港股近日出現插水式急瀉，恒指四天內已累跌近二千點，情況比08年的金融海嘯更險峻。香港地全民皆股，這慘況亦衝擊娛圈，令眾藝人人心惶惶。情場得意的陳豪輸得最甘，單是一隻滙控（0005）已令他帳面唔見一半。馬國明亦手持十幾萬蟹貨，翻身無望。專家和玄學家更預測港股後市乏力，恒指隨時見萬二點，低處未算低，唔驚就假。


周二（4日），原本已急趺的港股在下午又突然大瀉，收市恒指創29個月新低。

陳豪　四年未見岸
因為一個內幕消息，令陳豪在08年金融海嘯前，將部分血汗錢，以當時市價130元購入滙豐控股（0005），「我呢啲全部辛苦錢嚟㗎！我怕輸俾通脹，諗住買隻大藍籌穩陣，點知結果咁大鑊。」五號仔股價四年來一直反覆，09年試過跌至33元，雖然之後曾上試百一蚊，但這趟股災又令滙控再次疲弱。本周二（4日）以56.65元收市，陳豪表示揸足四年都未見岸，陰功。「我其實都係穩陣派，依家我都係睇定啲先。不過我一日唔賣仲有翻身之日。我寧願攞錢去買樓，信磚頭多過股票。」不如諗諗與陳茵媺買愛巢，更加實際啦。
滙豐（0005）
買入價：$130
4/10收市價：$56.65
持股量：約1萬5千股
帳面蝕：約110萬

馬國明　蝕多過九成
一直在TVB默默耕耘的馬國明，因誤信朋友而中招，他說：「股票唔係好熟悉，但有次個朋友話呢隻股一定掂，就買咗十幾萬，點知坐晒艇。」起初馬國明不願重提傷痛，但為了提醒大家切勿誤信消息股，他才透露自己手持非凡中國（8032），「我高峰時候4蚊買，依家跌到1毫子都唔夠，沽又唔係，惟有擺住先囉，做大閘蟹都冇辦法啦。」他更被反覆的股市嚇到止步，「唔會啦，依家都已經好傷，以後唔會再買股票。」

非凡中國（8032）
買入價：$4
4/10收市價：$0.074
持股量：4萬股
帳面蝕：約15萬7千

陳展鵬　轉炒日股
陳展鵬現時還回味07年逢股必升的蜜月期，他說：「記得07年最有斬獲，嗰時最興抽新股，抽乜就升乜，嗰時期好輕易賺取到6位數字。」輸錢皆因贏錢起，現時他還持有幾隻銀行股，「有少量交行（3328），帳面蝕幾萬，不過暫時唔會沽出，望佢回升。」他揚言以後轉炒日股，港股少掂為妙，「我對日本股票比較有興趣，見佢哋人民團結，天災後復元得快，對日本股票好有信心。」乜你識日文咩？

交通銀行（3328）
買入價：$6.5
4/10收市價：$4.17
持股量：約2萬股
帳面蝕：約5萬

陳奐仁　小注怡情
陳奐仁不擅長投資，現時只持有兩手中國移動（941），「我110蚊買入，今日跌到幾多我都唔知，朋友話只要一間公司咁耐都未執，就總有一日會升番，唔會擔心。」雖然蝕得唔多，但他也絕不趁低吸納，費事一頸血，他說：「唔會再買股票，我都係聽相士話努力工作，唔再賭博，腳踏實地好啲。」

中國移動（941）
買入價：$110
4/10收市價：$73.9
持股量：1千股
帳面蝕：約3萬7千

專家教路　羅家聰：個市一直向下
港股變幻莫測，早前還在牛熊兩派爭持階段，但經過連日來不停見紅，明顯熊市已定。記者問過交通銀行首席經濟及策略師羅家聰，他說：「個市仲會一直向下，即使中間會有些少反彈，但整體嚟講都係跌。睇明年中至年尾先至有大跌市，因為經濟蕭條嘅幾樣因素都未出齊，單係樓價仲未跌，呢幾個月恆指仲會下試萬三點。」
羅提議市民應該趁反彈即沽貨，「如果想撈底依家未係最抵買，個市到明年底會跌到近萬一點附近，反而我勸手上有貨嘅人唔好再坐，趁反彈時執番些少本，無謂再浪費時間啦！」

Bosco法拉趁低入
這場股災風高浪急，令不少藝人一鋪清袋。不過有危才有機，未有貨的黃宗澤、陳法拉和朱慧敏，都紛紛表示趁低吸納，睇好港股後市出現小陽春，甚至見底反彈。

黃宗澤　set定買入價
近期股市大跌，很多人都在採取觀望態度，但黃宗澤（Bosco）卻郁手掃貨，他說：「我會趁低吸納。會買中銀香港（2388）先啦！其實之前我喺價錢好低時，大約13蚊用六位數字買入嘅，即使而家跌到咁殘（截至10月4日，收市價為$14.52），我仲係有賺。」他揚言已作好部署，更set定買入價，「我會等到中銀跌到12.8或者12.9時，可能會再入少少貨。」
貼士：買金融相關股

陳法拉　吼實力股
無貨一身輕的陳法拉唱反調，表示愈跌愈好，她說：「成個市跌咪好囉！因為好多本身有實力嘅股票，都跟住個市跌，我覺得有危至有機！我會分階段逐少逐少入貨。」
她更吼實一些俾大市拖累的優質股，「入乜嘢？咪入實力股囉！你唔好問我入邊隻啦！平時想入呢啲股一定好貴，依家入真係又平又抵啦。」記者再三追問，法拉仍然不肯透露心水，有錢齊齊賺吖嘛！
貼士：分段入藍籌

朱慧敏　睇埋市盈率
雖有台灣IT男友做靠山，但朱慧敏對投資十分進取，而且她懂逢高必沽，所以今次股災沒令她損手爛腳，她說：「我資產平均分配為地產、股票及流動現金。呢排股票不斷跌，好彩我6月時放晒所有股票，現時準備趁低掃平貨。」不過她並非亂入市，事前一定參考不同數據，「新地（0016）、建行（939）都唔錯，我睇過佢嘅PE（市盈率）都OK，而且近日啲股東都不斷增持，絕對入得過。」
貼士：入市前做功課

玄學預測
港股不停尋底，玄學家麥玲玲和李丞責亦預言來年市況更加波動，投資者切勿輕舉妄動。

李丞責：年底見萬三
今年香港股市會喺十月見底，十二月出現小陽春。如果想有斬獲，十月趁低吸納，兩個月後放，會係一個幾好嘅短炒投資機會。到咗十二月底至出年農曆年，股市會再下挫，跌到萬三點。因為美國每逢蛇年都唔好，13年係蛇年，會帶動全球經濟轉差，要守到14、15年先有好轉。


麥玲玲：只適宜短炒
其實喺下半年，由於太多不明朗因素，投資者係適宜短炒。今年十月到十二月初，股市暗湧特別多，會有突發性逆轉，年底至出年初先開始回穩。不過踏入明年，市況危機重重，明年五月至六月期間更不適宜投資，明年底更有「刑剋」，係全年最波動嘅月份。 ####


我呢鑊甘喇！（設計對白）


《蘋果日報》圖片






唔買就蝕！（設計對白）




《壹週刊》圖片


《壹週刊》圖片

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄