Wonder Girls（WG）首次喺香港開演唱會，揀喺山卡罅亞洲博覽館，開show前貴飛滯銷，$880劈價到$288，先有番啲起色。
入到場，近九成滿，坐滿十零歲o靚仔o靚妹、一家大細，當然仲有韓國同胞捧場，都唔算冷清。WG成晚齋唱自己歌，冇嘉賓，氣氛一般，都算，最慘係寫明唱三粒鐘，結果斬頭斬尾唱得粒半鐘，仲短過王菲。唯獨是首本名曲《Nobody》，唱完抒情版，隔一陣又嚟搖滾版，最後encore再唱多次三語版，全場high爆三次。睇嚟，在場的所謂fans，淨係識呢首。
當晚撞正全年最凍，大嶼山得五六度，演唱會仲要遲足半個鐘先開場，等到觀眾鼓譟。WG以快歌《So Hot》、《I Wanna》打響頭炮，又不時出招冧fans，用廣東話講幾句「你哋好」、「我愛你」，fans總算有番啲反應，開始尖叫。咁都唔止，WG請咗一個男fans上台唱《Saying I Love You》，逐一同佢拖手又搭膊頭，即場影埋寶麗來，仲送巨型熊仔、禮物、鮮花，男fans醒目把握機會同WG自拍，恨死隔籬，台下嗌到拆天的，竟然是一班妹妹仔！
Solo時段離唔開勁歌熱舞，譽恩high到爬上琴，隊長善藝獻唱《You Raise Me Up》，背景播小時候片段，sell溫馨。中場，輪到播五位成員的搞笑短片，不過得英文字幕，細路仔睇唔明，靜晒。跳足90分鐘後，WG同觀眾大合唱《Tell Me》，著住超高高踭鞋的譽恩叉錯腳幾乎仆倒。最後encore，《Nobody》韓文、英文、國語一曲三語，唱完即閃。望吓錶，十點咋喎，海報明明印住八點開始十一點完，最終八點半唱到十點算數？三個鐘concert縮水得番個半鐘，唔通香港係亞洲巡迴最後一站，所以特別早收工？抑或劈價飛預咗冇足本呀？
WG五女出場時以一身黑色密實服裝現身，長腿都冇show，失望。
場外有六個易拉架俾fans同偶像「合照」，屬粗製濫造，不過仍然保持已離隊的宣美，算佢唔忘本。
入座率比預期高，係$880貴飛區最多吉位。
惠林在香港長大，講廣東話冇難度，點解唔唱廣東歌俾本地歌迷聽呀？
主辦單位稱演唱會專登請來美國及韓國的舞台燈光設計師，不過效果幾娘。
星級觀眾最紅係Dada（陳靜）（左）、施念慈（中）同Liz（李莉琳），稍為有名氣的如謝安琪、張繼聰、徐濠縈就由秘密通道入場，開頭吹到有甄子丹兩夫婦，信佢一成都雙目失明。
留言列表
