蔡依林品味超錯壹週刊 1065期 @ 明星靚相大分享☆

鍾意玩image、吊環鞍馬都可以用嚟伴舞嘅台灣天后Jolin蔡依林，8月10日將會推出全新國語專輯，主打歌《美人計》MV上個禮拜播出，賣點唔再玩G奶，而係佢自創嘅「Vogueing」舞。
今次Jolin嘅舞蹈，難度在於四肢骹位如同虛設，拗手拗腰拗腳扭麻花都得，繼續示範人體奧妙展，可惜Jolin嘅新image太過噁心，跳舞跳到識飛都無用。

最出事係Jolin向傳媒發放嘅第一款新image相，由於以熒光綠為衣服主色，被台灣人氣blogger、網名叫「個人意見」嘅陳祺勳，鬧到無朋友，仲笑佢似女版巴斯光年，靈感來自《Toy Story》。
天后都無面俾，「個人意見」之後再踩Jolin另一個珠片運動look新造型，笑佢流蘇墊膊似「月曆紙」，熒光襪珠片衫幾十蚊有交易，兜成個圈笑Jolin著得「cheap」，仲踩多腳話：「不知道她讀的是哪國版本《Vogue》，反正跟我讀的不是同一本！」
句句「夭心夭肺」，Jolin一辣即㷫，响微博留言執番個尾彩：「您讀的又是哪本沒禮貌的書？」
男女子混合單打，台灣唔少傳媒四圍搵唔同嘅形象顧問，希望幫Jolin攞番個公道，可惜全部答案彈多過讚，喂！老老實實，我唔識fashion，唔識Karl Lagerfeld，都睇得出Jolin品味超錯啦！

「個人意見」以「輕鬆打造天后造型指南」為題，笑Jolin呢身珠片look太cheap：「肩膊上的月曆紙：回收價一公斤五毛，亮片外套：190，熒光單腿襪：不成對大特賣50，短襪：80，安全褲：100，上一季的Puma for Sergio Rossi：特價中，Jolin的拉風自信天后風采：無價。」摑完你幾巴，再錫番啖，唔該晒！

對於Jolin低俗品味，網民寸佢無「衣Q」，以往試過著衫似水母同魷魚筒，海鮮大總匯。對於網民惡意中傷，Jolin比較忍得：「我覺得還蠻好笑的。」嘩！仲笑得出喎！

品味出事，好在Jolin嘅舞蹈繼續keep住高難度，唔好睇小呢兩個pose，我試過跟住做，條腰差啲抽筋。如果有人做到嘅話，唔該影低張相寄俾我睇！

小S時薪12萬
由小S、蔡康永主持嘅《康熙來了》，播足6年半，收視依然高企，攞過唔少電視節目獎項，今年上半年，仲奪得同時段清談節目收視Number One。
鍾意响節目問人幾時「失身」，又會失驚無神攬實靚仔嘉賓嘅小S，雖然俾人鬧佢行為不守婦道，但觀眾愈鬧愈捧場。
既然小S有功收視，電視台決定向兩位主持大幅加薪，防止其他電視台挖角，搶走收視孖寶。
每集1小時嘅《康熙》，兩位主持薪金原本係6萬台幣（約15,000港元），經過薪酬調整後，小S加一倍人工去到12萬台幣（約30,000港元），反而蔡康永只係加到8萬台幣（約20,000港元）。
消息一出，行內人都戥蔡康永唔抵，因為睇過《康熙》嘅人都知道，成個節目只有佢一個負責問問題，小S只係間唔中彈兩句無厘頭對白，似歡樂小姐多過似主持。
12萬時薪成為小S嘅最低工資，就算外界認為佢受之有愧，慘得過電視台肯俾錫到燶，所以下年林峯繼續攞亞太區最受歡迎男歌手，有乜咁出奇！

台灣金牌司儀
張菲 60萬
庾澄慶 30萬
陶晶瑩 8萬

司儀界一哥張菲，主持《綜藝大哥大》每集節目收60萬，屬台灣最高薪，而香港人熟悉嘅庾澄慶，接任《我猜我猜我猜猜猜》主持，每集收30萬，至於陶姐陶晶瑩，收8萬一集，人工仲少過小S囉陰功！（薪酬以台幣計算）

似巴斯光年
設計意念來自美式欖球服裝，熒光綠做主色已經夠老土，再加啲白加啲黑，的確變咗巴斯光年，可以同鄧梓峰組情侶檔。