剛推出嘅《戰國Basara 3》除一如以往將主角打造成型男索女外，仲「參考」唔少外國FPS同ACT遊戲，加入多個有趣嘅新玩法：武將埋身肉搏時可以Zoom近玩格劍；同伴陣亡又有得復活；仲有慢動作設計畀玩家出必殺技炒起敵人瘋狂鞭屍加Hit數，勁有驚喜！
雖然《無雙》系列愈玩愈悶，但另一邊廂同樣以戰國歷史作為背景嘅《戰國Basara》，總算每集都畀到玩家新鮮感，而且《戰國Basara》拋開唔少「歷史包袱」，無論角色、兵器同場景設計都幾天馬行空，史實、虛構兩者並存。 《戰國Basara 3》故事講述公元1600年關原之戰後，德川家康同繼承豐臣秀吉遺志嘅石田三成爭奪天下嘅大戰，如果唔清楚呢段日本戰國歷史嘅玩家，都可到遊戲入面嘅日文史實同角色簡介中重溫。其實單睇遊戲每位角色一身型男索女造型，都夠賞心悅目，例如今次兩大主角之一嘅石田三成，着上一身窄身衫加一頭銀髮，仲潮過今時今日在涉谷見到嘅潮男；另外，新女角雜賀孫市更會揸住機關槍掃射，認真天馬行空。 之前都有FPS遊戲在埋身肉搏時轉換到「格劍」場面，鬥快按掣鋸對手，《戰國Basara 3》亦照辦煮碗，只要兩個武將在埋身戰時，同時使出固有技攻擊，就會觸發這個名為「劍劇」嘅格劍場面，玩家要鬥快按掣，贏出嘅一方就可打暈對手。今集除了原有嘅固有技同必殺技「Basara技」外，仲加入咗一個名為「戰刻Boost」嘅新系統。當攻擊敵人或攻陷敵人陣地時，都會增加「戰刻Boost」能力值，儲滿後發動，身邊敵人嘅動作就會被減慢，有啲似「Bullet Time」，如果配合Basara技就可以輕易將敵人全部殺光。 一個人打當然唔夠過癮，今集雙人模式會分成上下兩個分割畫面進行，如雙方在附近輪流發動「戰刻Boost」時就可以使出超高嘅Combo Hits，殺到停唔到手；即使二人分頭行事，其中一個不幸陣亡的話，另一個玩家都可以即時趕去搶救復活。除咗加入新戰鬥系統外，《戰國Basara 3》都提升咗遊戲嘅策略性，好似戰場上設有唔少機關，一不小心就隨時中招；另外今集亦新增了陣地系統，例如先擊破陣地會令旁邊的敵兵短時間潰散，咁就易打好多，不過陣地附近通常布滿弓兵，想突入都要睇清楚形勢先好。 類型：動作 開發：Capcom 平台：PS3 日期：已推出 售價：$299 查詢：2359 7998
潮爆角色造型
鬥快按掣格劍
拯救陣亡同伴
遊戲檔案
留言列表
