動植物公園高壓氧治療老犬狗狗－明星靚相大分享☆

高壓氧治療Hyperbaric Oxygen Therapy，簡稱高壓氧（HBOT）。原理，是利用高壓的氧氣作為醫學治療。例如手尾長的骨髓炎，或手術後傷口比正常人難以癒合的糖尿病足。
高壓氧一般被廣泛應用在人身上，但其實亦適用於四隻腳動物。歐美普及程度就等同飲茶食飯，香港亦終於有零的突破。新開張主打寵物住院療養服務的Hong Kong Animal Health Clinic，最強gimmick，就是以擁有全港首部高壓氧治療機作招徠。

看圖解構

開發老犬市場
港人有老化現象，寵物都一樣。剛過去的寵物展，一個動物慈善團體公開徵召的「狗狗松柏之星」選舉，就有兩隻十七歲老年狗精靈榮登榜首。要加護保育一隻老年貓犬，養生藥療診治住院，樣樣都係錢，簡直係錢途無限一盤商機。
「動物同人一樣，都會隨着年齡增長而引發種種骨牌效應的慢性疾病，但本地獸醫診所幾乎九成只做門診，附設24小時住院加護服務的，我諗五隻手指都數得晒。正因為零起步發展潛力實在太大，所以就鎖定目標針對性開發。」畢業於中國華南農業大學，身兼療養院行政總監的Jack Tong解釋。
捉到路，第一步是對號入座提供長期病患貓犬最需要的服務。「對年老重症寵物，最需要人貼身照顧，但爸爸媽媽要返工、OT、湊小朋友、旅行……未必再擠到多餘時間打理。因此療養院除提供普通病房，仲有隔離病房同恒溫加護艙，亦會有值更人員實行24小時輪班制度。」Jack續說。
講到尾最大賣點，當然是太空感十足的高壓治療艙。設計倒模人用的版本，中國煙台製造，連運費在內約廿萬。「在外國，高壓治療艙被廣泛應用程度，由兒科到腫瘤；截癱甚至燒傷都可使用。寵物尤甚。貓狗在密封加壓環境下吸入純氧，對活化血管、促進膠原纖維組織重組、手術後傷口加快癒合等等，均可達致理想的醫療效果。全程就咁坐或瞓齋聞就得，對不良於行貓狗，絕對輕鬆而無痛苦。」已加入美國海底暨高壓醫學學會Undersea And Hyperbaric Medical Society，成為合資格會員的Jack Tong如是說。

療養院場內還提供動物捐血庫，歡迎寵物主人帶同貓狗義捐。長遠目標是血庫能達到自給自足甚至供外，以便緊急狀況下可提供第一時間的輸血服務。

香港寵物療養院
門診時間：12nn-8pm
探病時間：12nn-2pm；6-8pm
住院收費：小型犬及貓隻$250；中型犬$350；大型犬$600。高壓氧療程次數則視乎獸醫評定動物之病況需要。
電話：2380 8408
地址：九龍深水埗鴨寮街24號地鋪

高壓艙深長190cm，大丹同聖斑納入到，五呎九男人都瞓得。