連線仲未夠快，《Diablo》系列已經免費任人上Battle.net個遊戲Lobby，群埋世界各方玩家開房，齊齊擸起最強武器同裝備去打大佬。就好似一夜情，啱玩就可以行埋，玩完冇手尾，仲可以繼續開房，一玩就已經十二年。最勁就係，當《Diablo II》10周年時，遊戲突然有一個免光碟更新檔案，因為顧及玩家嘅遊戲光碟轉足十年，可能已經老化，絕對係值得晒命嘅更新。玩到《Diablo III》beta test，系列原有嘅職業攻略特性，簡單易玩＋耐玩度高，都可以喺試玩時感受得到，但冇晒系列最強嘅暗黑味就真係幾令人心理鬥爭，到底係我太懷念經典，定係唔肯接受新一代風格呢！
Blizzard三大必殺品牌
必殺品牌1 Diablo系列 PC平台的Lobby Game里程碑，四人玩家連線上Battle.net，開房入局勇闖隨機生成嘅地下迷宮，目標就係最底層嘅惡魔Diablo。第一集同第二集勁玩黑暗feel，加上遊戲性十足，影響日後唔少動作RPG作品，都畀人叫做Diablo Like Game。
必殺品牌2 StarCraft系列人族、蟲族同神族喺科幻舞台上採集資源，生產兵力，並摧毀對手所有嘅建築物為爭霸目標。由於呢三個種族嘅創新性及平衡性都大獲好評，韓國就以《StarCraft》系列嘅多人對戰模式，發展出職業比賽，培養出唔少明星選手。
必殺品牌3 WarCraft系列《WarCraft》系列原本係以奇幻世界做背景嘅即時戰略遊戲，佢最大嘅特色係發展出唔同奇幻種族，依賴各種唔同嘅生產單位採集資源，生產兵力，摧毀對手陣營就算贏。但呢個系列最大成就當然係網上遊戲《World Of WarCraft》，可能係全世界最多人上線嘅MMO。
五大滅魔戰士，攻齊遠中近！
今次測試有齊《Diablo III》早前公布過嘅五種職業，包括Demon Hunter、Monk、Witch Doctor、Barbarian同Wizard，有齊遠中近三種攻擊風格，特技同魔法都非常豐富，相信最多人試玩嘅職業，唔係Demon Hunter，就係Monk，因為呢兩種都係新登場嘅職業。
新登場 狩魔獵人Demon Hunter
主要使用弓同弩嘅遠程武器，只要唔亂咁衝前畀怪物圍，單憑佢嘅遠距攻擊力＋不同屬性嘅箭枝，已經足夠清場。
新登場 武僧Monk
擅長近身戰鬥嘅武僧，不但行動敏捷，更可以爽快使出拳腳連續技，配合簡單嘅武器更增強短距離嘅攻擊力。
秘術師Wizard
秘術師擅長冰或火屬性魔法，初期非常廢，當佢學咗光線系魔法之後，就變得異常強，真係勁過超人射死光！
巫醫Witch Doctor
除咗可以召喚一大堆核突嘅食屍狗、青蛙、蝙蝠同蜘蛛出嚟協助戰鬥，仲識得好多陰濕嘅範圍魔法去攻擊敵人。
野蠻人Barbarian
大大隻隻嘅野蠻人有三個缺點：跑得慢！唔夠快！冇速度！但係佢又有三個優點：肉盾！夠硬淨！大力有獎！
連線協力要訣志在玩氣氛
四人連線協力時除講求團隊精神外，最緊要係識自動走位，唔好走埋一堆，忽略外圍嘅敵人。
識自動走位
Public Game採用自動配對，由於連線志在玩氣氛，就算亂配其他同類型職業過招，都冇乜所謂。
溫馨提示：Mac機都玩得
Blizzard一向好照顧玩家，上年推出嘅《StarCraft II》就已經一碟有齊PC同Mac兩個版本，所以今次《Diablo III》Beta Test都分成PC同Mac兩個平台。就用現時入門級iMac測試，2.5GHz 四核心 Intel Core i5加埋AMD Radeon HD 6750M，執行得綽綽有餘，同PC版玩家連線一樣大丈夫。但係操作方面，用手指掃嘅Magic Trackpad總比唔上用Magic Mouse（甚至最簡單嘅Mouse）咁方便。至於玩PC版同Mac版最大嘅分別，就係……用Mac玩當然潮啲啦！ ####
《Diablo III》唔再用以前嘅Lobby Game模式，容許玩家自行設定Invite only、Open to friend或Public Game嘅情況下進行連線遊戲。
遊戲內打大佬嘅迷宮都變得燈光火着，已經唔見晒前兩集嘅陰陰森森的恐怖風格，唔通真係新班底新作風？
今次Beta Test只可以玩Campaign模式，但最多四個人連線協力就冇改變。跟對上一集相隔十二年，《Diablo III》改成全3D多邊形圖像製作，遊戲畫面跟足同廠最潮最賺錢嘅《World Of WarCraft》。
留言列表
