明星靚相大分享☆

上個月廿四日生孖女嘅黎姿，住院一星期，上星期五（七月三十日）由十人保鏢開路出院。由於細孖未足五磅仲要瞓氧氣箱，唔可以同姐姐、六磅大孖一齊返屋企。
因為開刀生孖胎傷口較大，產後黎姿雖然笑容滿面，精神唔錯，但步步為營，要醫護人員一左一右傍住，坐上車後座一刻，亦見佢露出痛楚表情。

黎姿出院大方行正門，二五話老公馬廷強覺得呢件係開心事，加上自己做過傳媒，明白到老婆黎姿始終係公眾人物，記者喺醫院守候咁多日，都係想交差，所以破例同大家分享呢份初為人父母嘅喜悅。
黎姿任影，不過，馬廷強就堅持低調唔現身，只由好友無綫高層樂易玲代勞，接老婆出院。要影馬生馬太合照，冇咁易！

產前有180磅嘅黎姿，出院當日，著上白色闊身長裙，由醫護人員扶住見記者。

為咗孖B健康，黎姿授母乳，愛美神谷奶，勁上加勁。

黎姿住院期間，陪馬廷強出入嘉諾撒醫院嘅保鏢便服打扮，但出院當日，十名保鏢，一律西裝打呔。

馬廷強冇露面，接老婆出院，由好友樂易玲頂替。

即使兩邊有人扶住，但坐入車廂一刻，耷低頭嘅黎姿亦不禁露出痛楚表情。

十人保鏢護駕，黎姿坐住百四萬寶馬離開醫院，返回住所蘭心閣。