媽咪姐
E Cup陳茵媺：生夠成隊 football team！
大肚陳茵媺（ Aimee）啱啱返香港無耐，就佗住陳家嘅金叵羅出嚟𢱑銀，剪綵價由 4萬跳升到 20萬，仲有傳接咗 7位數嘅奶粉廣告，而老公陳豪啲 job亦多到接唔切，兩公婆孖住吸金！
周二（ 8日），靚靚陳太百無禁忌去錶行剪綵，笑晒口話係開心價：「好耐無出嚟做嘢喇，我有少少工作狂，都想見見大家嘛！」媽咪姐收到小道消息，其實間錶行好早就開咗，原本 8月做開幕儀式，但大家覺得 Aimee夠旺，所以等到 10月 Aimee佗穩咗，返香港先正式剪綵。識做嘅 Aimee即場大爆 BB性別：「佢會係個 christmas baby或者 new year baby，係囝囝嚟；應該會留喺香港生，呢段時間都見過醫生。（會唔會順產？）呢個係女性先有嘅經驗，希望好好享受呢個過程，想佢自己揀幾時出嚟見父母，呢個責任交番俾 BB。（會唔會追多個女？） I want a lot of kids，生夠成隊 football team啦。」
聖誕就已經係預產期， Aimee都話依家做嘢唔可以太 heavy！雖然攬住個廁所嘔嘅日子已過，但媽咪姐八到 Aimee到生產前暫時都無公開活動，要再見到佢，可能要等生完 Mo仔先得。咁搵錢呢啲咁操勞嘅工作，當然係要留番俾陳豪呢個準爸爸啦，係咪先！
陳豪又出動
周三（ 9日），忙完拍戲嘅陳豪又去咗銅鑼灣出席開幕活動，同佘詩曼齊齊剪綵。阿佘好留心聽司儀講嘢，阿 Mo就一味掛住笑，完全係有子萬事足！
記者問陳豪 BB係仔定女？佢繼續笑晒話：「唔講得！唔講得！遲啲你哋會知。不過依家知道做爸爸真係唔容易！」老婆周二（ 8日）已經公開話係仔喎，兩公婆做乜唔「夾口供」呀。
11年 9月， Aimee拍住陳豪以情侶檔為同一品牌嘅旗艦店剪綵，當時笑容已經鬼咁一致，該品牌高層仲話希望下次可以請到陳豪一家三口出席活動㖭。
阿爸跟身
呢日， Aimee爸爸唔單止貼身保護愛女，仲好似小 fans咁拍低囡囡做訪問時嘅樣。
6人護駕
大會都好小心，請咗 4個保安維持秩序，再加 Aimee經理人同助手護駕，絕對安全！陳豪可以放一萬個心。
5吋高踭鞋
睇 Aimee腳上對 5吋高踭鞋好牙煙，好彩佢只係出席活動先着咋，其實喺保母車上一早就放咗對平底涼鞋更換。
自爆要霸住陳豪
貴價星媽
娛樂圈真係好特別，做咗人妻，再大埋肚，出騷價就可以幾級跳。當然，要嫁得好，先有呢個幸福待遇啦！
諸葛紫岐 6萬變 20萬
一樣佗住 7個月嘅諸葛紫岐，佢當年因為同 Neway二太子薛嘉麟傳緋聞，人氣急升，出騷價由 1萬升到 3萬，家下仲佗埋薛家個孫，酬勞即刻跳到 20萬。
Cara G. 2萬變 4萬
名模一向都有價有市， Cara G.同老公 Jesper結婚唔夠半年，今年 8月就宣布有喜。依家出騷價高咗唔少，仲可以接多啲親子 job㖭！
吳佩慈 5萬變無價
有台灣「九頭身美女」之稱嘅吳佩慈，以往出 function至少收 5萬，但佢自爆未婚懷孕後，都好少出席公開場合。咁梗係啦，未來老公係賭場大亨喎，仲使做咩。想知佢嘅近況？等陣揭去 P.14八吓啦！
留言列表
