拜金女王　熊黛林 @ 明星靚相大分享☆

香港地做model，得兩條出路。
童工年紀，已趨生蜜桃早熟賣弄色相嬉春，稚齡胭脂馬投身成人睇肉界，上位狠招唯靠露數。
雙腳踩花生天橋，雙手叩銀色大門，煮兩味講風水掹車邊固然OK，如能輕沾天王臉上金光身繫天王認證阿嫂名堂，身價何止超額十倍，還可輕易鯉躍億萬票房。
像熊黛林。
成名之路，活像台灣第一名模林志玲。
「我唔渴望變成第二個林志玲，佢唔係我目標！」熊以高八度但並沒有附送簽名式的嬌嗲尾音，瞪着我說。
答案，當然理解。
換着我，有得揀，目標，也寧可瞄準嫁入貴族的神級名模Natalia Vodianova。

起雙飛
熊黛林，當然今時不可與o靚模同級而喻。
籍貫貴州，出生南京，十九歲那年才隻身到上海發展，不過三載，憑身段躋身「中國十佳模特兒」之列。2006年南下登陸成為內輸外勞，未幾即被郭天王相中，由nobody一夜飛上枝頭博出青雲路，第一部擔正做女主角的電影，票房，斷億計。
拍到個好碼頭，大片一套接一套，即使被戲謔為史上至省鏡長腿花瓶，理得你，儂好歹也是億萬票房女主角呀，睬你盞降grade！但，這是否意味着往後將北望神州拍片去，從此退下天橋？
「一定唔會，model工作仍然會繼續。不過拍戲之外，司儀或歌星，點都唔會掂，因為唔識處理，嗰啲係需要用時間儲經驗慢慢浸嘅專業，以目前嚟講，我最負擔唔起嘅，就係時間。」
無時間原因，足本套用熊的自我狠評是：懶，又貪瞓。「好多時拍戲一埋位就起碼十幾粒鐘，我無得瞓會燥底。」所以一有時間，伊人寧願都拿來跟周公相會。如可，至少瞓十個鐘；唔使拍戲？瞓足一個對又點話！
那何不步Lisa S和Amanda S的後塵，一步一步，將興趣發展成另一條錢途？
「唔……我諗我唔會囉，而家咁都幾好吖！其實我覺得自己好幸福，有機會做戲，仲一拍就做女主角，而且跟住落去接嘅，都係！比起嗰啲『科班』出身，捱咗十幾年都未必有機會嘅，我絕對幸運。所以，好享受而家狀況——當然，如果，將來，有得再好啲，會更加開心，但我真係唔敢亦唔渴望有獎攞，作為一個新人，有得提名喎，仲想點！」

我的人生

買唔起
計過算過，最終還是不捨得老本行。並非骨子裡戀戀天橋，原因嘛，雌性動物本能，實在捨不得一時三刻暫借虛榮。
「女仔，個個都鍾意扮靚。最新嘅衫最貴嘅珠寶首飾，仲有好多好多平時實買唔起嘅，都只有做model先可以著到戴到。咁着數，點解要放棄唔做？」
對對對，試過腥味的夜貓子，食髓知味，抽不了身，不能回頭怎能回頭！更何況日日都見盡大場面的名模？更加回不了凡間。
「所以我唔會自己扲錢買珠寶首飾。」
且慢，並非慳得盡慳，要光宗耀祖接濟同鄉起大屋；大條道理，只要是女人，妳妳妳一定有共鳴。
「我屋企有成個化妝盒咁大嘅首飾箱，裡面乜都有，全部都係客送嘅，邊使真金白銀買！」熊說，像是日頸上所戴由客戶送贈的一條頸鏈。「玩design款，搵粒石仔睇吓都無，標價卻要五千幾蚊歐羅！除非含住金鎖匙出世，否則，正常人，點解肯俾錢買？」
以為賣花姑娘只會讚花香，誰知，更老實不客氣的，陸續有嚟。
「平時做show，價值成億，雞乸咁大粒鑽石戒指，我都戴過，因此知道買呢啲嘢（珠寶），無番咁上下（錢），買唔到好嘢囉！但真係要買好少少，唔寒酸，唔係一卡咁細粒石嘅，仲要閃，起碼要幾十萬，幾十萬喎？好貴，唔捨得，不如等人送。」
現實？係o架！陶喆向奀模求婚都送兩卡；女王金口要到，坐三望五有啦有啦。

唔寒酸，唔係一卡咁細粒石嘅，仲要閃，起碼要幾十萬，幾十萬喎？好貴，唔捨得，不如等人送。

淺灰色狐狸毛燕尾短褸 $63,200
淺灰色半截裙 $10,000
Both Loewe
Rimowa Solid系列行李箱價格待定

I do！
娛圈新聞，連「煲」水都要靠把口，人脈關係圖越複雜，自然可看性更高！
自認「宅」到不能，明年就踏入三字剩女功能組別的熊黛林，驚唔驚偷芒事件之後，再殺出大堆香蕉士多啤梨蘋果橙？
「我先唔驚，又唔係冇人要，只不過想單身多幾年再玩吓先！」
女王夢想中的婚禮，五隻字總結：最緊要浪漫——而浪漫，往往是要靠錢錢錢錢錢來堆砌的，例如求婚鑽戒。
「如果老公送，我想要三卡以上。」
記住，最尾嗰兩隻字，係以上。
「唔一定要名牌，款式反而更緊要，最好乾乾淨淨一粒過，設計要好好火！我做show時曾經戴過隻Cartier粉紅鑽戒，好靚好貴，一戴上手就鍾意到不得了，唔想除低，我知粉鑽價值，係咁多種鑽石之中最貴嘅……」
女人，一講起終生best friend珠錶首飾，邊停得口，當事人那雙碌到五蚊銀咁大的眼珠，更幾乎跌出嚟咁滯。
郭天王喎，三卡——以上，濕濕碎啦！

深藍色狐狸皮頸飾 $15,000
深啡色針織上衣 $6,210
深灰色高腰褲 $18,800
黑色鱷魚皮皮帶 $6,000
黑色皮手套價格待定
All Loewe