明星靚相大分享☆

眨吓眼，今個星期六（八月七日）就係立秋，大家仲熱到透唔到氣，但月餅廣告已經陸續出籠，過埋減價季尾，連秋冬裝都出籠！
有買趁手！上個禮拜，《壹》仔喺中環同尖沙咀海港城兩大shopping熱點都撞到唔少人。羅傑承老婆梁芷珊，同呂良偉、楊小娟兩公婆同日同時出現中環太子大廈間Chanel。

先前已經喺D&G同Joyce有斬獲嘅呂生呂太，喺Chanel再斬四兩，大豐收！不過，陪老婆shopping嘅呂良偉是日短褲踢拖，一身街坊裝，買完嘢，兩手挽住幾大袋名牌，跟响拎住幾十萬Hermes鱷魚皮手袋嘅楊小娟後面，十足跑腿，九唔搭八！
咁又係，香港地有錢有嘜頭嘅，去到邊都路路暢通，呂良偉呢身「茄」look，換轉喺日本東京，啲名牌店隨時唔歡迎你，唔做你生意。
不過，亦唔係人人都可以學呂良偉兩公婆，掃貨唔使左度右度！好似曹敏莉、李詩韻同戚黛黛三小花，上星期三（廿八日）亦約埋一齊去海港城執平貨，內衣皮鞋首飾樣樣睇，但最終都係得個摸字，零幫襯。

老公陪買嘢，兼做埋咕喱，楊小娟只負責做靚太，渾身上下，一個貴字。

一身街坊裝嘅呂良偉，跟响拎住幾十萬Hermes袋嘅楊小娟後面，十足跟班。

同一時間，羅太梁芷珊亦同朋友喺Chanel大出血，主力飾物同太陽眼鏡。

揀到夠鐘閂鋪，梁芷珊攞出記事簿，安排店員送貨，唔使拎！

左起：李詩韻、戚黛黛同曹敏莉三人行，趁季尾減價執平嘢。

入到買個bra郁吓過千，under幾嚿嘅Private Shop，曹敏莉表現最積極，攞起個運動型款，左睇右睇。

摸住對減到三百幾嘅鞋，三姊妹圍埋研究，都係決定放低。