搜尋氣
MOOV廣告做主角 街頭樂隊 Sollasedo：唔上 CCTVB
音樂平台 MOOV最近以數個街頭歌者單位做主角拍廣告，片中輪流唱 Eason的〈我的快樂時代〉，反而黃耀明、陳奐仁、 RubberBand同林二汶做配角，實行力撐街頭 style！
當中除了旺角威哥長駐西洋菜街演唱多人識外，另一個 4人組合 Sollasedo（傻喇士多）原來亦已玩了兩年街頭音樂，逢週五、六以尖沙咀碼頭做主場，試過被人當乞兒、被警察踢喇叭，但即使俾人恰到上面，仍堅持唔做 CCTVB音樂節目，四個字：為自由！
我哋選擇街頭唱歌，係因為隨處都可以表演，唔使固定時間喺個台度會 free好多，同埋有人流就有觀眾，唱得好一定有人睇，唔使等人買飛。我哋四個本來唔識，係喺街唱歌時先後自告奮勇加入嘅，後來組成 Sollasedo。
我哋通常喺天星碼頭唱，有時連蘭桂坊、合和中心門外、時代廣場都有唱，理念係帶畀人開心，唱成點留畀觀眾直接批評，觀眾可以有參與性。雖然亦遇過唔開心嘅事，試過有人鬧：「雜種乞兒嚟乞食呀？」又曾經有差人一行埋嚟就踢跌個喇叭擋住個咪：「你哋做乜行乞呀？」咁佢哋都係表達吓啫，我哋咪慢慢感染佢囉，嘈咪收細聲啲囉、阻街咪搬入啲囉，做每樣嘢都有人阻撓你，但我哋會堅持去做！相反試過有警察埋嚟掉低廿蚊，佢話：「你加油呀！但係細聲啲仲好囉！」
從來冇諗過做歌星，我哋覺得喺條街度係好主流㗎！抒發自己唔代表要紅，主要想用最市井最平民化去分享音樂，都唔一定要上 CCTVB做啲音樂節目！我哋唔想簽唱片公司，一簽可能會變質，理念呀、風格呀、衣着呀好多規限！𠵱家幾自由，鍾意幾時唱幾時停，講乜都得，變咗職業會好大壓力嘅！
MOOV最新廣告在電視及網上熱播，「傻喇士多」在天星碼頭演唱，除咗電視廣告，連帶網上版亦有近 5.5萬人睇過。 
拍攝後陳奐仁與 4位成員合照，「傻喇士多」說陳奐仁有鼓勵他們，希望日後有機會合作。
天星碼頭獻唱
Sollasedo每逢星期五、六在尖沙咀天星碼頭表演，他們說：「有啲唔搭港鐵，專登搭船過嚟聽我哋唱歌；有啲仲同我哋開咗 WhatsApp group傾偈，好滿足！」
留言列表
