明星靚相大分享☆

傅穎（ Theresa）同羅仲謙嘅緋聞，一直以嚟都擺明似宣傳居多，近日兩個更十足做大龍鳳咁，有傳 Theresa發覺羅仲謙喺北京有個正印女友，羅仲謙俾 Theresa踢爆一腳踏兩船，結果一怒之下飛咗佢，真係拍劇都冇咁精采。噚日 Theresa同韓國偶像韓庚去到柴灣出席活動，之前 Theresa已經話羅仲謙講嘢冇句真，噚日又有報道話羅嘅正印北京女友同 Theresa對質，又話羅仲謙向 Theresa跪地認錯，問到一連串嘅新聞， Theresa話封口唔想再講，佢話唔想緋聞好似雪球越滾越大。至於有傳 Theresa被經理人公司照肺，佢仍然否認，話唔係因為咁而封嘴。

放大圖片

傅穎同羅仲謙嘅緋聞一直似宣傳居多，近日卻爆出二人決裂，事態峯迴路轉。資料圖片

放大圖片

韓星韓庚噚日一到香港就出席活動，唔怪得做訪問時一臉倦容。

「係咪誠實要商榷」

不過有雜誌話 Theresa一位記者朋友爆料指證羅仲謙花心， Theresa話：「你哋問番當事人，但我識佢好多年。」至於家同羅仲謙係乜關係， Theresa就好冷漠話：「同事。」至於會唔會約埋行街食飯嗰種同事呢？ Theresa又話：「我同公司每個人都好好，會同同事食飯，好似一個家庭。」至於對羅仲謙係咪好似家庭成員，佢話：「佢都係公司一分子。」日前 Theresa接受有線訪問，再提到羅仲謙，佢話：「我唔憎佢，但佢係咪誠實就要商榷。佢係有令我失望，但係一個好人。」另外，韓庚噚日中午到港，約有 20幾個粉絲接機。對於同前經理人公司嘅官司贏咗，但對方打算上訴，韓庚透過工作人員表示：「一切交給律師處理。」


Theresa噚日去柴灣出席活動，講到同羅仲謙嘅緋聞時，佢話唔想多講喎。