寶馬 2011 X3喺亞特蘭大搞試車，試完 Peachtree順滑 On-Road，跟住開上山進入 Painted Rock Farm， 1,200超低轉已榨出 400Nm最高扭力，瘋狂劈盡石路同泥路！寶馬將 SUV注釋成 SAV，就係要話畀人知， X系列唔再屬休旅車咁簡單！記者、攝影：徐影龍
其他副刊影片 碎石乾泥大考驗
廠方安排試 X3 xDrive 35i，日行駛超過 200公里，全新 X3體積加大，正當享受緊闊落舒適嘅豪華駕駛感，按 GPS指示，於百零公里途中，駛入山中一處名為 Painted Rock Farm嘅遼闊營地。一望無際嘅草地，外加泛着迷人碧藍色嘅靚湖美景，揸住 X3踱步散心，連日來出國公幹嘅疲態盡消，好愜意！搵個靚位慢慢影相，午休後再搵吓砂石路，稍稍一試 X3嘅越野性能，以為輕輕鬆鬆又收工。點知以為準備打道回府之際，指導員問我準備好未， Ready就正式駛入「至激農場」。望住兩旁大樹林立，只剩極狹窄入口，未駛入已 Feel到高低起伏嘅路面，以及滿地碎石同乾泥，原來呢 Part先係 Off-Road主菜！唔係啩？架 X3咁豪華又新淨，點忍心呀？
放大圖片 
■揸漫長 Off-Road都幾攰，部份傳媒會喺較闊路段稍作休息。
放大圖片 
■穿越一個又一個樹林，玩到唔記得 X3係架中型豪華 SAV。
放大圖片 
放大圖片 
放大圖片 
■加入 8速 Steptronic+/-波箱，慳油之餘仲好靈活。
放大圖片 
■咪俾 X3豪華外表蒙騙，其越野性能絕對經得起考驗。
400Nm隨時揸喺手 放大圖片 
穿過入口駛入，果如所料路面狹窄，滿地大細碎石相當難行，扽到人都癲，可幸 X3懸掛衝程足夠，不致硬食回震力。廠方攝影車走在前面，揚起鋪天沙塵，本來環境極惡劣，但 X3座高同夠 Wide嘅擋風玻璃，令人易於認清路面。最正係新 TwinPower Turbo引擎加 8速波箱嘅完美配合，扭力峯值由 1,200轉已爆發，一路直上 5,000轉，都有超強 400Nm揸喺手，基本上毋須轉入 DDC嘅「 Sport+」模式，掂住油門已應付到上上落落嘅崎嶇爛路，引擎呼吸暢順，唔會跑到上氣唔接下氣。越跑越刺激，開始忘記 X3係一架中型豪華 SAV，大油大 Brake兼不停扭軚，漸漸當正自己揸緊越野四驅車。咁靈活，全因首次加入 X系嘅 EPS電子轉向系統，以及享負盛名嘅 xDrive智能四驅系統，過彎或單輪離地無抓着力，都懂得分配動力至其他輪胎，唔會齋 Spin胎咁浪費動力。仲有兩個禮拜，全新 X3就火速到港，屆時再安排「 SM路段」，瘋狂蹂躪一下呢架極好玩嘅 X3。
放大圖片 
■全新設計內櫳，保持 X系的特色外，亦不乏豪華度及新鮮感。
放大圖片 
■尾廂空間可達 1,600公升，兩口子大可野外露營玩激情。
規格
引擎： 2,979cc直六 Turbo馬力： 306ps/5,800rpm扭力： 400Nm/1,200-5,000rpm傳動： 8速+/-波箱四驅售價及到港日期：待定查詢： 3129 9000（ BMW HK） 
留言列表
